ရန်ကုန်က NLD ရုံးချုပ် ဝင်ရောက်စီးနင်းခံရမှုအခြေအနေ သတင်းစာရှင်းလင်း

• 2021-02-11

တိုင်းနဲ့ပြည်နယ်အသီးသီးက အမျိုးသားဒီမိုကရေစီ အဖွဲ့ချုပ်ရုံးတွေကို အာဏာသိမ်းစစ်အစိုးရ လက်အောက်ခံ တပ်မတော်သားတွေနဲ့ ရဲတပ်ဖွဲ့ဝင်တွေ ဝင်ရောက်စီးနင်းနေတာဟာ ပါတီဖျက်သိမ်းရလောက်အောင်အထိ အပြစ်မရှိအပြစ်ရှာချင်လို့ ဖြစ်တယ်လို့ NLD အမျိုးသားလွှတ်တော် ကိုယ်စားလှယ် ဦးစိုးဝင်းက ပြောပါတယ်။

ဖေဖော်ဝါရီလ ၉ ရက်နေ့ ညပိုင်း ၁၀ နာရီလောက်မှာ စစ်ကားတွေနဲ့ လာရောက်ပြီး ရန်ကုန်မြို့၊ ဗဟန်းမြို့နယ်က NLD ရုံးချုပ်ကို ဝင်ရောက်စီးနင်းခဲ့တာပါ။

ရုံးသုံးပစ္စည်းတချို့နဲ့ ငွေစက္ကူ၊ ဘဏ်စာအုပ်တို့ကို ယူသွားတယ်လို့ NLD ပါတီရုံးအဖွဲ့ တာဝန်ရှိသူတွေက ပြောပါတယ်။

မနေ့က ညပိုင်းမှာ ဗဟန်းမြို့နယ်ရဲစခန်းကိုသွားပြီး အမှုဖွင့်တိုင်ကြားထားတဲ့အတွက် ရဲစခန်းက ပ/ ၃၂ နဲ့ အမှုကို လက်ခံထားပါတယ်။

ရန်ကုန်တိုင်း NLD ရုံးကို စစ်တပ်က ဝင်ရောက်စီးနင်းပြီးနောက်ပိုင်းမှာ တိုင်းနဲ့ပြည်နယ် အသီးသီးမှာ ရှိတဲ့ ဝန်ကြီးချုပ်တွေ စီမံဘဏ္ဍာဝန်ကြီးတွေ၊ NLD ဥပဒေအကြံပေးအဖွဲ့က ဥပဒေပညာရှင်တွေ၊ ပြည်ထောင်စု ရွေးကောက်ပွဲ ကော်မရှင် ဥက္ကဋ္ဌတွေနဲ့ တာဝန်ရှိသူတွေကို ဖေဖော်ဝါရီ ၁၀ ရက်နေ့ က ဝင်ရောက်ဖမ်းဆီးခဲ့ပါတယ်။

စစ်အာဏာသိမ်းအစိုးရဘက်က သူတို့ချမှတ်ထားတဲ့ ညမထွက်ရအမိန့် ၈ နာရီကျော်လွန်ချိန်မှာ ဝင်ရောက်ဖမ်းဆီးတာတွေ ရှိခဲ့တာပါ။