အာဏာသိမ်း သုံးနှစ်အတွင်း လူ ၄၅၀၀ နီးပါး သေဆုံးခဲ့

• RFA Burmese
  2024-02-01

အာဏာသိမ်း သုံးနှစ်အတွင်း စစ်ကောင်စီရဲ့ လက်အောက်ခံတပ်ဖွဲ့တွေကြောင့် ပြည်သူပေါင်း ၄၄၇၄ ဦး သေဆုံးခဲ့ရတယ်လို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) က ဖေဖော်ဝါရီလ ၁ ရက်မှာ ထုတ်ပြန်ပါတယ်။

အာဏာသိမ်းတဲ့ ၂၀၂၁ ခုနှစ် ဖေဖော်ဝါရီလ ၁ ရက်နေ့ကနေ သုံးနှစ်ပြည့်တဲ့ ၂၀၂၄ ခုနှစ် ဖေဖော်ဝါရီ ၁ ရက်နေ့အတွင်း စာရင်းတွေကို AAPP က ထုတ်ပြန်ထားတာပါ။

သုံးနှစ်အတွင်း ဖမ်းဆီးခံရသူပေါင်း ၂၅၉၄၀ ဦး ရှိခဲ့ပြီး အဲဒီထဲက ၂၀၀၀၂ ဦးဟာ ဖမ်းဆီးခံထားရဆဲ ဖြစ်တယ်လို့ AAPP က ဖော်ပြပါတယ်။

ဖမ်းခံထားရဆဲသူတွေထဲမှာ ၈၆၇၉ ဦးဟာ ထောင်ဒဏ်ချမှတ်ခံထားရတယ်လို့ ဆိုပါတယ်။

သေဒဏ်ချခံထားရသူတွေဟာလည်း ၁၆၂ ဦးရှိနေပြီး အဲဒီထဲက ၄၃ ဦးဟာ မျက်ကွယ်ပြစ်ဒဏ် ချခံခဲ့ရတယ်လို့ AAPP က ရေးသားထားပါတယ်။

စစ်ကောင်စီ ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်ကတော့ PDF အဖွဲ့တွေရဲ့ တိုက်ခိုက်မှုတွေကြောင့် ၂၀၂၁ ဖေဖော်ဝါရီလ ၁ ရက်နေ့ကနေ ၂၀၂၄ ဇန်နဝါရီ ၂၉ နေ့အထိ နိုင်ငံတစ်ဝန်းမှာ ရဟန်း၊ သီလရှင်၊ အပြစ်မဲ့ပြည်သူနဲ့ နိုင်ငံဝန်ထမ်းပေါင်း ၆၈၈၀ ဦး သေဆုံးခဲ့ရပြီး အဲဒီအထဲက အပြစ်မဲ့ ပြည်သူဦးရေက ၅၆၇၇ ဦးအထိရှိခဲ့တယ်လို့ ဇန်နဝါရီ ၃၁ ရက်နေ့က ပြုလုပ်တဲ့ အမျိုးသားကာကွယ်ရေးနဲ့ လုံခြုံရေးကောင်စီ အစည်းအဝေးမှာ ပြောဆိုခဲ့ပါတယ်။