တပ်ကို လွှတ်တော်ကဖယ်ထုတ်ရင် ဆိုးကျိုးကြုံနိုင်ဟု တပ်အမတ် ပြော
တပ်မတော်သား ကိုယ်စားလှယ်တွေကို လွှတ်တော်သက်တမ်းအလိုက် တစ်ဖြည်းဖြည်းချင်း လျှော့ချသွားမယ်ဆိုရင်၊ မလိုလားအပ်တဲ့ ဘေးထွက်ဆိုးကျိုးတွေ ဖြစ်လာနိုင်တယ်လို့ တပ်မတော်သား ကိုယ်စားလှယ် ဗိုလ်မှူး ထက်လင်းက မနေ့က လွှတ်တော်အတွင်း သတိပေးသွားပြီး၊ သူ့ရဲ့သတိပေးချက်ကို တပ်ပိုင် မြဝတီသတင်းစာ ရှေ့မျက်နှာဖုံးမှာ ဒီကနေ့ ထပ်မံဖော်ပြလိုက်ပါတယ်။
-
သက်စုအောင်၊ သီဟထွန်း
2020-02-26 -
-
-
တပ်မတော်သား ကိုယ်စားလှယ်တွေကို လွှတ်တော်သက်တမ်းအလိုက် တစ်ဖြည်းဖြည်းချင်း လျှော့ချသွားမယ် ဆိုရင်၊ မလိုလားအပ်တဲ့ ဘေးထွက်ဆိုးကျိုးတွေ ဖြစ်လာနိုင်တယ်လို့ တပ်မတော်သား ကိုယ်စားလှယ် ဗိုလ်မှူး ထက်လင်းက မနေ့က လွှတ်တော်အတွင်း သတိပေးသွားပြီး၊ သူ့ရဲ့သတိပေးချက်ကို တပ်ပိုင် မြဝတီသတင်းစာ ရှေ့မျက်နှာဖုံးမှာ ဒီကနေ့ ထပ်မံဖော်ပြလိုက်ပါတယ်။
ဒီပြောဆိုချက်တွေအပေါ် နိုင်ငံရေးပါတီအသီးသီးက ကိုယ်စားလှယ်တွေရဲ့ မတူညီတဲ့ အမြင်သဘောထားတွေကို RFA သတင်းထောက် မသက်စုအောင်က စုစည်းတင်ပြထားပါတယ်။
မနေ့က လွှတ်တော်အတွင်း ပုဒ်မ-၁၄ နဲ့ပတ်သက်ပြီး ဆွေးနွေးရာမှာ တပ်မတော်သား ကိုယ်စားလှယ်ဖြစ်တဲ့ ဗိုလ်မှူး ထက်လင်းက “အခုလို ဒီမိုကရေစီ သက်တမ်းနုချိန်မှာ တိုင်းပြည်အနေနဲ့ ၁၉၆၂ နဲ့ ၁၉၈၈ တုန်းကလို နိုင်ငံတော်ပြိုကွဲလုနီးပါး အခြေအနေဆိုးတွေ၊ မကျရောက်အောင် ထိန်းသိမ်းဖို့လိုတယ်” လို့ အရင်ဆုံး သတိပေးသွားပါတယ်။
တပ်မတော်သား ကိုယ်စားလှယ်တွေ လက်ရှိလွှတ်တော်ထဲမှာ ပါဝင်နေရတာဟာ နိုင်ငံတော်ရဲ့ အမျိုးသား အကျိုးစီးပွားကို ကာကွယ်ဖို့ဖြစ်တယ်လို့လည်း ဗိုလ်မှူး ထက်လင်းက ပြောပါတယ်။
သူ့ရဲ့တင်ပြချက်နောက်ဆုံးမှာ ဗိုလ်မှူး ထက်လင်းက “အခုလို အခြေအနေမျိုးမှာ တပ်ကိုယ်စားလှယ်တွေကို လွှတ်တော်သက်တမ်းအလိုက် လျှော့ချသွားမယ်ဆိုရင် မလိုလားအပ်တဲ့ ဘေးထွက်ဆိုးကျိုးတွေ ဖြစ်လာနိုင်တယ်” ဆိုပြီး တပ်မတော်က အာဏာသိမ်းနိုင်တဲ့ပုံစံမျိုး ရည်ညွှန်းပြောဆိုသွားပါတယ်။
