တောင်ဒဂုံမှာ ဆက်တိုက်ပစ်ခတ်နေ၊ နှစ်ယောက်သေဆုံး

• 2021-03-29

ရန်ကုန်၊ တောင်ဒဂုံမြို့နယ်မှာ စစ်ကောင်စီတပ်ဖွဲ့တွေ ဒီနေ့ပစ်ခတ်ဖြိုခွဲနေတဲ့ မြင်ကွင်းတွေဖြစ်ပါတယ်။ ဒီကနေ့ တောင်ဒဂုံမှာပစ်ခတ်မှုကြောင့် နှစ်ဦးသေဆုံးတယ်လို့ ကနဦး သတင်းရရှိပါတယ်။

စစ်ကောင်စီတပ်ဖွဲ့က သေနတ်၊ လက်ပစ်ဗုံးတွေအပြင် လက်နက်ကြီးတွေပါ သုံးစွဲပစ်ခတ်ပြီး ရပ်ကွက်လမ်းသွယ်တွေ၊ နေအိမ်တွေထဲထိ ပစ်ခတ်နေတာလို့ ဒေသခံတွေက RFA ကိုပြောပါတယ်။

လက်နက်ကြီးတွေပါ သုံးစွဲ ပစ်ခတ်တယ်ဆိုတဲ့ ပြောဆိုချက်နဲ့ ပတ်သက်ပြီး စစ်ကောင်စီရဲ့ တုံ့ပြန်ချက်ကိုတော့ RFA က မသိရသေးပါဘူး။

စစ်တပ်နဲ့ ရဲတွေ ရပ်ကွက်တွေထဲ မဝင်နိုင်အောင် ပိတ်ဆို့ကာရံထားတဲ့ အတားအဆီးတွေမှာ စောင့်နေကြတဲ့ ပြည်သူ့လုံခြုံရေး လူငယ်အဖွဲ့တွေ ပစ်ခတ်ခံနေရတာလို့ ဆိုပါတယ်။

လက်ရှိ ညနေ ၆ နာရီအထိ ပစ်ခတ်နေပြီး၊ ဒဏ်ရာရတဲ့သူ အများအပြားရှိနေတယ်လို့ ဒေသခံတွေကပြောပါတယ်။ မနေ့ကလည်း တောင်ဒဂုံမှာ ပစ်ခတ်မှုကြောင့် သုံးယောက်သေဆုံးခဲ့ပါတယ်။

RFA ကကောက်ယူထားတဲ့ စာရင်းအရ ဖေဖော်ဝါရီ ၁ ရက်နေ့ စစ်အာဏာသိမ်းပြီးနောက် စစ်တပ်နဲ့ရဲရဲ့ ဖမ်းဆီး ရိုက်နှက် ပစ်ခတ် သတ်ဖြတ်မှုတွေကြောင့် သေဆုံးရတဲ့ အရပ်သားပြည်သူ လေးရာကျော် ရှိသွားပါပြီ။