စာနယ်ဇင်း လောကတွင်း စီးပွားရေးသမားအချို့ ဝင်ရောက်လာ
စက်မှုလက်မှု ဝန်ကြီးဟောင်း ဦးအောင်သောင်း ရဲ့ သား ဦးနေအောင်ပိုင် IGE International Group of Entrepreneurs လုပ်ငန်းစု ကနေ Myanmar Wall Street လို့ အမည်ပေး ထားတဲ့ အပတ်စဉ်ထုတ် ဂျာနယ် တစောင်ကို အခုနှစ် အတွင်း ထုတ်ဝေဖို့ ပြင်ဆင် နေပြီလို့ ပြည်တွင်း အခြေစိုက် Yangon Press International အင်တာနက် သတင်းမှာ မနေ့က ဖော်ပြ လိုက်ပါတယ်။
-
2011-08-03 -
-
-
ရန်ကုန်မြို့လယ်က စာနယ်ဇင်းအရောင်းဆိုင် တဆိုင်မှာ အပတ်စဉ်ထုတ် ဂျာနယ်များ ခင်းကျင်းထားသည့် မြင်ကွင်း။
စစ်ဗိုလ်ချုပ် အာဏာပိုင်တွေနဲ့ နီးစပ်တဲ့ ထိပ်တန်းစီးပွားရေး လုပ်ငန်းရှင် အချိူ့ သတင်းမီဒီယာ လောကထဲ တဖြည်းဖြည်း ခြေဆန့်လာတယ်
ဆိုပေမယ့် ပြည်တွင်းစာနယ်ဇင်း သမားတွေကလည်း အစဉ်အလာအတိုင်း နည်းမျိူးစုံနဲ့ ရေးသား ထုတ်ဖော်ခွင့်ရဖို့ ကြိုးစားနေတာ တွေ့မြင်ရတယ်လို့
ပြည်ပအခြေစိုက် မိုးမခ အင်တာနက် သတင်းမီဒီယာရဲ့တာဝန်ခံအယ်ဒီတာ ဦးမောင်ရစ်က ပြောပါတယ်။
“အခုအချိန်မှာ စစ်အစိုးရ အသစ်အောက်မှာ စာနယ်ဇင်း လုပ်ငန်းထဲကို စီးပွားရေး လုပ်ငန်းရှင် အသစ်တွေ အဟောင်းတွေက စိတ်ဝင်စားပြီး
မြှုပ်နှံကြတယ်။ မြှုပ်နှံတာ ကောင်းပါတယ်။ ဘာကြောင့်လဲ ဆိုတော့ စာနယ်ဇင်း လုပ်ငန်းမှာ လုပ်ကိုင်နေတဲ့ စာနယ်ဇင်း သမားတွေ ဝန်ထမ်းတွေရဲ့
စားဝတ်နေရေး အထိုက်အလျောက်တော့ ပြေလည်မယ်။ ဒီပြေလည်လာတာနဲ့ အတူ သူတို့ရဲ့ရေးကွက် လုပ်ငန်း လုပ်ကွက် တွေကလည်း ပိုကျယ်ပြန့်
လာမယ်လို့ မြင်ပါတယ်”
Myanmar Wall Street ဂျာနယ်ရုံးခန်းကို ရန်ကုန်မြို့ ရွှေဂုံတိုင်မှာ ဖွင့်လှစ်ထားကြောင်းနဲ့ စီးပွားရေး သတင်းတွေကိုပဲ ဦးစားပေး ဖော်ပြသွားမှာ
ဖြစ်တယ်လို့ Yangon Press International က ဆိုပါတယ်။
စီးပွားရေး လုပ်ငန်းရှင်အချို့ လောလောဆယ်မှာ ပိုင်ဆိုင်တဲ့ ဂျာနယ်တချို့ ရှိကြပြီး အဲဒါတွေကတော့ ရွှေသံလွင် ဦးကျော်ဝင်းပိုင် အဲန်ဗွိုင်း (Envoy)
ဂျာနယ်၊ ပြည့်စွမ်းရည် ကုမ္ပဏီလုပ်ငန်းစုပိုင်ရှင် ဦးဇော်မင်းအေးပိုင် မက်ဆင်ဂျာ (Messenger) နဲ့ အီကို ဗီးရှင်း (Ecovision) ဂျာနယ်တွေပဲ
ဖြစ်ကြပါတယ်။