“မြန်မာနိုင်ငံ နောက်ခံသမိုင်းအရ ၁၉၄၉၊ ၁၉၅၈၊ ၁၉၆၂ နဲ့ ၁၉၈၈ တို့လို နိုင်ငံတော်ပြိုကွဲလုနီးပါး အခြေအနေ ဆိုးများ မကျရောက်ဖို့၊ ဒီမိုကရေစီသက်တမ်း နုစဉ်ကာလတွင် ထိန်းသိမ်းဆောင်ရွက်နိုင်ရေးဟာ လွန်စွာအရေး ကြီးလှပါတယ်။ အခုလို အသွင်ကူးပြောင်းရေးကာလမှာ နိုင်ငံတော်ရဲ့ အမျိုးသား အကျိုးစီးပွားအတွက် ရည်ရွယ်ပြီး ဥပဒေပြုလွှတ်တော်များမှာ တပ်မတော်သား လွှတ်တော်ကိုယ်စားလှယ်များကို အချိုးကျပါဝင် စေရန် ပြဋ္ဌာန်းထားခြင်းဖြစ်ပါတယ်။ လက်ရှိကာလမှာ မိမိတို့နိုင်ငံအနေနဲ့ ပြည်တွင်းငြိမ်းချမ်းရေးကို တည်ဆောက်နေချိန်ဖြစ်ပြီး ပြည်သူတွေ လိုလားတောင့်တနေတဲ့ ဒီမိုကရေစီ ဖက်ထရယ်စနစ်ကို အခြေခံတဲ့ ပြည်ထောင်စုစနစ်ကို တည်ဆောက်ဖို့ ကြိုးစားနေသလို တဖက်မှာလည်း ပြည်တွင်းရေးကို ဝင်ရောက်စွက်ဖက် ခြယ်လှယ်လိုတဲ့ ခေတ်သစ်ကိုလိုနီများနဲ့ လည်းကောင်းတို့ရဲ့ လက်ဝေခံပြည်တွင်း၊ ပြည်ပ ပုဆိန်ရိုးများကြောင့် နိုင်ငံတော်ရဲ့ အချုပ်အခြာအာဏာ ပြန်လည်မဆုံးရှုံးရလေအောင် ဆောင်ရွက်နေရတဲ့ အခြေအနေဖြစ်ပါတယ်၊ ဒီလိုအခြေအနေမျိုးမှာ တပ်မတော်သား လွှတ်တော်ကိုယ်စားလှယ်တွေကို လျော့ချလိုက်မယ်ဆိုပါက မလိုလားအပ်တဲ့ ဘေးထွက်ဆိုးကျိုးတွေ ဖြစ်ပေါ်လာနိုင်ပါတယ်”
၂၀၀၈ ဖွဲ့စည်းပုံအခြေခံဥပဒေ ပုဒ်မ ၁၄ ရဲ့ မူလပြဌာန်းချက်မှာ၊ ဥပဒေပြုလွှတ်တော်အသီးသီးမှာ တပ်မတော်သား ကိုယ်စားလှယ်တွေ ပါဝင်ဖို့ ပြဋ္ဌာန်းထားပါတယ်။
အန်အယ်လ်ဒီ ဦးဆောင်တင်သွင်းတဲ့ မူကြမ်းမှာတော့ လက်ရှိလွှတ်တော်ထဲမှာရှိနေတဲ့ တပ်မတော်သား ၂၅% ကို လွှတ်တော်သက်တမ်း သုံးကြိမ်အတွင်းမှာ ၅% အထိ တဖြည်းဖြည်းချင်း လျှော့ချသွားဖို့ ပြင်ဆင်ထားပါတယ်။
ဒီအတွက် ဗိုလ်မှူး ထက်လင်းက ၁၉၆၂ နဲ့ ၁၉၈၈ လို နိုင်ငံပြိုကွဲမယ့် အန္တရာယ်နဲ့ ရင်ဆိုင်ရနိုင်တယ်လို့ သတိပေးဆွေးနွေးသွားတာပါ။
အန်အယ်လ်ဒီပါတီ ပြောခွင့်ရပုဂ္ဂိုလ် ဒေါက်တာ မျိုးညွန့်ကတော့ အန်အယ်လ်ဒီဟာ လူထုကို လမ်းပေါ်ဆွဲတင်တဲ့ နိုင်ငံရေးရည်မှန်းချက်မျိုးကို ဘယ်တော့မှ မလုပ်ဘူးလို့ တုံ့ပြန်ပါတယ်။
လက်ရှိ အင်အားကြီး အတိုက်အခံပါတီဖြစ်တဲ့ ပြည်ထောင်စုကြံ့ခိုင်ရေးနဲ့ ဖွံ့ဖြိုးရေးပါတီက လွှတ်တော်အစု အဖွဲ့ခေါင်းဆောင် ဦးသောင်းအေး ကတော့ တပ်မတော်သား ကိုယ်စားလှယ် ဗိုလ်မှူး ထက်လင်းရဲ့ တက်ပြချက်ကို ထောက်ခံထားပြီး၊ နိုင်ငံမှာ လက်နက်ကိုင်သောင်းကျန်းမှုတွေ ရှိနေသမျ တပ်မတော်ဟာ လွှတ်တော်ထဲမှာ ရှိကို ရှိနေရမယ်လို့ မှတ်ချက်ပေး ပြောဆိုပါတယ်။
