တရုတ်လွှမ်းမိုးမှုကို စိုးရိမ်ကြောင်း တိုင်းရင်းသားပါတီတချို့ ထောက်ပြ

• အောင်သိင်္ခ
  2020-01-22

မြန်မာနိုင်ငံကို နှစ်ရက်ကြာ လာရောက်လည်ပတ်ခဲ့တဲ့ တရုတ်သမ္မတ ရှီကျင်းဖျင်ရဲ့ ခရီးစဉ်မှာ မြန်မာနိုင်ငံနဲ့ သဘောတူညီမှု လက်မှတ်ရေးထိုးသွားတဲ့ စီမံကိန်းတွေနဲ့ ပတ်သက်ပြီး တိုင်းရင်းသားပါတီတွေအနေနဲ့ စိုးရိမ်မှုတွေရှိနေတယ်လို့ ပြောကြပါတယ်။

မြန်မာ့ငြိမ်းချမ်းရေးနဲ့ ပတ်သက်ပြီး တိုင်းရင်းသားပါတီတွေပါဝင်တဲ့ ဆွေးနွေးပွဲကို ဖက်ဒရယ်ဒီကရက်တစ်အင်အားစုကနေ ဦးစီးပြီး မနေ့က ရန်ကုန်မြို့မှာ ပြုလုပ်ခဲ့ပါတယ်။

မြန်မာ့ငြိမ်းချမ်းရေးနဲ့ ပတ်သက်ပြီး တိုင်းရင်းသားဒေသတွေမှာရှိတဲ့ တိုင်းရင်းပါတီတွေ စုပေါင်းပြီး ငြိမ်းချမ်းရေး ဖြစ်စဉ်အောင်မြင်မှု ရရှိရေးအတွက် ဇန်နဝါရီ ၂၀ ရက်ကနေ ၂၁ ရက်နေ့ထိ ရန်ကုန်မြို့မှာ ဆွေးနွေးခဲ့ကြပါတယ်။

ဆွေးနွေးပွဲက ရလဒ်တဲသဘောထားတွေကို နိုင်ငံတော် အစိုးရ၊ တပ်မတော်၊ NRPC နဲ့ တိုင်းရင်းသား လက်နက်ကိုင် အဖွဲ့အစည်းတွေဆီကို ပေးပို့သွားမှာဖြစ်တယ်လို့ ဖက်ဒရယ်ဒီမိုကရက်တစ် အင်အားစုက ဦးမြအေးက ပြောပါတယ်။

ပြီးခဲ့တဲ့ ဇန်နဝါရီလ ၁၇ ရက်နေ့ကနေ ၁၈ ရက်နေ့ထိ မြန်မာနိုင်ငံကို လာရောက်လည်ပတ်တဲ့ တရုတ်သမ္မတ ရှီကျင်းဖျင်ရဲ့ ခရီးစဉ်မှာ မြန်မာအစိုးရနဲ့ သဘောတူညီ လက်မှတ်ထိုးခဲ့တဲ့ စီမံကိန်းတွေနဲ့ ပတ်သက်ပြီး တိုင်းရင်းသားပါတီတွေ အနေနဲ့ စိုးရိမ်မှုတွေ ရှိနေကြပါတယ်။

တိုင်းရင်းသားဒေသတွေ လုပ်ဆောင်မယ့် စီမံကိန်းတွေနဲ့ ပတ်သက်ပြီး တရုတ်နိုင်ငံနဲ့ သဘောတူညီ လက်မှတ်ထိုးခဲ့တဲ့ ကျောက်ဖြူအထူးစီးပွားရေးဇုန် စီမံကိန်းမျိုးနဲ့ ပတ်သက်ပြီး ရခိုင်ပြည်သူလူထုတွေက လိုးလာမှုမရှိတဲ့အပြင် ရခိုင်မှာလာရောက်လုပ်ကိုင်တဲ့ တရုတ်စီမံကိန်းတွေဟာ ရခိုင်ပြည်သူတွေ ဖွံ့ဖြိုးတိုးတက်ရေးအတွက် လုပ်ဆောင်ပေးတာ မရှိဘူးလို့ မြောက်ဦးမြို့နယ် ပြည်သူ့လွှတ်တော် ကိုယ်စားလှယ် ဦးဦးလှစောက ပြောပါတယ်။

