ထိုင်းကပြန်လာမယ့် လုပ်သား နှစ်သောင်းကျော် မြဝတီမှာ စတင်လက်ခံ

• ကျော်လွင်ဦး
  2020-05-01

ထိုင်းနိုင်ငံကနေ မြန်မာပြည်ပြန်လာဖို့ စာရင်းပေးထားတဲ့ မြန်မာရွှေ့ပြောင်း လုပ်သား နှစ်သောင်း ကျော်ကို မြဝတီအမှတ်၂ တံတားကနေ ဒီနေ့ မေ ၁ ရက်နေ့မှာ စတင်လက်ခံနေပါပြီ။

ထိုင်း-မြန်မာနယ်စပ် ကရင်ပြည်နယ် မြဝတီအမှတ် ၂ တံတားကနေ ပြန်လည်ဝင်ရောက်လာသူ ဒီနေ့ အယောက် ၅၀ ကျော်ပဲရှိပါသေးတယ်။ ထိုင်းနိုင်ငံအတွင်း ခရိုင်တစ်ခုနဲ့ တစ်ခု သွားလာခွင့် ပိတ်ထားတာ၊ ညမထွက်ရအမိန့် တွေ ထုတ်ပြန်ထားတာ၊ ဘတ်စ်ကားဂိတ်တွေ ပြန်မဖွင့်သေးတာ စတဲ့ အခြေအနေတွေကြောင့် မြန်မာရွှေ့ပြောင်း အလုပ်သမားအများစု  ပြန်မလာနိုင်ကြသေးပါဘူး။

မြန်မာအလုပ်သမားတွေ စနစ်တကျပြန်လည်ဝင်ရောက်နိုင်ဖို့ ထိုင်းအစိုးရနဲ့ ညှိနှိုင်းဆောင်ရွက်နေတယ်လို့ ကရင်ပြည်နယ်အစိုးရအဖွဲ့ လူမှုရေးဝန်ကြီး ဦးဘိုဘိုဝေမောင်က ပြောပါတယ်။

“ပြန်လာဖို့က ဟိုဘက်က အမိန့်ထုတ်ပြန်ချက်လေးတွေကြောင့် အခက်ခဲရှိနေတာ၊ ကျနော်တို့ကတော့ ဒီဟာကိုဖြေလျှော့ပေးဖို့ ဟိုဘက်နဲ့ ဆွေးနွေးနေတယ်၊ စနစ်တကျ ပို့ဆောင်တာဖြစ်စေချင်တာပေါ့နော်၊ ကျနော်ဘက်ကိုလာတဲ့ ဘတ်စ်ကားဂိတ်တွေရှိတယ်၊ ထွက်တာကအစ စနစ်တကျ ကျနော်ဘက်က တစ်ရက် ၂၅၀၀ ပဲမှန်းတာကြောင့် စနစ်တကျ ဟိုဘက်ဒီဘက်ချိတ်ပြီးတော့ ပြန်လာဖို့ စီစဉ်ဆောင်ရွက်နေပါတယ်”

ထိုင်းနိုင်ငံမှာ ကိုရိုနာဗိုင်းရပ်စ်ကြောင့် စက်ရုံတွေပိတ်တာ၊ လုပ်သားအင်အား လျှော့ချတာတွေကြောင့် အလုပ်လက်မဲ့ဖြစ်သွားတဲ့ မြန်မာရွှေ့ပြောင်းလုပ်သားတွေဟာ စားသောက်နေထိုင်ဖို့ ခက်ခဲနေကြပါတယ်။

ပြီးခဲ့တဲ့ မတ်လအတွင်း မြဝတီနယ်စပ်ဂိတ်ကနေ မြန်မာအလုပ်သမား လေးသောင်းကျော် ဝင်ရောက်ခဲ့ပါတယ်။ အဲဒီနောက်မှာတော့ အစိုးရက ဧပြီလ ၁၅ ရက်နောက်ပိုင်းမှ ပြန်လာကြဖို့ မေတ္တာရပ်ခံခဲ့တာပါ။

ဧပြီလ ၁၅ ရက်မတိုင်ခင်မှာပဲ ပြန်လည်လက်ခံရေး နေရာတွေ၊ စောင့်ကြည့်ကန့်သတ်မယ့် နေရာတွေ ပြင်ဆင်ဖို့ဆိုပြီး ဧပြီလကုန်မှ ပြန်လာကြပါဆိုပြီး ထပ်မံကြေညာလိုက်ပါတယ်။

မြန်မာပြည်ကိုပြန်လာမယ်ဆိုရင် တရားဝင်ဖြစ်စေ၊ တရားမဝင် လုပ်သားတွေဖြစ်စေ စာရင်းပေးကြဖို့ဆိုပြီး ဘန်ကောက်မှာရှိတဲ့ မြန်မာသံရုံးက ထုတ်ပြန်ထားပါတယ်။

