ခင်ဦးမြို့မှာ ထိန်းသိမ်းခံ ဆန္ဒပြခေါင်းဆောင် ၅ ဦး ပြန်လည်လွှွတ်မြောက်

• 
  2014-01-15

စစ်ကိုင်းတိုင်းဒေသကြီး၊ ခင်ဦးမြို့မှာ ပုဒ်မ ၁၈ ဖျက်သိမ်းပေးဖို့နဲ့ အကျင့်ပျက်ချစားမှုတွေကို အရေးယူပေးဖို့ ဆန္ဒပြတောင်းဆိုခဲ့ကြသူတွေကို ဒီနေ့ ခင်ဦးရဲစခန်းက ဖမ်းဆီးလိုက်ပြီး ရွှေဘိုခရိုင် တရားရုံးကနေ အာမခံနဲ့ ပြန်လွှတ်ပေးလိုက်ပါတယ်။

ပုဒ်မ ၁၈ ဖျက်သိမ်းပေးရေးအတွက် ခင်ဦးမြို့ ၈၈ မျိုးဆက် ငြိမ်းချမ်းရေးနဲ့ ပွင့်လင်းလူ့အဖွဲ့အစည်းက ဦးဆောင်ပြီး မနေ့ကနဲ့ ဇန်နဝါရီလ ၁၃ ရက်နေ့က  ဆန္ဒပြတောင်းဆိုခဲ့ကြတာပါ။

အဲဒီဆန္ဒပြပွဲကို ဦးဆောင်သူ ၅ ဦးကို ကိုယ်ပိုင်အာမခံနဲ့ ပြန်လွှတ်ပေးလိုက်တယ်လို့ ခင်ဦးမြို့နယ် ၈၈ မျိုးဆက် ငြိမ်းချမ်းရေးနဲ့ ပွင့်လင်းလူ့အဖွဲ့အစည်းတာဝန်ခံ ကိုသိန်းအောင်က ပြောပါတယ်။

"ခင်ဦးမြို့နယ်မှာ ဆန္ဒပြတာ၊ ကျနော်အပါအဝင် ငါးယောက်ကို ရဲမှူးကြီးက ပုဒ်မ ၁၈ နဲ့ မနက် ၈ နာရီခန့်မှာ တရားစွဲတယ်။ ခင်ဦးရဲစခန်းကနေ ကျနော်တို့ကို ခရိုင်တရားရုံးကို ခေါ်သွားပါတယ်။ ရွှေဘို တရားရုံးက အာမခံနဲ့ ပြန်လည်လွှတ်ပေးလိုက်တယ်ပေါ့ဗျာ"

ဆန္ဒပြသူတွေက မြို့နယ်တရားသူကြီး ၊ မြို့နယ်မြေစာရင်းဦးစီးဌာန စတဲ့လူပုဂ္ဂိုလ်တွေကိုပါ အရေးယူပေးဖို့ကိုလည်း တောင်းဆိုခဲ့ကြပါတယ်။ ဆန္ဒပြဖို့ ခွင့်ပြုချက်တင်ခဲ့ရာမှာ မရခဲ့တာကြောင့် ၂ ရက်ဆက်တိုက် တရားမဝင်ဆန္ဒပြခဲ့ကြတာပါ။

အဲဒီ ဆန္ဒပြခေါင်းဆောင်ငါးဦးကို လာမယ့် ဇန်နဝါရီလ ၁၇ ရက်နေ့မှာ ရွှေဘိုခရိုင်တရားရုံးမှာ ရုံးတင်စစ်ဆေးသွားမယ်လို့ သိရပါတယ်