ရန်ကုန်က အငှားယာဉ်တွေမှာ အဝါလိုင်းများကပ်နေ
ရန်ကုန်မြို့က အငှားယာဉ်တွေကိုသိသာစေဖို့အတွက် ယာဉ်ကိုယ်ထည်မှာ အဝါရောင်လိုင်းတွေ မဖြစ်မနေ ကပ်ဖို့ YRTC က ညွှန်ကြားထားတာကြောင့် လုပ်ဆောင်နေရတယ်လို့ အငှားယာဉ်မောင်းတွေက ပြောပါတယ်။
-
RFA Burmese
2023-11-02 -
-
-
ရန်ကုန်မြို့က အငှားယာဉ် (တက္ကစီ) တွေကို တခြားမော်တော်ယာဉ်တွေနဲ့ ကွဲပြားစွာ သိသာစေဖို့အတွက် ယာဉ်ရဲ့ကိုယ်ထည်မှာ အဝါရောင်လိုင်းတွေ မဖြစ်မနေကပ်ဖို့ ရန်ကုန်တိုင်း ပုဂ္ဂလိက သယ်ယူပို့ဆောင်ရေး ကြီးကြပ်မှုကော်မတီ (YRTC) က ညွှန်ကြားထားတာကြောင့် အဲဒီညွှန်ကြားချက်အတိုင်း လုပ်ဆောင်နေရတယ်လို့ အငှားယာဉ်မောင်းသူတွေက ပြောပါတယ်။
နိုဝင်ဘာလ ၁ ရက်နေ့ကစပြီး ယာဉ်ကိုယ်ထည်တွေမှာ အဝါရောင် စတစ်ကာကပ်တာတွေ လုပ်ဆောင်နေကြတာဖြစ်ပြီး ပညာပေးကာလ သုံးလကျော်လွန်တဲ့ ၂၀၂၄ ဇန်နဝါရီလကုန် နောက်ပိုင်းမှာတော့ မလိုက်နာတဲ့ အငှားယာဉ်တွေကို အရေးယူမယ်လို့ YRTC က ပြောထားပါတယ်။
အဝါရောင်စတစ်ကာကပ်တဲ့လုပ်ငန်းကို ရန်ကုန်တိုင်း မြောက်ဒဂုံမြို့နယ်မှာရှိတဲ့ YRTC စင်းလုံးငှားဌာနမှာ ကပ်ပေးနေတာရှိသလို ပြင်ပမှာလည်း ကိုယ့်အစီအစဉ်နဲ့ကိုယ် လုပ်ဆောင်နေတာတွေရှိတယ်လို့ အငှားယာဉ်မောင်းသူတွေက ပြောကြပါတယ်။
ရန်ကုန်မြို့မှာ လက်ရှိအချိန်ထိ မှတ်ပုံတင်ထားတဲ့ အငှားယာဉ် (တက္ကစီ) အစီးရေ ခြောက်သောင်းနီးပါးရှိတယ်လို့ စစ်ကောင်စီပိုင် သတင်းစာတွေမှာ ဖော်ပြထားပါတယ်။