“နိုင်ငံထဲမှာ လက်နက်ကိုင်သောင်းကျန်းမှုတွေနဲ့ နိုင်ငံရေး မတည်ငြိမ်မှုတွေရှိနေသမျှ ဒီတပ်မတော်က ရှိနေ ရမှာပဲ။ ပါဝင်နေရမှာပဲ။ အဲဒီဟာတွေ ဒီနေ့ အေးချမ်းသွားရင် ဒီနေ့ တပ်မတော်ဟာ ဒီလွှတ်တော်ထဲကနေ နုတ်ပယ်သွားရမှာပဲ။ အဲတော့ အဲဒါမဟုတ်သရွေ့ကတော့ ခုနဒါကို အချိန်ကာလနဲ့ သတ်မှတ်ပြီးတော့ နောက်ငါးနှစ်မှာ ဘယ်လိုလုပ်မယ်။ နောက်ငါးနှစ်မှာ ဘယ်လိုလုပ်မယ်ဆိုတဲ့ တွက်ဆမှုများကတော့ ဘယ်လို အတွေးအခေါ်နဲ့ ဘယ်လိုမျှော်မှန်းပြီးတော့ သုံးသပ်ပြီးတော့ လုပ်ထားတယ်ဆိုတာတော့ ပြန်လည်မေးမြန်း ရမယ့် မေးခွန်းပဲဖြစ်ပါတယ်”
SNLD-ကျားခေါင်းပါတီက ပြည်သူ့လွှတ်တော် ကိုယ်စားလှယ်တစ်ဦးဖြစ်တဲ့ ဦးစိုင်းထွန်းအေးကတော့ တပ်မတော်ဟာ တပ်မတော်နဲ့ဆိုင်တဲ့အလုပ်ပဲ လုပ်ရမယ်လို့ ဆိုပါတယ်။ တပ်မတော်ဘက်က ပုဒ်မ ၁၄ ကို ကန့်ကွက်တာဟာ စိုးရိမ်စိတ်ကြောင့်ဖြစ်နိုင်တယ်လို့ အမြင်သဘောထားပေးပါတယ်။
ရခိုင်ပြည်နယ်ကိုယ်စားပြု ပြည်ထောင်စုလွှတ်တော် ကိုယ်စားလှယ်တစ်ဦးဖြစ်တဲ့ ဒေါ်ထုမေကတော့ ဖွဲ့စည်းပုံ ပြင်ဆင်ရေးမှာ တပ်မတော်နဲ့ပတ်သက်တဲ့ ပုဒ်မတစ်စုံတစ်ရာကို ဆွေးနွေးပြီဆိုရင် ပြင်းပြင်းထန်ထန် တုံ့ပြန်လေ့ရှိတယ်လို့ ဝေဖန်ပါတယ်။
ဗိုလ်မှူး ထက်လင်းရဲ့ သတိပေးချက်နဲ့ပတ်သက်ပြီး အမြင်သဘောထားပေးဖို့ ဦးသိန်းစိန် အစိုးရလက်ထက် သမ္မတ ရုံးဝန်ကြီးအဖြစ် တာဝန်ယူခဲ့ဖူးပြီး၊ လက်ရှိလွှတ်တော်ထဲမှာ တစ်သီးပုဂ္ဂလ အမတ်တစ်ဦးဖြစ်တဲ့ ဦးစိုးသိန်းကို အာအက်ဖ်အေက မေးမြန်းရာမှာတော့၊ တပ်မတော်က အာဏာမသိမ်းချင်လို့ လွှတ်တော်ထဲမှာ ငြင်းခုန်ခိုင်းနေတာလို့ ဆိုပါတယ်။
ပြည်ထောင်စုလွှတ်တော်မှာ ဖွဲ့စည်းပုံပြင်ဆင်ရေးဆွေးနွေးဖို့ စုစုပေါင်း ခုနှစ်ရက် သတ်မှတ်ထားပြီး လွှတ်တော် အမတ် ၁၄၉ ဦး ငြင်းခုန်ဆွေးနွေးကြမှာပါ။ ဒီကနေ့ထိ နှစ်ရက်ကြာအတွင်း လွှတ်တော်ကိုယ်စားလှယ် ၃၄ ဦး ဆွေးနွေးခဲ့ပြီး၊ ပထမနေ့ကတည်းက တစ်ဘက်နဲ့ တစ်ဘက် အော်ဟစ်ငြင်းခုန်တာတွေ လုပ်ခဲ့ကြပါတယ်။