တနင်္သာရီမှာ လက်နက်ကြီးကြောင့် အမျိုးသမီးတစ်ဦး သေဆုံး

• RFA Burmese
  2024-07-16

တနင်္သာရီတိုင်း တနင်္သာရီမြို့နယ်မှာ ဇူလိုင်လ ၁၅ ရက်နေ့က စစ်ကောင်စီတပ်က ပစ်လိုက်တဲ့ လက်နက်ကြီးကျည် ကျရောက်ပေါက်ကွဲတာကြောင့် အမျိုးသမီးတစ်ဦး သေဆုံးခဲ့တယ်လို့ ဒေသခံတွေက ပြောပါတယ်။

မော်တုံးရွာ အခြေစိုက် စစ်ကောင်စီရဲ့ အမှတ်-၃၀၆ အမြောက်တပ်ရင်းက ပစ်ခတ်လိုက်တဲ့ လက်နက်ကြီးကြောင့် အရှေ့မော်တုံးကျေးရွာအုပ်စု ကမ်းရိုးတန်း (၂) ရွာမှာ နေထိုင်တဲ့ အသက် ၄၀ ဝန်းကျင်အရွယ် ဒေါ်မီးငယ် သေဆုံးခဲ့တာလို့ ဒေသခံတစ်ဦးက ပြောပါတယ်။

“မနေ့က လက်နက်ကြီး သုံးလုံး အမှတ် ၃၀၆ အမြောက်တပ်ကနေ လှမ်းပစ်တာ။ လှမ်းပစ်တဲ့အချိန်မှာ အဲဒီ အမျိုးသမီးရဲ့ လက်ရယ်၊ ခေါင်းရယ်ကို ကျည်စထိမှန်သွားတာ။ သူ့ကို ဆေးကုပေးဖို့ဆိုပြီး ခေါ်လာတဲ့ လမ်းမှာ အသက်ဆုံးသွားတယ်”

တနင်္သာရီမြို့နယ်မှာ တိုက်ပွဲဖြစ်တာမရှိဘဲ စစ်ကောင်စီတပ်က လက်နက်ကြီး ပစ်ခတ်တာနဲ့ လေကြောင်းကနေ တိုက်ခိုက်တာတွေ မကြာခဏပြုလုပ်နေပြီး ဇူလိုင်လ ၁၃ ရက်နေ့ကလည်း သာရဖုံရွာဘက်ကို လေကြောင်းကနေ ဗုံးကြဲတိုက်ခိုက်ခဲ့တယ်လို့ ဆိုပါတယ်။

ဒီအခြေအနေတွေနဲ့ ပတ်သက်လို့ စစ်ကောင်စီရဲ့ တနင်္သာရီတိုင်း ပြောခွင့်ရသူ တိုင်းလူမှုရေးဝန်ကြီး ဦးသက်နိုင်ကို RFA က တယ်လီဖုန်းနဲ့ ဆက်သွယ်ခဲ့ပေမဲ့ လက်ခံဖြေဆိုတာ မရှိပါဘူး။

RFA ရဲ့ စာရင်းတွေအရ စစ်အာဏာသိမ်းချိန်ကနေ ၂၀၂၄ ခုနှစ် မေလကုန်အထိ သုံးနှစ်ကျော်အတွင်း လေကြောင်းနဲ့ လက်နက်ကြီးကြောင့် စုစုပေါင်း အရပ်သား နှစ်ထောင်နီးပါး (၁၉၄၂ ဦး) သေဆုံးခဲ့ပြီး ဒဏ်ရာရသူကတော့ လေးထောင်နီးပါး (၃၈၆၆ ဦး) အထိ ရှိနေပါတယ်။