နေပြည်တော်ဆန္ဒပြပွဲ နစ်နာသူတွေ အကြောင်းကြားဖို့ ဝန်ကြီးဌာန ထုတ်ပြန်

• 
  2017-05-23

နေပြည်တော်ကောင်စီနယ်မြေမှာ ပြုလုပ်ခဲ့တဲ့ သာသနာရေးနဲ့ ယဉ်ကျေးမှုဝန်ကြီး သူရဦးအောင်ကို နှုတ်ထွက်ပေး ဖို့ တောင်းဆိုဆန္ဒပြပွဲကို တက်ရောက်ခဲ့သူတွေထဲက ထောက်ပံ့ကြေးမရသူတွေ၊ နေရပ်ပြန်ဖို့ ငွေကြေးအခက် အခဲဖြစ်ခဲ့သူတွေအနေနဲ့ ဝန်ကြီးဌာနကို အသိပေးအကြောင်းကြားနိုင်တယ်လို့ သာသနာရေးနဲ့ ယဉ်ကျေးမှု ဝန်ကြီးဌာနက မနေ့က ထုတ်ပြန်ကြေညာလိုက်ပါတယ်။

တရားဝင်စာနဲ့ အသိပေးလာရင် လက်ခံသွားမှာဖြစ်ပြီး အသိပေးလာတဲ့အပေါ်မူတည်ကာ ဆက်လက်လုပ်ဆောင် သွားမှာဖြစ်ကြောင်း သာသနာရေးနဲ့ ယဉ်ကျေးမှုဝန်ကြီးဌာန ညွှန်ကြားရေးမှူး ဦးအောင်ဆန်းဝင်း က ပြောပါတယ်။

"ကျနော်တို့က ဖုန်းနဲ့တော့ လက်မခံပါဘူးခင်ဗျ၊ တရားဝင်စာနဲ့ အသိပေးလာရင် လက်ခံပါ့မယ်ခင်ဗျ၊ အသိပေးတာကတော့ ဘယ်သူက အသိပေးတယ်ဆိုတာတော့ ဖော်ပြသင့်တာပေါ့လေ၊ အသိပေးလာတဲ့ အပေါ် မူတည်ပြီး ဆုံးဖြတ်ပါမယ်၊ ဆောင်ရွက်ချက်ကိုလည်း ဝက်ဘ်ဆိုက်ကနေ သတင်းထုတ်ပြန်ပေး ပါမယ်။"

RFA က ဆက်သွယ်မေးမြန်းတဲ့ ဒီနေ့နေ့လည်ပိုင်းအထိတော့ အကြောင်းကြားလာသူတွေ မရှိသေးဘူးလို့ လည်း ပြောပါတယ်။

ဝန်ကြီးဌာနအနေနဲ့ ထုတ်ပြန်ချက် ထုတ်ပြန်ကြေညာရတဲ့ အကြောင်းအရင်းကိုတော့ ပြောကြားခြင်း မရှိပါဘူး။

မြန်မာဗုဒ္ဓဘာသာ နိုးကြားရေးအသင်း(ရန်ကုန်)က ပြုလုပ်ခဲ့တဲ့ ဆန္ဒပြပွဲမှာ တက်ရောက်ခဲ့သူတွေကို တစ်ယောက် ကို ၇ ထောင်၊ ၁ သောင်း၊ ၂ သောင်း၊ ၃ သောင်း စသဖြင့် ထောက်ပံ့ပေးခဲ့တယ်လို့ လူမှုကွန်ရက်စာမျက်နှာတချို့ မှာ ဖော်ပြမှုတွေရှိနေကြောင်း ထုတ်ပြန်ချက်မှာ ပါရှိပါတယ်။

အဲဒီပွဲမှာ ပါဝင်ခဲ့သူတချို့က ထောက်ပံ့ကြေးမရတာ၊ အပြန်ခရီးအတွက် အခက်အခဲဖြစ်တာတွေ ကြုံတွေ့ရကြောင်းနဲ့ အဲဒီပွဲအတွက် ငွေကျပ်သိန်း ၈ ထောင်ခန့် သုံးစွဲခဲ့ကြောင်း ကုန်ကျစရိတ်စာရင်းတွေ ခန့်မှန်းတွက်ချက်ထား တာတွေကို လူမှုကွန်ရက်စာမျက်နှာတချို့မှာ ဖော်ပြထားတယ်လို့လည်း ဝန်ကြီးဌာနက ထုတ်ပြန်ပါတယ်။

ဒါ့အပြင် အဲဒီငွေကြေးတွေကို ထောက်ပံ့တဲ့အဖွဲ့အစည်းနဲ့ စီမံသုံးစွဲခဲ့သူတွေအကြောင်းလည်း ဝန်ကြီးဌာနကို အသိပေးအကြောင်းကြားနိုင်တယ်လို့ ထုတ်ပြန်ချက်မှာာ ပါရှိပါတယ်။

မြန်မာဗုဒ္ဓဘာသာနိုးကြားရေးအသင်း (ရန်ကုန်) က ဦးဆောင်တဲ့ သံဃာတော်တွေနဲ့ လူ ၃ဝဝ လောက်က ပြီးခဲ့တဲ့ မေလ ၂၀ ရက်နေ့က  နေပြည်တော်၊ ဥတ္တရသီရိမြို့နယ်၊ ရွှေနံ့သာဘောလုံးကွင်းမှာ ဆန္ဒပြတောင်းဆို ခဲ့ကြတာ ဖြစ်ပါတယ်။  

အဲဒီပွဲမှာ ဝန်ကြီးသူရဦးအောင်ကို နုတ်ထွက်ပေးရေးအပြင် အမျိုသားရေးလှုပ်ရှားသူ ဦးဝင်းကိုကိုလတ် အပါအဝင် ဖမ်းဆီးခံထားရသူ ၄ ဦး လွှတ်ပေးရေး၊ တရားဟောခွင့် အပိတ်ခံထားရတဲ့ ဆရာတော် ဦးဝီရသူကို တရားဟော ခွင့်ပြန်လည်ခွင့်ပြုရေး စတဲ့ အချက် ၇ ချက်ကို တောင်းဆိုခဲ့ကြပါတယ်။