ရခိုင် ရှေးဟောင်းမြောက်ဦးမြို့ကို AA ထိန်းချုပ်

• RFA Burmese
  2024-02-09

ရခိုင်ပြည်နယ် မြောက်ဦးမြို့မှာ တစ်ခုသာကျန်ရှိတော့တဲ့ အမှတ် (၃၁) ရဲတပ်ရင်းကို ဖေဖော်ဝါရီလ ၈ ရက်နေ့က ရက္ခိုင့်တပ်တော် (AA) က အပြီးသတ်သိမ်းပိုက်လိုက်ကြောင်း ရက္ခိုင့်တပ်တော် AA ပါဝင်တဲ့ ညီနောင်မဟာမိတ်သုံးဖွဲ့က ဖေဖော်ဝါရီလ ၈ ရက်နေ့က ထုတ်ပြန်ပါတယ်။

မြောက်ဦးမှာ စစ်ကောင်စီ ခြေမြန်တပ်ရင်း ခမရ (၃၇၇)၊ (၃၇၈) နဲ့ (၅၄၀) ရှိပြီး အဲဒီတပ်ရင်းတွေကို ကနဦး သိမ်းပိုက်ပြီးနောက် နောက်ဆုံးကျန်ရှိနေတဲ့ အမှတ် (၃၁) ရဲတပ်ရင်းကို အပြီးသိမ်းပိုက်ခဲ့တာလို့ ဒေသခံတွေက ပြောပါတယ်။

လက်ရှိမှာ ကျောက်တော်မြို့အခြေစိုက် အမှတ် (၉) စစ်ဆင်ရေးကွပ်ကဲမှုဌာနချုပ် စကခ (၉) လက်အောက်ခံတပ်ရင်း ဆယ်ရင်းလုံးကို ရက္ခိုင့်တပ်တော် (AA) က သိမ်းပိုက်ထားပြီး မြောက်ဦး အပါအဝင် ကျောက်တော်၊ မင်းပြားမြို့တွေမှာ စစ်ကောင်စီတပ်စခန်းတွေ မရှိတော့ဘူးလို့ ဆိုပါတယ်။

အခုလို မြို့တွေအသိမ်းခံရတာနဲ့ပတ်သက်လို့ စစ်ကောက်စီဘက်ကတော့ တစ်စုံတစ်ရာ ထုတ်ပြန်တာ မရှိပါဘူး။ ရခိုင်ပြည်နယ် စစ်ကောင်စီပြောခွင့်ရ ပြည်နယ်ဥပဒေချုပ် ဦးလှသိန်းကို RFA က တယ်လီဖုန်းနဲ့ ဆက်သွယ်ခဲ့ပေမယ့် ဖုန်းစက်ပိတ်ထားတာကြောင့် ဆက်သွယ်လို့ မရပါဘူး။

ရက္ခိုင့်တပ်တော် (AA) က ထိန်းချုပ်လိုက်တဲ့ မြောက်ဦးမြို့ဟာ ရခိုင်လူမျိုးတွေရဲ့ ရှေးဟောင်း မင်းနေပြည်တော်လည်း ဖြစ်ပါတယ်။