ရခိုင်ပြည်နယ်က မွတ်ဆလင်တွေ ကို NV ကတ် စိစစ်ထုတ်ပေး ဖို့ နိုင်ငံတော်အဆင့် အဖွဲ့ဖွဲ့စည်း

• 
  2017-02-09

ရခိုင်ပြည်နယ်မှာ နိုင်ငံသားစိစစ်ခံယူရမယ့်သူရဲ့ သက်သေခံကတ်ပြားလို့ခေါ်တဲ့ NV ကတ်တွေ ထုတ်ပေးနိုင် ဖို့အတွက်  နယ်လှည့်ကွင်းဆင်းဆောင်ရွက်သွားမယ့် ဦးဆောင်အဖွဲ့တစ်ဖွဲ့ကို နိုင်ငံတော်သမ္မတ ဦးထင်ကျော် အမိန့်နဲ့ ဖွ့ဲစည်းပေးလိုက်ပါတယ်။

အလုပ်သမား လူဝင်မှုကြီးကြပ်ရေးနဲ့ ပြည်သူ့အင်အားဦးစီးဌာန ပြည်ထောင်စုဝန်ကြီးက ဥက္ကဌဖြစ်ပြီး ပြည်ထဲရေး၊ ကာကွယ်ရေး၊ လုံခြုံရေးနဲ့ နယ်စပ်ရေးရာဝန်ကြီးဌာနတွေက ဒု-ဝန်ကြီးတွေအပါအဝင် နိုင်ငံခြားရေးနဲ့ အမျိုးသား မှတ်ပုံတင်နဲ့ နိုင်ငံသားဦးစီးဌာနက ညွှန်ကြားရေးမှူးချုပ် တစ်ဦးတို့ ပါဝင်ကြောင်း ဒီနေ့ထုတ် ကြေးမုံသတင်းစာမှာ ပါရှိပါတယ်။

ရခိုင်ပြည်နယ်ထဲမှာ အရင်က ဝှိုက်ကတ်လို့ခေါ်တဲ့ ယာယီသက်သေခံလက်မှတ် ပြန်လည်အပ်နှံထား သူ ၄ သိန်းနီးပါးရှိရာမှာ ပြီးခဲ့တဲ့ ဇန်နဝါရီလအထိ ၆ ထောင်ကျော်ကိုသာ NV ကတ်ထုတ်ပေးထားရပါတယ်။

ရခိုင်ပြည်နယ်အတွင်းမှာလည်း နယ်မြေအခြေအနေအရ အကြမ်းဖက်တိုက်ခိုက်ခံရမှုတွေရှိခဲ့ကာ NV ကတ်တွေ အမြန်ဆုံးပြီးမြောက်စေဖို့အတွက် အခုလိုအဖွဲ့ဖွဲ့ပြီး ဆောင်ရွက်တာဖြစ်တယ်လို့ ပါရှိပါတယ်။

အဲဒီဦးဆောင်အဖွဲ့ဟာ ရခိုင်ပြည်နယ်အစိုးရအဖွဲ့နဲ့ ပူးပေါင်းဆောင်ရွက်သွားဖို့လည်း ညွှန်ကြားထားပါတယ်။