ဒီနေ့ကစလို့ ၃ ရက်အတွင်း လူနှစ်သောင်းကျော် ပြန်လာဖို့ ထိုင်းနိုင်ငံက မြန်မာသံရုံးကို စာရင်းပေးထားတယ်လို့ ဦးဘိုဘိုဝေမောင်က ပြောပါတယ်။

ထိုင်းနိုင်ငံက မြန်မာသံရုံး တာဝန်ရှိသူတွေ၊ အလုပ်သမား သံအရာရှိတွေဆီ RFA က ဆက်သွယ်မေးရာမှာတော့ လက်ခံဖြေကြားခြင်း မရှိပါဘူး။

မြန်မာလုပ်သားတွေ ပြန်လည်လက်ခံရေးလုပ်ငန်းစဉ်မှာ မြန်မာအစိုးရအနေနဲ့ ထိုင်းအစိုးရနဲ့ အကျေ အလည် ညှိနှိုင်းသင့်တယ်လု့ိ မြန်မာပြည်သားများအရေး ပူးတွဲလှုပ်ရှားမှုကော်မတီဥက္ကဌ ဦးမိုးကြိုးက ပြောပါတယ်။

“ထိုင်းဘက်ကနေ နယ်စပ်ဖြစ်တဲ့ မဲဆောက်အပါအဝင် တာ့ခ်ခရိုင်အတွင်းမှာ နေရပ်ပြန် အလုပ်သမားတွေ လွတ်လွတ်လပ်လပ် လှုပ်ရှားသွားလာနိုင်အောင် သူတို့ရဲ့ အရေးပေါ်ကာလ စည်းမျည်းစည်းကမ်းတွေကို ဖြေလျှော့ပေးဖို့အတွက် ထိုင်းဘက်ကို အကျေအလည်အပြေအလည် ညှိနှိုင်းသင့်တယ်”

မြန်မာလုပ်သားတွေကို ထိုင်းနိုင်ငံဘက်က အစားအသောက်ဝေတာ၊ ကျန်းမာရေးစစ်ဆေးပေးတာ မရှိဘူးလို့ အလုပ်သမားအရေး ဆောင်ရွက်သူတွေက ပြောပါတယ်။ ဒါကြောင့် မိသားစုရှိတဲ့ နေရပ်ကိုသာ ပြန်လာချင် နေကြတာဖြစ်ပါတယ်။

မြန်မာနိုင်ငံဘက်ကတော့ ပြန်လည်ဝင်ရောက်လာမယ့် နိုင်ငံသားတွေအတွက် ပြင်ဆင်ထားတယ်လို့ မြဝတီမြို့နယ် ပြည်နယ်လွှတ်တော် ကိုယ်စားလှယ် ဦးသန့်ဇင်အောင်က ပြောပါတယ်။

“မြဝတီမှာ Quanrantine စခန်း ၁၀ ခုကျော်လောက်ရှိပြီး အဲမှာ လူဦးရေ နှစ်ထောင်လောက် ထားတာပေါ့၊ သက်ဆိုင်ရာ အစိုးရအဖွဲ့တွေနဲ့လည်း ဝန်ကြီးချုပ်ကိုယ်တိုင် ချိတ်ဆက်ပြီး သက်ဆိုင်ရာနေရာမှာ Quanrantine တွေထားနိုင်အောင် စီစဉ်ထားပါတယ်၊ အဓိက ကျနော်တို့ ကြိုတင်ပြင်ဆင်တာကတော့ တကယ်လို့ သူဒေသက လာကြိုဖို့နောက်ကျတဲ့အခါမှာ မြဝတီတို့၊ ဘားအံတို့မှာပဲ ထားမယ်ပေါ့၊ အဓိကတော့ သက်ဆိုင်ရာ တိုင်းနဲ့ ပြည်နယ်အသီးသီးရှိ အစိုးရတွေက လာကြိုရင် တော်တော်လေး အဆင်ပြေမှာပေါ့”

နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က မေလဆန်းမှာ ထိုင်းနိုင်ငံကနေ မြန်မာနိုင်ငံကို ပြန်လည်ဝင်ရောက်လာမယ့်သူ ငါးသောင်းကနေ ခုနှစ်သောင်းကြားရှိနိုင်တယ်လို့ ပြောထားပါတယ်။

ပြန်ဝင်လာသူတွေ နယ်စပ်ဒေသတွေက တိုင်းနဲ့ ပြည်နယ်တွေမှာ မထားတော့ဘဲ သက်ဆိုင်ရာ တိုင်းနဲ့ ပြည်နယ်တွေကို ပို့ဆောင်ပြီး စောင့်ကြည့်ကန့်သတ်စခန်းမှာထားဖို့ အစိုးရကစီစဉ်ထားပါတယ်။