ရခိုင်ပြည်နယ်အရေး ဒေါ်အောင် ဆန်းစုကြည်နဲ့ အာဆီယံနိုင် ငံခြားရေးဝန်ကြီးတွေ ဆွေးနွေး

ရခိုင်ပြည်နယ်မှာ လူမျိုးတုန်းသတ်ဖြတ်မှုတွေ၊ လူ့အခွင့်အရေးချိုးဖောက်မှုတွေ ရှိနေတယ်ဆိုပြီး နိုင်ငံတကာက စွပ်စွဲပြောဆိုမှုတွေ ထွက်ပေါ်နေချိန်မှာ တွေ့ဆုံတဲ့ပွဲလည်း ဖြစ်ပါတယ်။

ဒီဆွေးနွေးပွဲမှာ ဒေါ်အောင်ဆန်းစုကြည်က ရခိုင်ပြည်နယ်မြောက်ပိုင်းမှာ ဖြစ်ပေါ်နေတဲ့ အခြေနေတွေကို ရှင်းလင်းပြောကြားခဲ့ပြီး၊ လူသားချင်းစာနာမှုဆိုင်ရာ အကူအညီပေးရေး လုပ်ငန်းတွေကို ကုလသမဂ္ဂအေဂျင်စီ အဖွဲ့စည်းတွေနဲ့ ပူးပေါင်းဆောင်ရွက်နေကြောင်း၊ အခုလို ခက်ခဲသိမ်မွေ့တဲ့ ပြဿနာတွေကို ဖြေရှင်းဖို့ မြန်မာအစိုးရမှာ သံန္နိဋ္ဌာန်ချထားပြီး သည်းခံအချိန်ပေးဖို့ ပြောကြားခဲ့တယ်လို့ အစည်းအဝေးပြီး နိုင်ငံခြားရေးဝန်ကြီးဌာနက ထုတ်ပြန်တဲ့ ကြေညာချက်မှာ ဖော်ပြပါတယ်။

ဒီဆွေးနွေးပွဲမှာ ရိုဟင်ဂျာမွတ်ဆလင်တွေအရေးဟာ အာဆီယံဒေသအတွင်း စိုးရိမ်စရာကိစ္စဖြစ်ပြီး အာဆီယံ အဖွဲ့အနေနဲ့ လူသားချင်းစာနာမှု အကူအညီပေးရေးနဲ့ ပြစ်မှုကျူးလွန်တယ်လို့ စွပ်စွဲချက်တွေကို စုံစမ်းစစ်ဆေးရေး အတွက် ပူးပေါင်းဆောင်ရွက်ဖို့ လိုအပ်ကြောင်း မလေးရှား နိုင်ငံခြားရေးဝန်ကြီးက ပြောကြားခဲ့တယ်လို့ သိရပါတယ်။

ထိုင်းနိုင်ငံခြားရေးဝန်ကြီးက အစည်းအဝေးနဲ့ ပတ်သက်လို့ အားရဝမ်းသာဖြစ်ကြတဲ့အကြောင်း သတင်းထောက်တွေ ကို ပြောကြားခဲ့ပါတယ်။