တရုတ်သမ္မတ ခရီးစဉ်မှာ မြန်မာနိုင်ငံနဲ့ သဘောတူစာချုပ် ၃၃ ခုရေးထိုးလိုက်တယ်လို့ သိရပါတယ်။

ဒါ့အပြင် နိုင်ငံတော် အကြီးအကဲတွေနဲ့ တွေ့ဆုံမှုတွေ ပြုလုပ်ခဲ့ပြီး တပ်မတော်ကာကွယ်ရေး ဦးစီးချုပ်နဲ့ တွေ့ဆုံချိန်မှာ တရုတ်နိုင်ငံအနေနဲ့ မြန်မာပြည်နယ်စပ်က တိုင်းရင်းသား လက်နက်ကိုင် အဖွဲ့အစည်းတွေကို လက်နက်ကူညီ ထောက်ပံ့မှု မရှိကြောင်း တရုတ်သမ္မတ ရှီကျင်းဖျင်က ပြောခဲ့ပါတယ်။

တရုတ်ပြည်သူ့သမ္မတ နိုင်ငံအနေနဲ့ မြန်မာ့ငြိမ်းချမ်းရေးမှာ ကူညီဆောင်ရွက်ပေးမှုတွေ ရှိနေပေမယ့် တစ်ဖက်မှာ သူ့အကျိုးစီးပွားအတွက် အဓိကလုပ်ဆောင်နေတာဖြစ်ပြီး မြန်မာ့ငြိမ်းချမ်းလုပ်ငန်းစဉ်မှာ အနောက်နိုင်ငံက အမေရိကန်တို့ ပါဝင်လာမယ်ဆိုရင်တော့ ပိုမိုခိုင်မာတဲ့ ငြိမ်းချမ်းရေး ရရှိလာနိုင်မယ်လို့ ကချင်ဒီမို ကရက်တစ်ပါတီ ဥက္ကဋ္ဌ ဦးကွမ်ဂေါင်အောင်ခမ်းက ပြောပါတယ်။

မြောက်ပိုင်းမဟာမိတ်အဖွဲ့တွေကို ထောက်ပံ့မှုတွေ လုပ်ကိုင်နေတာဟာ တရုတ်နိုင်ငံဖြစ်တဲ့အတွက် မြန်မာ့ငြိမ်း ချမ်းရေးမှာ တရုတ်နိုင်ငံရဲ့ လွှမ်းမိုးမှု ပိုကြီးလာနိုင်တယ်လို့ ချင်းအမျိုးသား ဒီမိုကရေစီ အဖွဲ့ချုပ်ရဲ့ ပူးတွဲ အထွေ ထွေအတွင်းရေးမှူး ဆလိုင်းရှိန်းထွန်း ကပြောပါတယ်။

နှစ်ရက်ကြာ ကျင်းပခဲ့တဲ့ ဆွေးနွေးပွဲမှာ တိုင်းရင်းသားပါတီတွေ အနေနဲ့ ပူးပေါင်းလုပ်ဆောင်ကြဖို့ လိုအပ်တဲ့အကြောင်း ၂၀၂၀ ရွေးကောက်ပွဲမှာ ရွေးကောက်ပွဲကော်မရှင် အနေနဲ့ ပါတီတွေနဲ့ တွေ့ဆုံဖို့လိုအပ်ကြောင်း၊ မြန်မာ့ ငြိမ်းချမ်းရေး လုပ်ငန်းစဉ်နဲ့ ပတ်သက်ပြီး တိုင်းရင်းသားတွေရဲ့ အသံကို အစိုးရအနေနဲ့ နားထောင်ဖို့ လိုအပ်တဲ့အကြောင်း စတာတွေကို ဆွေးနွေးခဲ့ကြပါတယ်။

ဆွေးနွေးပွဲကို တိုင်းရင်းသားဒေသတွေက ပါတီတွေ အပြင်အခြားပါတီတွေကိုလည်း ဖိတ်ခေါ်ခဲ့ပြီး ပါတီပေါင်း ၃၉ ပါတီ တက်ရောက်ခဲ့ကြပါတယ်။