မြစ်ကြီးနားမှာ လူငယ် ၇ ဦးကို အမည်မသိ လက်နက်ကိုင် ၅ ဦးက ဖမ်းဆီးခေါ်ဆောင်သွား

• 
  2014-11-10

ကချင်ပြည်နယ် မြစ်ကြီးနားမြို့ ကြာရာပါတ္တီးရပ်ကွက် "အေ" မှာ မနေ့ညက သန်းခေါင်လောက်မှာ အမည်မသိ အရပ်ဝတ်နဲ့ လက်နက်ကိုင်ဆောင်ထားသူ ၅ယောက်လောက်က လူငယ်ခုနှစ်ဦးကို ဖမ်းဆီးခေါ်ဆောင်သွားတယ်လို့ သိရပါတယ်။

အဖမ်းခံရတဲ့သူတွေဟာ အသက် ၁၆ နှစ်နဲ့ ၂၂ နှစ်ကြား အရွယ်တွေဖြစ်တယ်လို့ ကြာရာပါတ္တီးရပ်ကွက် "အေ "ရဲ့ နယ်မြေမှူး ဦးနာဋ္ဌေဖုန်ဆားရ်က ပြောပြပါတယ်။

"အမျိုးသား ၄ ယောက် အမျိုးသမီးက ၃ ယောက်ပေါ့၊ ၁၆ နှစ် ၁၇ နှစ်အရွယ်တွေပါတယ်၊ ၁၉ နှစ် ၂၂ နှစ် အရွယ်တွေပါတယ်၊ တချို့ကျတော့ လမ်းမှာပြန်လာတဲ့သူတွေကို တားပြီးမှခေါ်သွားတယ်၊ တချို့ကျတော့ အိမ်ကိုတက်ပြီးတော့မှ အဓမ္မခေါ်သွားတယ်လို့ အဲ့လို ကျနော်ကြားသိရတယ်"

အဖမ်းခံရတဲ့ လူငယ် ၇ ဦးဟာ ရဝမ်၊ ဂျိန်းဖော၊ လာချိတ်စတဲ့ ကချင်မျိုးနွယ်စု တိုင်းရင်းသားတွေဖြစ်ပြီး အဲ့ဒီထဲကတစ်ချို့ဟာ သူတို့ရဲ့နေအိမ်ကနေ ဝင်ရောက်အဖမ်းခံခဲ့ရသလို တချို့က ဝတ်ပြုဆုတောင်းပွဲက အပြန်လမ်းမှာ ဖမ်းဆီးခံရတာလို့သိရပါတယ်။

ဖမ်းဆီးသွားတဲ့ အရပ်ဝတ်နဲ့ လက်နက်ကိုင်တွေဟာ ယူနီဖောင်း ဝတ်ဆင်ထားခြင်းမရှိတဲ့အတွက် ဘယ်အဖွဲ့ကလည်းဆိုတာကို အတိအကျ မပြောနိုင်သေးကြောင်း မြစ်ကြီးနားမြို့နယ် အုပ်ချုပ်ရေးမှူး ဦးလှိုင်းမောင်မောင်က RFA ကို ပြောပါတယ်။