The Lady ရုပ်ရှင်ကား ရောမ ရုပ်ရှင်ပွဲတော်မှာ စတင်ပြသ
အီတလီနိုင်ငံ ရောမမြို့မှာ ကျင်းပတဲ့ (၆) ကြိမ်မြောက် ရောမရုပ်ရှင်ပွဲတော် ကို မြန်မာ့ဒီမိုကရေစီ ခေါင်းဆောင် ဒေါ်အောင်ဆန်းစုကြည်ရဲ့ ဘဝ ဇာတ်ကြောင်းကို ရိုက်ကူးထားတဲ့ "They Lady" ရုပ်ရှင်ကားနဲ့ မနေ့က စတင် ဖွင့်လှစ်လိုက်ပါတယ်။
-
2011-10-28 -
-
-
ပွဲတော်ဖွင့်ပွဲ အခမ်းအနားကို ဒေါ်အောင်ဆန်းစုကြည်ကလည်း သဝဏ်လွှာတစောင် ပေးပို့ခဲ့ပါတယ်။ အဲဒီ သဝဏ်လွှာမှာ ဒေါ်အောင်ဆန်းစုကြည်က... ‘အမှန်တရား၊ တရားမျှတမှုနဲ့ ညီညွတ်မှု’ ဆိုတာတွေဟာ အာဏာတွေရဲ့ရက်စက် ကြမ်းကြုတ်မှုနဲ့ မိမိတို့ ပြည်သူတွေ အကြားမှာ ခိုင်ခိုင်မာမာ စည်းခြားထားတဲ့ ခံတပ်ကြီးတွေ ဖြစ်တာကြောင့် ဒါတွေကို ဘယ်တော့မှာ လက်လွှတ်လို့ မရနိုင်ကြောင်း ရေးသားထားပါတယ်။
ဒီဇာတ်ကား ရိုက်ကူးသူ ပြင်သစ်လူမျိုးဒါရိုက်တာ Luc Besson က မနေ့က ပွဲတော်ဖွင့်ပွဲ မတိုင်ခင် သတင်းထောက်တွေကို ပြောရာမှာ... “ ဒီရုပ်ရှင်အတွက် ဇာတ်ညွန်းကို ဖတ်လိုက်ရတဲ့အချိန်မှာ သူ မျက်ရည်ကျတဲ့အထိ ကြိုက်နှစ်သက်ခဲ့ရကြောင်း၊ ဒါကြောင့် ဒီ ဇာတ်ကား ရိုက်ကူးခွင့် လက်လွှတ်သွားမှာ စိုးတဲ့အတွက် နောက်ထပ် တနှစ်ခွဲအတွင်း သူ လက်ခံထားတဲ့ တခြားအလုပ်တွေ အားလုံးကို ဖျက်သိမ်းခဲ့တယ်” လို့ ပြောပါတယ်။
မင်းသမီး Michelle Yeoh ကလည်း ပွဲတော်အခမ်းအနားမှာ The Lady ရုပ်ရှင်ကားနဲ့ ပတ်သက်ပြီး... “အမှန်အတိုင်း ပြောရရင် ‘ဒေါ်စု’ နေရာမှာ သရုပ်ဆောင်ရ မယ်ဆိုတော့ ကျမ အင်မတန်ကို စိုးရိမ်မိပါတယ်၊ ဘာဖြစ်လို့လဲဆိုတော့ ဒေါ်စုဟာ မြန်မာပြည်သူတွေ တင်မကဘဲ ကမ္ဘာပေါ်က အဖိနှိပ်ခံပြည်သူတွေကို ကိုယ်စားပြုပြီး အများက လေးစားချစ်ခင်တဲ့ ခေါင်းဆောင်တယောက် ဖြစ်တာကြောင့်ပါပဲ” လို့ ပြောသွားပါတယ်။
အခုကျင်းပနေတဲ့ (၆) ကြိမ်မြောက် ရောမရုပ်ရှင်ပွဲတော်မှာ ပြိုင်ပွဲဝင် ရုပ်ရှင်ဇာတ်ကား ၁၅ ခု ထဲကနေ The Lady ရုပ်ရှင်ကားနဲ့ စတင် ဖွင့်လှစ်ဖို့ ရွေးချယ်ခဲ့တာ ဖြစ်ပါတယ်။