တိုင်းရင်းဆေးပညာလုပ်ငန်းတွေ ပူးပေါင်းဆောင်ရွက်မှုမြှင့်တင်ဖို့ စစ်ကောင်စီကို အိန္ဒိယတိုက်တွန်း

• RFA Burmese
  2023-10-22

မြန်မာနိုင်ငံနဲ့ အိန္ဒိယနိုင်ငံကြား တိုင်းရင်းဆေးပညာဆိုင်ရာ သင်ကြားရေးနဲ့ သုတေသနလုပ်ငန်းတွေ ပူးပေါင်းဆောင်ရွက်မှု မြှင့်တင်ရေး ပူးတွဲလုပ်ငန်းအဖွဲ့ဖွဲ့စည်းဖို့ မြန်မာနိုင်ငံဆိုင်ရာ အိန္ဒိယသံအမတ်ကြီး Vinay Kumar က စစ်ကောင်စီကို တိုက်တွန်းလိုက်ပါတယ်။

မန္တလေး တိုင်းရင်းဆေးတက္ကသိုလ်စာကြည့်တိုက်ကို အိန္ဒိယနိုင်ငံက တိုင်းရင်းဆေးဘက်ဝင်အပင်စာအုပ်တွေ အောက်တိုဘာ ၂၂ ရက်နေ့က သွားရောက်လှူဒါန်းရာမှာ သံအမတ်ကြီး Vinay Kumar က တိုက်တွန်းလိုက်တာလို့ မြန်မာနိုင်ငံဆိုင်ရာ အိန္ဒိယသံရုံးရဲ့ X လူမှုကွန်ရက်စာမျက်နှာ (ယခင် Twitter) မှာ ထုတ်ပြန်ထားပါတယ်။

စစ်ကောင်စီ ကျန်းမာရေးဝန်ကြီး ဒေါက်တာ သက်ခိုင်ဝင်းကလည်း တိုင်းရင်းဆေးပညာ အဆင့်အတန်းမြင့်မားလာဖို့အတွက် မြန်မာနိုင်ငံဟာ ဒေသတွင်းနိုင်ငံတွေနဲ့ ပူးပေါင်းဆောင်ရွက်မှု မြှင့်တင်သွားမယ်လို့ ပြောဆိုခဲ့ပါတယ်။

မြန်မာနိုင်ငံက ကျောင်းသား၊ ကျောင်းသူတွေ လျှောက်ထားနိုင်တဲ့ အိန္ဒိယနိုင်ငံရဲ့ ပညာသင်ဆုတွေအကြောင်းကိုလည်း အိန္ဒိယသံအမတ်ကြီးက စစ်ကောင်စီ တာဝန်ရှိသူတွေကို ပြောခဲ့ပါတယ်။