စစ်တွေ DMG သတင်းဌာန ချိပ်ပိတ်ခံရမှု စစ်ကောင်စီကို RSF ပြစ်တင်ရှုတ်ချ

• 2023-11-05

ရခိုင်ပြည်နယ် စစ်တွေမြို့ အခြေစိုက် Development Media Group (DMG) ကို စစ်ကောင်စီက ချိပ်ပိတ်ခဲ့တာကို  RSF  နယ်စည်းမခြား သတင်းထောက်များအဖွဲ့က ပြစ်တင်ရှုတ်ချလိုက်ပြီး သတင်းဌာန ဝန်ထမ်း နှစ်ယောက်ကို လွှတ်ပေးဖို့ တိုက်တွန်းလိုက်ပါတယ်။

လွတ်လပ်တဲ့ DMG အွန်လိုင်းသတင်းဌာနကို စစ်ကောင်စီက မရပ်မနား ဆက်လက်ထိပါး နှောင့်ယှက်တယ်လို့လည်း RSF က နိုဝင်ဘာ ၄ ရက်က ထုတ်ပြန်တဲ့ ကြေညာချက်မှာ ဖော်ပြပါတယ်။

စစ်တွေမြို့ ဆွမ်းဆန်စိမ်းလောင်းပွဲ သတင်းရယူနေတဲ့ သတင်းထောက် ကိုထက်အောင်ကို စစ်ကောင်စီက အောက်တိုဘာ ၂၉ ရက်က ဖမ်းဆီးပြီး နာရီပိုင်းအကြာမှာ DMG  သတင်းဌာနကို ဝင်ရောက်စီးနင်းရှာဖွေချိန်မှာ ရှင်းလင်းချက် တစ်စုံတစ်ရာမပေးဘဲ ကင်မရာတွေ၊ ကွန်ပျူတာလက်တော့ပ်တွေ သိမ်းဆည်းပါတယ်။ တခြား ဝန်ထမ်းတွေ တိမ်းရှောင်နေကြချိန်မှာ  ညစောင့် ကိုစိုးဝင်းအောင်ကတော့ ဖမ်းဆီးခံလိုက်ရပါတယ်။