ပုလောမှာ လက်နက်ကြီးကြောင့် အမျိုးသားတစ်ဦး သေဆုံး
တနင်္သာရီတိုင်း မြိတ်ခရိုင်၊ ပုလောမြို့နယ် မင်းထိန်ရွာမှာ စစ်တပ်က ပစ်ခတ်တဲ့ လက်နက်ကြီးထိမှန်ပြီး ရွာသားတစ်ဦး သေဆုံးကာ ရှစ်ဦး ဒဏ်ရာရခဲ့ပါတယ်။
-
RFA Burmese
2023-06-08 -
-
-
တနင်္သာရီတိုင်း မြိတ်ခရိုင်၊ ပုလောမြို့နယ် မင်းထိန်ရွာမှာ စစ်ကောင်စီတပ်ရဲ့ ပစ်ခတ်မှုကြောင့် ရွာသားတစ်ဦး သေဆုံးပြီး ရှစ်ဦး ဒဏ်ရာရခဲ့တယ်လို့ ဒေသခံတွေက ပြောပါတယ်။
ဇွန်လ ၇ ရက်နေ့က စစ်ကောင်စီတပ်က ပစ်လိုက်တဲ့ လက်နက်ကြီးကျည် ကျရောက်ပေါက်ကွဲတဲ့အတွက် အမျိုးသားတစ်ဦး ထိမှန်သေဆုံးပြီး ရှစ်ဦးဒဏ်ရာရခဲ့တယ်လို့ မြိတ်ခရိုင်တပ်ရင်း ၁ ပြန်ကြားရေးတာဝန်ခံ ဆရာစံက ပြောပါတယ်။
"မနေ့ ညနေငါးနာရီကျော်မှာ စစ်ကောင်စီတပ်ကပစ်တဲ့ လက်နက်ကြီးကျည်စထိမှန်ပြီး မင်းထိန်ရွာက အသက် ၅၃ နှစ်အရွယ် ဦးဖိုးချွန်း သေသွားတယ်၊ အခြား ရှစ်ဦးလည်း ဒဏ်ရာရတယ်"
ပုလောမြို့အခြေစိုက် ခလရ-၂၈၅ တပ်ရင်းကနေ တိုက်ပွဲဖြစ်ပွားတာမရှိဘဲ ပစ်ခတ်ခဲ့တာလို့ ဆိုပါတယ်။ ဒဏ်ရာရသူတွေထဲက အမျိုးသမီးတစ်ဦးဟာ စိုးရိမ်ရတဲ့အတွက် ဆေးကုသမှုခံယူနေရတယ်လို့ ဆရာစံကပြောပါတယ်။
ပြီးခဲ့တဲ့ ဇွန်လ ၁ ရက်နေ့ကလည်း စစ်ကောင်စီတပ်ကပစ်တဲ့ လက်နက်ကြီးကျည်စထိမှန်ပြီး မင်းထိန်ရွာက အမျိုးသမီးတစ်ဦးသေဆုံးခဲ့သလို အသက် ၁၀၂ နှစ်အရွယ် အဘွားတစ်ဦး လက်နက်ကြီးပေါက်ကွဲသံကြောင့် ထိတ်လန့်ပြီး သေဆုံးခဲ့ပါတယ်။
မေလ ၂၆ ရက်နေ့ကလည်း မင်းပြင်ရွာက အသက် သုံးနှစ်အရွယ် ကလေး တစ်ဦးနဲ့ အသက် ၃၈ နှစ်အရွယ် အမျိုးသမီးတစ်ဦး စစ်ကောင်စီတပ်ကပစ်တဲ့ လက်နက်ကြီးကျည်စ ထိမှန်ပြီး သေဆုံးခဲ့ပါတယ်။
တနင်္သာရီတိုင်း ပုလောမြို့နယ်ဟာ စစ်ကောင်စီတပ်ကပစ်တဲ့ လက်နက်ကြီးကြောင့် အရပ်သားသေဆုံးမှု အများဆုံးမြို့နယ်လည်း ဖြစ်ပါတယ်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ရဲ့ ၂၀၂၃ ခုနှစ်၊ ဇွန်လ ၂ ရက် ထုတ်ပြန်ချက်အရ စစ်တပ်အာဏာသိမ်းပြီးချိန်ကစလို့ သေဆုံးခဲ့တဲ့ အရပ်သား ၃,၆၁၄ ဦးအထိ ရှိလာပြီဖြစ်ပါတယ်။