ကချင်ပြည်နယ် ငြိမ်းချမ်းရေး လမ်းလျှောက်သူတွေ မန္တလေးရောက်ရှိ

• 
  2013-02-11

ငြိမ်းချမ်းရေးအတွက် လမ်းလျှောက်သူတွေကို မန္တလေးမြို့ခံ ကချင်တိုင်းရင်းသားတွေနဲ့ မြို့ခံတွေအပြင် မန္တလေး အမျိုးသားဒီမိုကရေစီအဖွဲ့ချုပ် NLD နဲ့ ငြိမ်းချမ်းရေး မြတ်နိုးသူများအဖွဲ့က မြို့အဝင် တံခွန်တိုင်အဝိုင်းကနေ ကြိုဆိုခဲ့ကြပါတယ်။

ဒီလိုမန္တလေးကို ရောက်လာတာဟာ ခရီးစဉ်တဝက်ကို ရောက်နေပြီဖြစ်တယ်လို့ လမ်းလျှောက်သူတွေကို အဓိကဦးဆောင်သူတစ်ဦးဖြစ်တဲ့ ကိုအောင်မင်းနိုင်က RFA ကို ပြောပါတယ်။

အဲဒီအဖွဲ့ဟာ မနေ့က ပုလိပ်မြို့ မူလငါးဆူကျောင်းတိုက်မှာ တည်းခိုခဲ့ကြပြီး မန္တလေးမြို့ကို မနက်ပိုင်းက ဆက်လက်ထွက်ခွာလာတာဖြစ်ပါတယ်။ သူတို့ဟာ မနက်ဖြန် မန္တလေးမြို့မှာ နယ်မြေခံ နိုင်ငံရေး အဖွဲ့အစည်းတွေက ကျင်းပမယ့် ပြည်ထောင်စုနေ့အခမ်းအနားကို တတ်ရောက်ကြမှာဖြစ်ပြီး ဖေဖော်ဝါရီလ ၁၄ ရက်နေ့မှာ ဆက်လက်ခရီးဆက်ထွက်ခွာမယ်လို့ ပြောပါတယ်။

ငြိမ်းချမ်းရေး လမ်းလျှောက်သူတွေရဲ့ နောက်ဆုံး အခြေအနေသိရအောင် RFA သတင်းထောက် မဇင်မာဝင်းက ကိုအောင်မင်းနိုင် ကို ဆက်သွယ်မေးမြန်းထားပါတယ်။