စစ်တွေမြို့ပေါ် ဒုက္ခသည်စခန်းမှာ ရိက္ခာအခက်အခဲဖြစ်နေ
ဥဿလင်းဘုန်းကြီးကျောင်း ဒုက္ခသည်စခန်းမှာ ပလက်ဝမြို့နယ် စိမ်းညှင်းဝ၊ နှမဒါ၊ ဒိုးချောင်းဝ၊ မီးလက်ဝ၊ စိမ်းစင်းစတဲ့ ကျေးရွာက အိမ်ထောင်စု ၄၀ ကျော်နဲ့ လူဦးရေ ၁၇၀ ကျော် ခိုလှုံနေတာပါ။
- 2022-08-25
-
-
-
ရခိုင်ပြည်နယ် စစ်တွေမြို့ပေါ်မှာရှိတဲ့ ဥဿလင်းဘုန်းကြီးကျောင်း စစ်ဘေးဒုက္ခသည်စခန်းမှာ စားရေးသောက်ရေး အခက်အခဲဖြစ်နေတယ်လို့ စစ်ဘေးဒုက္ခသည်တွေက RFA ကိုပြောပါတယ်။
စစ်ကောင်စီက ထောက်ပံ့တဲ့ ဆန်ရိက္ခာလည်းမရောက်တော့သလို ကုန်စျေးနှုန်းတွေလည်း မြင့်တက်လာတာကြောင့်လို့ စစ်ဘေးဒုက္ခသည် ဒေါ်နန်းကျော့ခိုင်က ပြောပါတယ်။
“အခုဆိုရင် လူကယ်ပြန်က ထောက်ပံ့တဲ့ ဆန်မရောက်တာ ငါးလလောက်ရှိပြီ။ WFP က ထောက်ပံ့တာနဲ့ပဲ စားနေရတယ်။ အလုပ်အကိုင်တွေကလည်း မရှိဘူး။ အရင်လို အလှူရှင်တွေလည်း မရောက်တော့ဘူး။ ဆန်စျေး ဆီစျေး အကုန်လုံးတက်တယ်။ တော်တော်လေးကို အခက်အခဲဖြစ်နေကြတယ်”
ဥဿလင်းဘုန်းကြီးကျောင်း ဒုက္ခသည်စခန်းမှာ ပလက်ဝမြို့နယ် စိမ်းညှင်းဝ၊ နှမဒါ၊ ဒိုးချောင်းဝ၊ မီးလက်ဝ၊ စိမ်းစင်းစတဲ့ ကျေးရွာက အိမ်ထောင်စု ၄၀ ကျော်နဲ့ လူဦးရေ ၁၇၀ ကျော် ခိုလှုံနေတာပါ။
သူတို့ဟာ စစ်ကောင်စီတပ်နဲ့ ရက္ခိုင့်တပ်တော်(AA)တို့ တိုက်ပွဲတွေကြောင့် ပြီးခဲ့တဲ့ ၂၀၁၉ ခုနှစ်ကတည်းက စစ်တွေမြို့ပေါ်ကို အိုးအိမ်စွန့်ခွာ ထွက်ပြေးလာခဲ့ကြတာ ဖြစ်ပါတယ်။