NLD လွှတ်တော်တက်နိုင်ရေး လွှတ်တော်ကိုယ်စားလှယ်တွေ ဦးရွှေမန်းထံစာပို့

• 
  2012-04-26

လွှတ်တော်ကိုယ်စားလှယ် ကတိသစ္စာပြုလွှာမှာ ဖော်ပြထားတဲ့ စကားတွေရပ်ကို ပြင်ဆင်နိုင်ဖို့အတွက် ၂၀၁၀ ရွေးကောက်ပွဲမှာ အများစု အနိုင်ရရှိထားတဲ့ ကြံ့ခိုင်ဖွံ့ဖြိုးရေးပါတီ လွှတ်တော် ကိုယ်စားလှယ်တွေက ဦးဆောင်ပြီး ဆောင်ရွက်ပေးဖို့ တသီးပုဂ္ဂလအမတ်တွေ အပါအဝင် လွှတ်တော်ကိုယ်စားလှယ် ၁၆ ဦးက လက်မှတ်ရေးထိုး တောင်းဆိုလိုက်တာ ဖြစ်တယ်လို့ အမျိုးသား လွှတ်တော်ကိုယ်စားလှယ် ဒေါက်တာ အေးမောင်က ပြောပါတယ်။

နိုင်ငံရေးပါတီများ မှတ်ပုံတင်ခြင်း ဥပဒေ အခန်း (၂)၊ နိုင်ငံရေးပါတီ တည်ထောင်ခြင်းနှင့် မှတ်ပုံတင်ခြင်း ပုဒ်မ (၆) ပါ စောင့်ထိန်း လိုက်နာရမယ့် ဝန်ခံချက်မှာလည်း အဲဒီစကားရပ်ကို ပြင်ဆင်ခဲ့ပြီး ဖြစ်တဲ့အတွက် အခု ကတိသစ္စာပြုလွှာမှာပါ အဲဒီ စကားရပ်ကို တပြေးညီ ပြင်ဆင်ပေးဖို့ကိုလည်း ကြံ့ခိုင်ဖွံ့ဖြိုးရေးပါတီ ဒုတိယ ဥက္ကဋ္ဌ သူရဦးရွှေမန်းထံ ဧပြီလ ၂၅ ရက် နေ့စွဲနဲ့ ပေးပို့တဲ့ လွှတ်တော်အမတ်တွေရဲ့ စာထဲမှာ ရေးသားထားပါတယ်။

ဒီပေးစာနဲ့ ပတ်သက်လို့ အမျိုးသား လွှတ်တော်ကိုယ်စားလှယ် ဒေါက်တာအေးမောင်ကို RFA အဖွဲ့သား ကိုကျော်ကျော်အောင်က ဆက်သွယ်မေးမြန်းထားပါတယ်။