ဖြူးမြို့မှာ ရဲတပ်ဖွဲ့ဝင်တွေနဲ့ PDF တို့ အပြန်အလှန်ပစ်ခတ်ရင်း ရဲတစ်ဦး သေဆုံး

• 2021-10-23

ပဲခူးတိုင်း၊ ဖြူးမြို့နယ်ထဲမှာ ကင်းလှည့်နေတဲ့ ရဲတပ်ဖွဲ့ဝင်တွေနဲ့ ဖြူး PDF တပ်ဖွဲ့ဝင်တွေ ဒီနေ့ အောက်တိုဘာ ၂၃ ရက် မနက်အစောပိုင်းက အပြန်အလှန် ပစ်ခတ်ခဲ့ကြရာ ရဲတပ်ဖွဲ့ဝင်တစ်ယောက် သေဆုံးသွားတယ်လို့ ပဲခူး PDF အဖွဲ့က ပြောပါတယ်။

ဒီနေ့မနက် သုံးနာရီခွဲလောက်မှာ ဖြူးမြို့နယ်ထဲ ဝင်လာတဲ့ PDF တပ်ဖွဲ့ဝင်နှစ်ယောက်နဲ့ ကင်းလှည့်လာတဲ့ ရဲသုံးယောက်တို့ ထိပ်တိုက်တွေ့ကာ အပြန်အလှန် ပစ်ခတ်ခဲ့ကြတာလို့ ပဲခူးတိုင်း PDF တာဝန်ရှိသူတစ်ဦးက ဆိုပါတယ်။

“မြို့ပြင်မှာပဲဖြစ်သွားတာပါ။ ကျနော်တို့ ရဲဘော် နှစ်ယောက်က အထိအခိုက်မရှိဘဲ ပြန်ဆုတ်ခွာ လာနိုင်ခဲ့ပါတယ်”

ဒီဖြစ်စဉ်နဲ့ပတ်သက်လို့ RFA က သီးခြားအတည်ပြုနိုင်ခြင်း မရှိသေးသလို စစ်ကောင်စီ ပြန်ကြားရေး ဒု-ဝန်ကြီး ဗိုလ်ချုပ် ဇော်မင်းထွန်း ကိုလည်း ဆက်သွယ်ဖို့ ကြိုးစားနေပါတယ်။

ပြီးခဲ့တဲ့ အောက်တိုဘာလ ၃ ရက်နေ့ကလည်း ဖြူးမြို့နယ် ညောင်ပင်သာမြို့မ (၁) လမ်းအစွန် အရှေ့ဘက် လယ်ကွင်းထဲက Mytel တာဝါတိုင်တစ်ခုကိုလည်း ဖြူး PDF အဖွဲ့က မိုင်းခွဲဖျက်ဆီးခဲ့ပြီး အဲဒီနေ့မှာပဲ သမဝါယမရုံးရှေ့မှာ ဖောက်ခွဲမှုတစ်ခု လုပ်ခဲ့ရာ လူတွေ ထိခိုက်ဒဏ်ရာရတာ၊ အဆောက်အအုံ ပျက်စီးတာမျိုးတွေ မရှိခဲ့ပါဘူး။