အကြမ်းဖက်ဖောက်ခွဲမှုတွေ မဖြစ်စေဖို့ စစ်တွေမှာ လုံခြုံရေး တိုးမြှင့်
ရခိုင်ပြည်နယ် စစ်တွေမြို့မှာ မနက်ဖြန် ကျရောက်မယ့် အာဇာနည်နေ့အတွင်း အကြမ်းဖက်ဖောက်ခွဲတဲ့ဖြစ်ရပ်တွေ မဖြစ်ပေါ်စေဖို့အတွက် မနေ့ကစတင်ပြီး လုံခြုံရေးကို တိုးမြှင့်လုပ်ဆောင်နေတယ် လို့ သိရပါတယ်။
-
2017-07-18 -
-
-
ရခိုင်ပြည်နယ် စစ်တွေမြို့မှာ မနက်ဖြန်ကျရောက်မယ့် အာဇာနည်နေ့အတွင်း အကြမ်းဖက်ဖောက်ခွဲတဲ့ ဖြစ်ရပ်တွေ မဖြစ်ပေါ်စေဖို့အတွက် မနေ့ကစတင်ပြီး လုံခြုံရေးကို တိုးမြှင့်လုပ်ဆောင်နေတယ်လို့သိရပါတယ်။
အထက်ကညွှန်ကြားချက်အရ မြို့အဝင်အထွက်ဂိတ်တွေမှာ ယာဉ်တွေကို အဓိကစစ်ဆေးနေတာဖြစ်တယ်လို့ စစ်တွေမြို့နယ်ရဲတပ်ဖွဲ့မှူး ရဲမှူးသန်းကျော် က ပြောပါတယ်။
"လောလောဆယ်ဖောက်ခွဲရေးပစ္စည်းတွေမရှိအောင်လို့ အထက်ကညွှန်ကြားချက်နဲ့အညီ မြို့ဝင်၊ မြို့ထွက်ဂိတ်တွေကို စစ်ဆေးနေတာဖြစ်ပါတယ်"
အာဇာနည်နေ့ပြီးဆုံးတဲ့အထိ အခုလို စစ်ဆေးမှုတွေ လုပ်ဆောင်သွားမှာဖြစ်သလို ဆက်လက်ပြီးတော့ အထက်ကညွှန်ကြားချက်တွေအပေါ်မှာမူတည်ပြီး အချိန်အခါမလပ် လုံခြုံရေးကို ဆောင်ရွက်မှာဖြစ်တယ်လို့ လည်း ပြောပါတယ်။
ဘူးသီးတောင်၊ မောင်တောဒေသမှာ ဖောက်ခွဲမှုဖြစ်ပွားတဲ့သတင်းတွေ ရှိနေပေမယ့်လည်း စစ်တွေမြို့မှာတော့ အကြမ်းဖက်ဖောက်ခွဲရေးသတင်းတွေ ရရှိထားတာမရှိဘူးလို့လည်း မြို့နယ်ရဲတပ်ဖွဲ့မှူးကပြောပါတယ်။
အာဇာနည်နေ့ လုံခြုံရေးအတွက် မြို့ပေါ်လုံခြုံရေးကင်းလှည့်တာတွေကိုလည်း အရင်ကထက် တိုးမြှင့် လုပ်ဆောင်နေတယ်လို့သိရပါတယ်။