ဒရုန်းအမှု နိုင်ငံခြားသတင်းထောက်နှစ်ဦးကို ပုဒ် ၁၃(၁)နဲ့ စတင်စစ်ဆေး

• 
  2017-12-11

လွှတ်တော်အဆောက်အအုံကို ဒရုန်းနဲ့ ရိုက်ကူးဖို့ ကြိုးစားစဉ်မှာ ဖမ်းဆီးခံထားရတဲ့ လေးဦးထဲက နိုင်ငံခြား သားနှစ်ဦးကို လူဝင်မှုကြီးကြပ်ရေးဥပဒေ ပုဒ်မ ၁၃ (၁) နဲ့ ဇမ္ဗူသီရိမြို့နယ် တရားရုံးမှာ ဒီနေ့ စတင်စစ်ဆေးခဲ့ပါ တယ်။

တူရကီနိုင်ငံအခြေစိုက် TRT သတင်းဌာနက သတင်းထောက် နှစ်ဦး၊ စကားပြန်အဖြစ် လိုက်ပါသူ ကိုအောင်နိုင်စိုး နဲ့ ယာဉ်မောင်းတစ်ဦး စုစုပေါင်း လေးဦးအမှုကို ၇ ကြိမ်မြောက်အဖြစ် ရုံးထုတ်အပြီးမှာ ရှေ့နေ ဦးခင်မောင်ဇော် က ဒီနေ့ တရားရုံးမှာ စစ်ဆေးခဲ့တဲ့အခြေအနေကို အခုလို ပြောပါတယ်။

"အရင်ကတင်ထားတဲ့ ပို့ကုန်သွင်းကုန်ပုဒ်မနဲ့ တစ်မှု၊ နောက်နိုင်ငံခြားသား နှစ်ယောက်ကိုပဲ သတ်သတ်တင်တယ်၊ လူဝန်မှုကြီးကြပ်ရေးအက်ဥပဒေ ၁၃(၁)နဲ့ စွဲတဲ့အမှုကို အရင်စစ်ပါတယ်"

အဲဒီလိုစစ်ဆေးရာမှာ တရားလိုဖြစ်တဲ့ လဝက အရာရှိတဦးနဲ့ အမှတ် ၅ ရဲစခန်းမှူးကို စစ်ဆေးခဲ့တယ် လို့ သိရပါတယ်။

နိုင်ငံခြားသား ၂ ဦးကို သွင်းကုန်ထုတ်ကုန်ဥပဒေအပြင် လဝက ဥပဒေနဲ့ပါ တရားစွဲဆိုထားပြီး ကိုအောင်နိုင်စိုးနဲ့ ယာဉ်မောင်းဖြစ်သူကို သွင်းကုန်ထုတ်ကုန် ဥပဒေနဲ့သာ တရားစွဲဆိုထားတာပါ။

လက်ရှိမှာ လေးဦးစလုံးကို ပြီးခဲ့တဲ့ နိုဝင်ဘာလက လေယာဉ်အက်ဥပဒေ ပုဒ်မ ၈ နဲ့ ထောင်ဒဏ် ၂ လ စီချမှတ်ထားပါတယ်။