ဈေးသည်များအား NLD ၏ အတိုးမဲ့ ချေးငွေအစီအစဉ် အောင်မြင်နေ

• 
  2011-03-08

လူထုခေါင်းဆောင် ဒေါ်အောင်ဆန်းစုကြည်ရဲ့ အကြံပေးချက်အရ ၊ ရန်ကုန်တိုင်း တာမွေမြို့နယ် ရာပြည့်ဈေးက ခေါင်းရွက်ဗျတ်ထိုး ဈေးသည် အယောက် ၅၀ ကို တယောက်အတွက် တလကို ကျပ် ၂ သောင်း ထုတ်ချေးပေးနေတာ ဖြစ်ပါတယ်။

ပြီးခဲ့တဲ့ ဇန်နဝါရီလမှာ ပြုလုပ်ခဲ့တဲ့ ထောင်ထဲမှာ ကွယ်လွန်သူ လွှတ်တော်ကိုယ်စားလှယ် ဦးတင်မောင်ဝင်းရဲ့ အနှစ်နှစ်ဆယ်ပြည့် အခမ်းအနားကို ဒေါ်အောင်ဆန်းစုကြည် သွားရောက် အားပေးခဲ့တုန်းက အမျိုးသမီးတွေနဲ့ တွေ့ခဲ့ပြီး၊ သူတို့ရဲ့ နေ့စဉ်ဘဝ အခက်အခဲတွေ ကြားသိခဲ့ရလို့ ကူညီဖို့ စဉ်းစားခဲ့တာလို့ ဆိုပါတယ်။

အဲဒီနောက် ဈေးသည်တွေကို ဒေါ်အောင်ဆန်းစုကြည် တွေ့ဆုံပြီး ငွေချေးတဲ့အစီအစဉ်ကို ဖေဖော်ဝါရီလ ၁ ရက်နေ့က စတင်ခဲ့တာပါ။ အခု တလကုန်လို့ ပြန်လည် သုံးသပ်တဲ့အခါ ငွေချေးတဲ့ ဈေးသည်တွေက အားလုံးကို ပြန်ဆပ်တာ တွေ့ရတယ်လို့ သိရပါတယ်။

ဒါကြောင့် အခုနောက်ထပ် တလအတွက် ငွေထုတ်ချေးပေးနေပြီး၊ ဒီအစီအစဉ်ကို စုစုပေါင်း ၆ လ စမ်းသပ်မယ်လို့ ဆိုပါတယ်။ အောင်မြင်ရင် ဒီထက်ပို ပြီး နေရာ တော်တော်များများမှာ ချေးပေးနိုင်ဖို့ ကြိုးစားမယ်လို့ ပြောပါတယ်။

ဒီ အစီအစဉ်နဲ့ ပတ်သက်လို့ ပါတီရဲ့ ဗဟို အလုပ်အမှုဆောင် အဖွဲ့ဝင် ဒေါက်တာ မေဝင်းမြင့်ကို RFA ဝိုင်းတော်သား ကိုနေရိန်ကျော်က ဆက်သွယ် မေးမြန်းထားပါတယ်။