ဒဂုံမြို့သစ် ရပ်ကွက်တခုမှာ မွတ်စလင်တွေဝတ်ပြုခွင့် ပိတ်ပင်ခံရ

• 
  2019-05-15

ရန်ကုန်တိုင်း ဒဂုံမြို့သစ်တောင်ပိုင်း၊ အမှတ်၂၆ ရပ်ကွက်မှာ အစ္စလမ်ဘာသာဝင်တွေကို ဥပုသ်လအတွင်း ဝတ်ပြုဖို့ အတွက် ရန်ကုန်တိုင်းအစိုးရ ခွင့်ပြုထားတဲ့ နေရာတခုကို မနေ့ညပိုင်းမှာ အမျိုးသားရေးညီအစ်ကိုမောင်နှမများဆိုတဲ့ လူအုပ်စုတစုက လာရောက် တားမြစ်ခဲ့ပြီးနောက် သက်ဆိုင်ရာ ရပ်ကွက်အုပ်ချုပ်ရေးမှူးက ပိတ်ပင်လိုက်တယ်လို့ သတင်းရရှိပါတယ်။

အဲဒီနေရာကို လာရောက်ပိတ်ပင်သူ နှစ်ရာဝန်းကျင်လောက်ရှိပြီး၊ အဲဒီလူစုက ကားတစ်စီးကို ခဲနဲဝိုင်းပြီးထုခဲ့သလို အဲဒီကား အတင်းမောင်းပြီး ထွက်ပြေးသွားတာကို တွေ့လိုက်ရတယ်လို့ မျက်မြင်သက်သေတဦးက RFA ကို ပြောပြပါတယ်။ ည ၁ နာရီကျော်အထိ ရဲတပ်ဖွဲ့က လာရောက် လုံခြုံရေးယူတာ မရှိသေးဘူးလို့လည်း ပြောပါတယ်။

မြန်မာနိုင်ငံ အစ္စလာမ်ဘာသာရေးအဖွဲ့က ဦးဇော်မင်းလတ်က တောင်ဒဂုံမြို့နယ်မှာ အစ္စလာမ်ဘာသာဝင်တွေရဲ့ ဥပုသ်လအတွင်း ဝတ်ပြုဖို့်အတွက် နေရာ ၁၆ နေရာကို ခွင့်ပြုချက်ပေးဖို့ ရန်ကုန်တိုင်းအစိုးရအဖွဲ့ကို လျှောက်ထားခဲ့ရာမှာ ၃ နေရာ ခွင့်ပြုချက်ရခဲ့ပြီး အဲဒီနေရာတွေထဲက အမှတ် ၂၆ ရပ်ကွက်က ယောက်ကော်ဝတ်ပြု အဆောက်အအုံကို ဘယ်ကမှန်း မသိရတဲ့ လူ ၂ဝဝ လောက် ရောက်လာပြီး ပိတ်ပစ်ဖို့ တောင်းဆိုပြီးနောက်မှာ ရပ်ကွက် ဥက္ကဋ္ဌက နှုတ်မိန့်နဲ့ ဝတ်ပြုခွင့်ကို ပိတ်လိုက်တာဖြစ်ကြောင်း ခေတ်သစ်မီဒီယာကို ပြောဆိုတယ်လို့ သိရပါတယ်။