ကျူးကျော်ရပ်ကွက် အဖျက်မခံ ရအောင် လွှတ်တော် ကိုယ်စားလှယ် တာဝန်ယူမယ်

"ဘူဒိုဇာနဲ့ထိုးပြီးတော့ ဖြိုတဲ့ကိစ္စကို နောက်တစ်ကြိမ် ဘယ်လိုနည်းနဲ့မှ ဖျက်ဆီးမှု မရှိစေရပါဘူးလို့ အဲဒါလည်း သူတာဝန်ယူသွားတယ်၊ လိုအပ်ရင် နိုင်ငံထဲမှာရှိတဲ့မြေတွေဟာ အစိုးရက တစ်ခုခုကိစ္စကြောင့် လိုအပ်တယ် ဆိုရင် သိမ်းယူပြီး ပြုလုပ်လို့ရတယ်၊ သို့သော် ဒီလို ဘူဒိုဇာနဲ့ထိုးပြီး အကြမ်းဖက် ပြီးတော့ပေါ့နော် အားလုံးကို အခုထွက်ဆိုပြီးတော့ပေါ့နော်၊ အဲလိုမျိုး သူတို့ဘယ်တော့မှ မလုပ်ပါဘူးလို့ တာဝန်ယူသွားတယ်။ "

ဒါ့အပြင် စံသမာဓိရပ်ကွက်ဟာ ပြည်ထဲရေးမှာ နာမည်ပေါက် မဟုတ်တာကြောင့် တရားဥပဒေစိုးမိုးမှု မရှိမှာကို ဒေသခံတွေက စိုးရိမ်နေကြသလို အလုပ်လျှောက်ရာမှာ လိုအပ်တဲ့ ရပ်ကွက်ထောက်ခံစာရယူဖို့ အခက်အခဲတွေ ဖြစ်နေတယ်လို့လည်း ပြောပါတယ်။

အဲဒီရပ်ကွက်မှာ အိမ်ခြေ ၁ ထောင်ကျော်ရှိပြီး လူဦးရေ ၄ ထောင်ကျော်ရှိပေမယ့် လျှပ်စစ်မီးမရရှိတာကြောင့် အခက်အခဲဖြစ်နေတာကိုလည်း တာဝန်ရှိသူတွေနဲ့ တွေ့ဆုံပြီး ညှိနှိုင်းပေးမယ့်အကြောင်း ဦးအောင်လှိုင်ဝင်း က ပြောကြားခဲ့တယ်လို့ ဒေသခံတွေက ပြောပါတယ်။

အရင်အစိုးရလက်ထက် ပြီးခဲ့တဲ့ ဇန်နဝါရီလက စံသမာဓိရပ်ကွက်ကို မြေထိုးစက်တွေနဲ့ အင်အားသုံး ဖျက်ဆီးခဲ့တာဖြစ်ပါတယ်။

အဲ့ဒီမြေနေရာဟာ ၁၉၈၈ ခုနှစ်မတိုင်ခင်က မွေးမြူရေးနဲ့ ရေလုပ်ငန်းဦးစီးဌာနက နို့စားနွားမွေးမြူရေးလုပ်ငန်း စားကျက်မြေအဖြစ် အသုံးပြုခဲ့တာဖြစ်ပြီး နောက်ပိုင်းမှာ မြေလွတ်မြေရိုင်းဖြစ်နေတဲ့အတွက် နေအိမ်တွေ ဆောက် လုပ်ပြီး ဝင်ရောက်နေထိုင်ကြတာဖြစ်ပါတယ်။

လွန်ခဲ့တဲ့ နှစ်ပေါင်း ၃၀ လောက်ကတည်းက နေထိုင်ခဲ့ကြသူတွေရှိသလို နာဂစ်လေမုန်တိုင်း ဖြစ်ပြီးနောက်ပိုင်း ဧရာဝတီတိုင်းနဲ့ ပဲခူးတိုင်းဘက်က ပြောင်းရွှေ့လာကြသူတွေလည်း ရှိတယ်လို့ သိရပါတယ်။