ကိုလိုနီခေတ် လက်နက်ဥပဒေတွေ ပယ်ဖျက်ဖို့ လွှတ်တော်မှာဆွေးနွေး

ခေတ်နဲ့ လျော်ညီမှုမရှိဘဲ လူထုအပေါ် ဖိနှိပ်တဲ့ဥပဒေအဖြစ် အသုံးချသလိုဖြစ်နေတဲ့ လက်နက်နဲ့ သက်ဆိုင်တဲ့ဥပဒေတွေကို ပယ်ဖျက်ပြီး ဥပဒေအသစ်ရေးဆွဲ ပြဌာန်းပေးဖို့ ပြည်သူ့လွှတ်တော် ကိုယ်စားလှယ်နှစ်ဦးက ဒီနေ့ ပြည်သူ့လွှတ်တော်အစည်းအဝေးမှာ  ကြယ်ပွင့်ပြမေးခွန်းတွေအဖြစ် မေးမြန်းခဲ့ပါတယ်။

လက်နက်ဥပဒေအများစုဟာ ဒေသခံလူထုကိုဖိနှိပ်ရာမှာ အသုံးပြုဖို့ ဗြိတိသျှကိုလိုနီအစိုးရ လက်ထက်ကတည်းက ပြဌာန်းခဲ့တဲ့ဥပဒေတွေ ဖြစ်ပါတယ်။

လွှတ်တော်အမတ်တွေရဲ့ မေးခွန်းကို ပြန်လည်ဖြေကြားရာမှာ ပြည်ထဲရေးဝန်ကြီးဌာန ဒုတိယဝန်ကြီး ဗိုလ်ချုပ်အောင်သူက “တစ်နိုင်ငံလုံးကို တပြေးညီ အာဏာသက်ရောက်စေမယ့် လက်နက်ဥပဒေသစ်“ ကို ရဲတပ်ဖွဲ့က ရေးဆွဲနေတယ်လို့ ပြောပါတယ်။

၁၈၇၈ ခုနှစ်က လက်နက်ဥပဒေ အပါအဝင် တခြား လက်နက်ဥပဒေတွေကို ပယ်ဖျက်ပြီး လက်နက်ဥပဒေသစ်ရေးဆွဲဖို့ ဆောင်ရွက်နေတယ်လို့ ဒုတိယဝန်ကြီး ဗိုလ်ချုပ်အောင်သူက ပြောပါတယ်။

လက်ရှိတည်ဆဲဖြစ်တဲ့ လက်နက်နဲ့ သက်ဆိုင်တဲ့ ဥပဒေတွေကတော့ ၁၈၇၈ ခုနှစ် လက်နက်များ အက်ဥပဒေ၊ ၁၈၉၅ ခုနှစ် ကချင်တောင်တန်းဒေသ မျိုးရိုးတူစုများဆိုင်ရာ စည်းမျဉ်းဥပဒေ၊ ၁၉၂၄ ရှမ်းပြည်နယ် လက်နက်အမိန့်၊ ၁၉၄၈ ခုနှစ် ချင်းပြည်နယ် လက်နက်ဆိုင်ရာ ပြဌာန်းချက်များ၊ ၁၉၄၉ ခုနှစ် လက်နက်အရေးပေါ် ပြစ်ဒဏ်စီရင်မှု ယာယီအက်ဥပဒေနဲ့ ၁၉၅၁ ခုနှစ် လက်နက် ယာယီပြင်ဆင်ချက်ဥပဒေတို့ ဖြစ်ပါတယ်။

SNLD ကျားခေါင်းပါတီက ပြည်သူ့လွှတ်တော်ကိုယ်စားလှယ် ဦးစိုင်းထွန်းအေးက... ရှမ်းပြည်နယ်မှာ ကျင့်သုံးတဲ့ လက်နက်ဥပဒေသုံးခုဟာ ဒေသခံပြည်သူတွေရဲ့ ဓလေ့ထုံးစံအရ ဓား၊ တူမီးသေနတ် ကိုင်ဆောင်မှုတွေကို ကန့်သတ်ဖိနှိပ်မှုတွေရှိနေတဲ့အတွက် အသစ်ပြဌာန်းပေးဖို့ တောင်းဆိုရတာလို့ ပြောပါတယ်။

