သြင်္ကန်တွင်းမှာ YBS ကားတွေကို တိုင်ကြားသူ မရှိသေး

• 
  2017-04-14

ဒီနေ့ သြင်္ကန်အကျနေ့အထိ သြင်္ကန်တွင်းမှာ YBS ဘတ်စ်ကားတွေ ကားခပိုကောက်ခံတာ၊ ကားမထွက်တာ စတဲ့ကိစ္စနဲ့ပတ်သက်ပြီး တိုင်ကြားလာတာတွေ မရှိသေးဘူးလို့ ရန်ကုန်တိုင်းဒေသကြီး၊ အများပြည်သူသယ်ယူ ပို့ဆောင်ရေးအာဏာပိုင်အဖွဲ့က ပြောပါတယ်။

သြင်္ကန်တွင်းမှာ ယာဉ်လိုင်းအားလုံးကို ပုံမှန်ထွက်နေကျရဲ့ ၂၀ % ထွက်ကြဖို့ ပြောထားသလို ငွေပိုမကောက်ကြ ဖို့လည်း ညွှန်ကြားထားကာ လက်ရှိအချိန်ထိတော့ တိုင်ကြားလာမျိုးတွေ မရှိသေးဘူးလို့ ရန်ကုန်တိုင်းဒေသကြီး၊ အများပြည်သူသယ်ယူ ပို့ဆောင်ရေးအာဏာပိုင်အဖွဲ့က ဒေါက်တာမောင်အောင် က ပြောပါတယ်။

"လိုင်းတိုင်းတော့ထွက်တယ်၊ လိုင်းတိုင်းကိုအနည်းဆုံး ၂၀ % ပေါ့လေ၊ ၁ ထောင်ဝန်းကျင်လောက်တော့ ထွက်တယ် အခုလောလောဆယ်တော့လေ သူက ၂၀ %လောက် အနည်းဆုံးထွက်ရမယ်လို့ ပြောထား တယ်၊ ပိုမကောက်ဖို့တော့ပြောထားတယ်၊ ပိုကောက်တဲ့ဟာကို အခုဆရာတို့ဆီတော့ တိုင်တာမရှိဘူး၊ တိုင်ခဲ့လို့ ရှိရင် လည်း ဆရာတို့ကတော့ အရေးယူမှာပဲ၊ ယာဉ်နံပါတ်နဲ့ အချိန်နဲ့ လိုင်းနဲ့ သေချာတိုင်ရင် ဆရာတို့အရေးယူသွားမှာပေါ့နော်။"

ဒီသြင်္ကန်အတွင်းပြေးဆွဲတဲ့ ယာဉ်လိုင်းတွေအနေနဲ့ အရင်ပုံမှန်ရက်တွေလိုမျိုး အများပြည်သူ သယ်ယူပို့ဆောင်ရေး အာဏာပိုင်အဖွဲ့ထံ ပေးသွင်းရတဲ့ပိုက်ဆံ သွင်းစရာမလိုဘူးလို့လည်း ဒေါက်တာမောင်အောင် က ပြောပါ တယ်။

ပြောထားတဲ့အတိုင်း ယာဉ်လိုင်းတွေ တကယ် ထွက်/မထွက်ဆိုတာကို စည်းကမ်းထိန်းသိမ်းရေးအဖွဲ့က လိုက်လံကြီးကြပ်စစ်ဆေးနေတယ်လို့လည်း သိရပါတယ်။

ရန်ကုန်တိုင်းဒေသကြီး အများပြည်သူသယ်ယူပို့ဆောင်ရေး အာဏာပိုင်အဖွဲ့က ပြီးခဲ့တဲ့ ဧပြီလ ၇ ရက်နေ့ ကစပြီး Air-Con ကားတွေဆို ၂၀၀ Air-Con တပ်ဆင်မထားတဲ့ YBS ကားတွေရဲ့ ယာဉ်စီးခတွေဆို ခရီးစဉ် အပိုင်းအလိုက် ၁၀၀ ကနေ စတင်ကောက်ခံဖို့ ပြောင်းလဲသတ်မှတ်ထား ပါတယ်။

ဒါပေမဲ့ သြင်္ကန်တွင်းမှာ တချို့ကားတွေက ယာဉ်စီးခတွေကို ၅၀၀ ကျပ်အထိ ပိုကောက်နေတာတွေရှိနေတယ်ဆို ပြီး ခရီးသွားပြည်သူတွေရဲ့ ဝေဖန်မှုတွေလည်း ရှိနေပါတယ်။

ပုံမှန်ရက်တွေမှာ YBS ယာဉ်လိုင်းပေါင်း ၈၀ ကျော်ရှိပြီး တစ်ရက်ကိုယာဉ်အစီးရေ ၃ ထောင်ကျော်နဲ့ ပြေးဆွဲနေ တာ ဖြစ်ပါတယ်။