မြန်မာ့အရေး ကုလလူ့အခွင့်အရေးကောင်စီ ဆွေးနွေးမည်

• RFA Burmese
  2024-09-04

စက်တင်ဘာ ၉ ရက်နေ့ကနေ အောက်တိုဘာ ၁၁ ရက်ထိ ကျင်းပမယ့် ၅၇ ကြိမ်မြောက် ပုံမှန်အစည်းအဝေးမှာ မြန်မာ့အရေးဆွေးနွေးမယ်လို့ ကုလသမဂ္ဂ လူ့အခွင့်အရေးကောင်စီက စက်တင်ဘာ ၄ ရက်မှာ ကြေညာချက်ထုတ်ပြန်ပါတယ်။ အပြန်အလှန် ဆွေးနွေးပွဲပေါင်း ၃၀ ရှိပြီး မြန်မာ့အရေးက လေးကြိမ်ပါဝင်ပါတယ်။

ပုံမှန်အစည်းအဝေး စတင်တဲ့ စက်တင်ဘာ ၉ ရက်မှာ မြန်မာနိုင်ငံက ရိုဟင်ဂျာ မွတ်စလင်နဲ့ လူနည်းစုတွေရဲ့ လူ့အခွင့်အရေး အခြေအနေကို မြန်မာနိုင်ငံဆိုင်ရာ လွတ်လပ်သော စုံစမ်းစစ်ဆေးမှု ယန္တရား (IIMM) နဲ့ ဆွေးနွေးပြီး စက်တင်ဘာ ၂၃ ရက်မှာ မြန်မာနိုင်ငံက လူ့အခွင့်အရေး အခြေအနေနဲ့ ပတ်သက်လို့ ကုလသမဂ္ဂ လူ့အခွင့်အရေးဆိုင်ရာ မဟာမင်းကြီးနဲ့ အပြန်အလှန် ဆွေးနွေးမယ်လို့ ကြေညာချက်မှာ ဖော်ပြထားပါတယ်။

ပြီးခဲ့တဲ့ ၅၆ ကြိမ်မြောက် အစည်းအဝေးမှာတော့ ကုလသမဂ္ဂ လူ့အခွင့်အရေးဆိုင်ရာ မဟာမင်းကြီး ဗော်လ်ကာ တာ့က် (Volker Turk) က ရခိုင်ပြည်နယ် မောင်တောမြို့တွင်း တိုက်ပွဲတွေနဲ့ဆက်စပ်ပြီး ရိုဟင်ဂျာတွေအရေး စိုးရိမ်တဲ့အကြောင်းနဲ့ စစ်တွေမြို့နယ် ဗျိုင်းဖြူရွာက ဒေသခံတွေ အစုလိုက်အပြုံလိုက် သတ်ဖြတ်ဖမ်းဆီးခံခဲ့ရတာတွေကို တင်ပြခဲ့ပါတယ်။

ဒါ့အပြင် လက်နက်ကိုင်ပဋိပက္ခတွေကြောင့် မြန်မာနိုင်ငံတဝန်းမှာ ရက်စက်ကြမ်းကြုတ်မှုတွေ ဆက်လက်ဖြစ်ပွားနေပြီး ပြည်သူတွေရဲ့ အသက်အိုးအိမ်စည်းစိမ်တွေ ပိုမိုဆိုးရွားစွာ ထိခိုက်ပျက်စီးတာတွေ ကြုံနေရတယ်လို့လည်း ပြောခဲ့ပါတယ်။ စစ်ကောင်စီကျူးလွန်နေတာကို ရပ်တန့်နိုင်ဖို့နဲ့ နိုင်ငံတကာက လူသားချင်းစာနာ ထောက်ထားမှု အကူအညီတွေပေးအပ်ဖို့လည်း ကုလသမဂ္ဂ လူ့အခွင့်အရေးဆိုင်ရာ မဟာမင်းကြီး ဗော်လ်ကာ တာ့က် (Volker Turk) က တိုက်တွန်းခဲ့ပါတယ်။