ဒီးမော့ဆိုမှာ လက်နက်ကြီးကြောင့် စစ်ဘေးဒုက္ခသည်စခန်း ထိခိုက်ပျက်စီး
ကယားပြည်နယ်၊ ဒီးမော့ဆိုမြို့နယ်အနောက်ခြမ်းက စစ်ဘေးဒုက္ခသည်စခန်းထဲကို ဇွန်လ ၁၀ ရက်နေ့ညက လက်နက်ကြီးကျည် ကျရောက်ပေါက်ကွဲခဲ့ပါတယ်။
-
RFA Burmese
2023-06-11 -
-
-
ကယားပြည်နယ်၊ ဒီးမော့ဆိုမြို့နယ်အနောက်ခြမ်းက စစ်ဘေးဒုက္ခသည်စခန်းထဲကို ဇွန်လ ၁၀ ရက်နေ့ညက လက်နက်ကြီးကျည် ကျရောက်ပေါက်ကွဲခဲ့တာကြောင့် စစ်ဘေးဒုက္ခသည် တဲတစ်လုံးပျက်စီးပြီး စစ်ဘေးဒုက္ခသည်တချို့လည်း ထွက်ပြေးခဲ့ရတယ်လို့ ဒေသခံတွေက ပြောပါတယ်။
စစ်ဘေးဒုက္ခသည်တွေနေတဲ့ တဲတစ်လုံး ပျက်စီးခဲ့ပေမယ့် လူတွေတော့ ထိခိုက်တာ မရှိဘူးလို့ လုံခြုံရေးအရ အမည်မဖော်လိုတဲ့ ဒေသခံတစ်ဦးက RFA ကို ပြောပါတယ်။
“မနေ့ည ၇ နာရီ ၁၅ မိနစ်လောက်ရှိမယ်။ နှစ်လုံး ကွဲတာပါ။ စစ်ရှောင်တဲတော့ ပျက်စီးသွားတယ်ဗျ။ လူတော့ ထိခိုက်မှုမရှိဘူး”
လက်နက်ကြီးကျည် ကျရောက်ပေါက်ကွဲတာကြောင့် စစ်ဘေးဒုက္ခသည်တချို့ ကြောက်လန့်ပြီး ဘေးလွတ်ရာ ထပ်မံထွက်ပြေးခဲ့ရသလို ခဏခဏပြေးနေရတာမို့လို့ ဘယ်မှမပြေးတဲ့ သူတွေလည်းရှိတယ်လို့ဆိုပါတယ်။
အဲဒီလက်နက်ကြီးကို စစ်ဘေးဒုက္ခသည်စခန်းတွေနဲ့ အနီးဆုံးမှာရှိနေတဲ့ စစ်ကောင်စီရဲ့ တပ်မ (၄၂၇) နဲ့ (၁၀၂) က ပစ်တာဖြစ်နိုင်တယ်လို့ ဒေသခံတွေက ပြောပေမယ့် RFA အနေနဲ့ သီးခြားအတည်မပြုနိုင်သေးပါဘူး။
လက်နက်ကြီးကျည် ကျရောက်ပေါက်တဲ့နေရာမှာ စစ်ဘေးဒုက္ခသည်တွေ နေထိုင်တဲ့ တဲ ၅၀ ဝန်းကျင်ရှိတယ်လို့ ဒေသခံတွေက ပြောပါတယ်။
ဒီကိစ္စနဲ့ပတ်သက်ပြီး စစ်ကောင်စီရဲ့ ကယားပြည်နယ် ပြောခွင့်ရသူကို RFA က ဖုန်းနဲ့ဆက်သွယ်မေးမြန်းခဲ့ပေမယ့် လက်ခံဖြေကြားခြင်း မရှိပါဘူး။
ကုလသမဂ္ဂ လူသားချင်းစာနာမှုဆိုင်ရာ ပေါင်းစပ်ညှိနှိုင်းရေးမှူးရုံး (UNOCHA) ရဲ့ စာရင်းအရ စစ်တပ်အာဏာသိမ်းပြီးနောက်ပိုင်း အရပ်သားတွေရဲ့ နေအိမ်အဆောက်အအုံ ၆၀,၀၀၀ ကျော် မီးလောင်ပျက်စီးခဲ့ပြီး အရပ်သား ၁ ဒသမ ၈ သန်း အိုးအိမ်စွန့်ခွာ ထွက်ပြေးနေရပါတယ်။