အမေရိကန် နိုင်ငံခြားရေးဝန်ကြီးနဲ့ မြန်မာ သမ္မတ တွေ့ဆုံမယ်

• 
  2012-07-12

ကမ္ဘောဒီးယား Siem Reap မြို့မှာ ကျင်းပနေတဲ့ အာဆီယံ နိုင်ငံခြားရေး ဝန်ကြီးတွေ အစည်းအဝေးရဲ့ နောက်ဆက်တွဲ စီးပွားရေး လုပ်ငန်းရှင်တွေနဲ့  တွေ့ဆုံပွဲမှာ နှစ်နိုင်ငံ ခေါင်းဆောင်တွေ တွေ့ဆုံ ဆွေးနွေးကြမယ်လို့ သိရပါတယ်။

နှစ်ဖက် တွေ့ဆုံတဲ့အခါ ပြီးခဲ့တဲ့ ၂ ရက်က အမေရိကန် အစိုးရက မြန်မာနိုင်ငံအပေါ် ချမှတ်ထားတဲ့ ပိတ်ဆို့ အရေးယူမှုတွေကို လျော့ချပေးလိုက်တဲ့ကိစ္စ အဓိကထား ဆွေးနွေးကြမယ်လို့ ဆိုပါတယ်။

သမ္မတကြီး ဦးသိန်းစိန်၊ ဒေါ်အောင်ဆန်းစုကြည်နဲ့ မြန်မာပြည်သူတွေဟာ ဒီမိုကရေစီ ပြုပြင်ပြောင်းလဲရေးမှာ တိုးတက်မှုတွေ ဖြစ်လာအောင် ကြိုးပမ်းနေကြတာ တွေ့ရပါတယ်။ အစိုးရဘက်ကလည်း နိုင်ငံရေးနဲ့ စီးပွားရေး ပြုပြင်ပြောင်းလဲမှုတွေ ဆက်တိုက် လုပ်ဆောင်နေပါတယ်လို့ အမေရိကန် သမ္မတ အိုဘားမား မနေ့က ထုတ်ပြန်လိုက်တဲ့ အိမ်ဖြူတော် ကြေညာချက်မှာ ဖော်ပြထားပါတယ်။

မြန်မာနိုင်ငံရဲ့ ရေနံနဲ့ သဘာဝဓာတ်ငွေ့ အပါအဝင် တခြား စီးပွားရေး လုပ်ငန်းတွေမှာ အမေရိကန် ကုမ္ပဏီတွေ အနေနဲ့ ရင်းနှီးမြှုပ်နှံမှုတွေ လုပ်နိုင်ပြီလို့ အမေရိကန် အစိုးရက ခွင့်ပြုလိုက်ပေမယ့် တစ်ချိန်တည်းမှာလည်း မြန်မာအစိုးရရဲ့ လူ့အခွင့်အရေး ချိုးဖောက်မှုတွေကို စိုးရိမ်လျက် ရှိသေးတယ်လို့လည်း သိရပါတယ်။

သမ္မတ ဦးသိန်းစိန်ကလည်း မြန်မာနိုင်ငံမှာ ဒုတိယအဆင့် နိုင်ငံရေး စီးပွားရေး ပြုပြင်ပြောင်းလဲမှုတွေ အကောင်အထည် ဖော်နေပြီ ဖြစ်တာကြောင့် အနောက်နိုင်ငံတွေက ချမှတ်ထားတဲ့ ဘဏ္ဍာရေး၊ စီးပွားရေး စတဲ့ ပိတ်ဆို့မှုတွေကို ရုပ်သိမ်းပေးဖို့ လိုအပ်ကြောင်း၊ ဒါမှသာ မြန်မာနိုင်ငံ လိုအပ်နေတဲ့ ကုန်သွယ်ရေးနဲ့ ရင်းနှီးမြှုပ်နှံမှုတွေ လမ်းပွင့်မှာ ဖြစ်ကြောင်း ဒီကနေ့ ပြောလိုက်ပါတယ်။