လက်နက်ဥပဒေသစ်နဲ့ ပတ်သက်လို့ မြန်မာနိုင်ငံရဲတပ်ဖွဲ့က လွှတ်တော် ဥပဒေကြမ်းကော်မတီကို တင်ပြလာရင် လိုအပ်ချက်တွေကို ထောက်ပြ အကြံပြုသွားမယ်လို့ ဦးစိုင်းထွန်းအေးက ဆက်ပြောပါတယ်။

NLD ပါတီ၊ စဉ့်ကူးမြို့နယ်က ပြည်သူ့ လွှတ်တော်ကိုယ်စားလှယ် ဒေါက်တာဇော်ဝင်းမြင့်ကလည်း ခေတ်နဲ့ ဆီလျော်မှုမရှိတဲ့ လွန်ခဲ့တဲ့ နှစ်ပေါင်း ၁၄ဝ ကျော်က ၁၈၇၈ ခုနှစ် လက်နက်ဥပဒေကို ပယ်ဖျက်ပြီး အသစ်ပြဌာန်းဖို့ ရှိမရှိ မေးမြန်းခဲ့ပါတယ်။

စဉ့်ကူးမြို့နယ်အတွင်း ၁၈၇၈ ခုနှစ် လက်နက်ဥပဒေအရ ပြစ်ဒဏ်ချမှတ်ခံနေရတာတွေ အများအပြားရှိပြီး ထန်းတက်သမားမိသားစုတွေ၊ ရွှေတူးတဲ့သူတွေ၊ တောင်ယာလုပ်ကိုင်တဲ့ သူတွေဟာ ငွေဒဏ်မဟုတ်ဘဲ ထောင်ဒဏ်အထိ ချမှတ်ခံနေရတယ်လို့ သူက ပြောပါတယ်။

ပြည်ထဲရေးဝန်ကြီးဌာန ဒုတိယဝန်ကြီး ဗိုလ်ချုပ်အောင်သူက စဉ့်ကူးမြို့နယ်အတွင်းမှာ ရာဇဝတ်မှုတွေ များတဲ့အတွက် အဲဒီဥပဒေနဲ့ အရေးယူရတာလို့ လွှတ်တော်အစည်းအဝေးအတွင်း ပြန်လည်ဖြေကြားခဲ့ပါတယ်။

ဒေါက်တာဇော်ဝင်းမြင့်ကတော့ အဲဒီဥပဒေတွေဟာ ပြည်သူတွေကို အကာအကွယ်ပေးနိုင်တဲ့ ဥပဒေတွေ မဟုတ်ဘူးလို့ အစည်းအဝေးအပြီးမှာ သတင်းထောက်တွေကို ရှင်းပြသွားပါတယ်။

ရဲတပ်ဖွဲ့က ရေးဆွဲနေတဲ့ လက်နက်ဥပဒေသစ်ကို လုံလောက်တဲ့ အချိန်အတိုင်းအတာထက် မကြန့်ကြာစေဘဲ ပြည်သူကို အကာအကွယ်ပေးနိုင်ပြီး ခေတ်နဲ့လျော်ညီမူရှိတဲ့ ဥပဒေ အမြန်ဆုံး ပြဌာန်းပေးဖို့ တောင်းဆိုချင်တယ်လို့လည်း  ပြည်သူ့လွှတ်တော်ကိုယ်စားလှယ်တွေဖြစ်တဲ့ ဒေါက်တာ ဇော်ဝင်းမြင့်နဲ့ ဦးစိုင်းထွန်းအေးတို့က ပြောဆိုသွားကြပါတယ်။