မြန်မာမှာ ဒေသခံ ကိုးဦး ဖမ်းဆီးခံထားရကြောင်း ဟောင်ကောင် အစိုးရပြော

• RFA Burmese
  2025-01-26

မြန်မာနိုင်ငံက ကျားဖြန့်ဂိုဏ်းတွေမှာ ဟောင်ကောင်ဒေသခံ ကိုးဦး ဖမ်းဆီးခံထားရဆဲဖြစ်တယ်လို့ ဟောင်ကောင် လုံခြုံရေးအကြီးအကဲ Chris Tang ကပြောကြောင်း Hong Kong Free Press က ဇန်နဝါရီ ၂၇ ရက် ဒီနေ့ဖော်ပြပါတယ်။

ထိုင်းနိုင်ငံကတစ်ဆင့် လူကုန်ကူးခံရပြီး ကယ်တင်ဖို့ကျန်ရှိနေတဲ့ ဟောင်ကောင်ဒေသခံ ဆယ်ဦးမှာ ကိုးဦးက မြန်မာနိုင်ငံမှာဖြစ်ပြီး နောက်ထပ် တစ်ဦးက ကမ္ဘောဒီးယားနိုင်ငံမှာ ရှိနေတယ်လို့ ဆိုပါတယ်။

လက်ရှိမှာ အဲဒီဆယ်ဦးလုံးနဲ့ အဆက်အသွယ်ရရှိထားပြီး အမြန်ဆုံးပြန်လည်ခေါ်ယူနိုင်ဖို့ သက်ဆိုင်ရာနိုင်ငံတွေက အာဏာပိုင်တွေနဲ့ ဆောင်ရွက်နေတယ်လို့ Chris Tang က ပြောပါတယ်။

မြန်မာနိုင်ငံ ကျားဖြန့်ဂိုဏ်းတစ်ခုက ပြန်လည်ကယ်တင်နိုင်ခဲ့တဲ့ ဟောင်ကောင်ဒေသခံတစ်ဦးဟာလည်း ဒီနေ့ ဟောင်ကောင်ကို ပြန်ရောက်မယ်လို့ Hong Kong Free Press က ဖော်ပြပါတယ်။

မြန်မာနိုင်ငံကနေ လွန်ခဲ့တဲ့ သီတင်းပတ်က ကယ်တင်နိုင်ခဲ့တဲ့ အသက် ၂၉ နှစ်အရွယ် အဲဒီဒေသခံအမျိုးသားကို ဟောင်ကောင် လုံခြုံရေးဗျူရိုရဲ့ အထူးတပ်ဖွဲ့က ထိုင်းနိုင်ငံ ထိန်းသိမ်းရေးစခန်းမှာ ဇန်နဝါရီ ၂၄ ရက်နေ့က တွေ့ ဆုံခဲ့တယ်လို့ ဆိုပါတယ်။

အခုလွတ်မြောက်လာသူဟာ မြန်မာနိုင်ငံက ကျားဖြန့်ဂိုဏ်းတစ်ခုမှာ လေးလကြာ ထိန်းသိမ်းခံရပြီးနောက် ပြန်လည်လွတ်မြောက်ခဲ့တာလို့ ဟောင်ကောင်လုံခြုံရေးအကြီးအကဲ Chris Tang က ပြောပါတယ်။

၂၀၂၄ ခုနှစ်အတွင်း ဟောင်ကောင်ဒေသခံ ၂၈ ဦးဟာ အရှေ့တောင်အာရှနိုင်ငံတွေကို လူကုန်ကူးခံရပြီး ၁၈ ဦးက တော့ နေရပ်ပြန်လာနိုင်ပြီလို့ ဆိုပါတယ်။

အခုလို ပြန်လွတ်လာတဲ့သူတွေဟာ ခြိမ်းခြောက်ငွေတောင်းခံတာတွေကို ပေးခဲ့ရသလားဆိုတာကိုတော့ ဟောင် ကောင်အစိုးရက အသေးစိတ် ပြောကြားခြင်းမရှိဘူးလို့ Hong Kong Free Press က ဖော်ပြထားပါတယ်။