ရိုဟင်ဂျာတွေကို ထပ်မံ လက်ခံဖို့ ဘင်္ဂလားဒေ့ရှ် ငြင်းဆို

• 
  2012-07-28

မိမိတို့နိုင်ငံအနေနဲ့လက်ရှိမှာတင် မြန်မာနိုင်ငံကလာတဲ့ ရိုဟင်ဂျာ ၃ သိန်းကို ဒုက္ခသည်တွေ အဖြစ် လက်ခံထားရပါတယ်။ ထွက်ပြေးလာတဲ့ ဒုက္ခသည် မှန်သမျှကို လက်ခံဖို့လည်း မိမိတို့ ဘင်္ဂလားဒေ့ရှ်နိုင်ငံမှာ တာဝန်မရှိပါဘူးလို့ ဝန်ကြီးချုပ် ရှိတ်ဟာဆီနာ က ပြောကြောင်း အယ်ဂျာဇီရား သတင်းမှာ ဖေါ်ပြထားပါတယ်။

ဒီအတောအတွင်းမှာပဲ ရခိုင်ပြည်နယ်မှာ မကြာသေးခင်က  ဖြစ်ပွားခဲ့တဲ့ ပြဿနာတွေကို  မြန်မာအစိုးရ လုံခြုံရေးတပ်ဖွဲ့တွေက နှိမ်နင်းရာမှာ မမျှမတ  ခွဲခြားဆက်ဆံမှုတွေ ရှိခဲ့တယ်ဆိုတဲ့ သတင်းတွေကို မိမိတို့ ရရှိနေကြောင်း ကုလသမဂ္ဂ လူ့အခွင့်အရေးဆိုင်ရာ မဟာမင်းကြီး နာဗီ ပီလေ (Navi Pillay) က မနေ့က ပြောဆိုလိုက်ပါတယ်။

အကြမ်းဖက် လုပ်ရပ် ကျူးလွန်မှုတွေကို တားဆီးအပြစ်ပေးဖို့လည်း Ms. Navi Pillay က မြန်မာအစိုးရကို တိုက်တွန်းလိုက်ပါတယ်။ ရိုဟင်ဂျာတွေနဲ့ပတ်သက်ပြီး မြန်မာအစိုးရ နဲ့ သတင်းမီဒီယာတချို့ အပြင် လူမှုရေး ကွန်ယက် စာမျက်နှာတွေမှာ ရင့်သီးပြင်းထန်တဲ့ အသုံးအနှုံး သုံးစွဲမှုတွေအပေါ်  သူ့အနေနဲ့ စိုးရိမ်ပူပန်မိတယ်လို့လည်း ဆိုပါတယ်။

ဒါ့အပြင် လူ့အခွင့်အရေးဆိုင်ရာ ကုလသမဂ္ဂ အထူး ကိုယ်စားလှယ် မစ္စတာ ကင်တားနား (Tomas Ojea Quintana) ကို လာမဲ့ ၃၀ ရက်နေ့ကနေ သြဂုတ်လ ၄ ရက်နေ့အထိ  မြန်မာနိုင်ငံကို လာရောက်ဖို့ မြန်မာအစိုးရရဲ့ ဖိတ်ကြားချက်ကို Ms. Navi Pillay က ကြိုဆိုလိုက်ပါတယ်။ မစ္စတာ ကင်တားနားရဲ့ အဲဒီခရီးစဉ် အတွင်း ရခိုင်ပြည်နယ်က ဖြစ်ရပ်တွေမှာ ထိခိုက်နစ်နာဆုံးရှုံး ရသူအားလုံးအနေနဲ့ မစ္စတာ ကင်တားနားကို လွတ်လပ်စွာ တွေ့ဆုံပြောဆိုခွင့် ရရှိဖို့ အရေးကြီးကြောင်းလည်း ကုလသမဂ္ဂ လူ့အခွင့်အရေး ဆိုင်ရာ မဟာမင်းကြီးက ပြောဆိုပါတယ်။