ဆေးကုသမှုခံယူနေရတဲ့ ဒေါက်တာဇော်မြင့်မောင်ကို သမ္မတ သွားရောက်တွေ့ဆုံ

• ခေမဏီဝင်း
  2020-01-03

သွေးကင်ဆာရောဂါခံစားနေရပြီး ထိုင်းနိုင်ငံမှာသွားရောက်ကုသမှုခံယူခဲ့ရတဲ့ မန္တလေးတိုင်း ဝန်ကြီးချုပ် ဒေါက်တာဇော်မြင့်မောင်ဟာ အဆုတ်အအေးပတ်ပြီး အဖျားဝင်နေတဲ့အတွက် မန္တလေး ဆေးရုံကြီးမှာ တက်ရောက်ကုသမှုခံယူနေရပါတယ်။

ဒီကနေ့မနက်ပိုင်းက နိုင်ငံတော်သမ္မတ ဦးဝင်းမြင့်နဲ့ ဇနီးဖြစ်သူတို့ဟာ ဝန်ကြီးချုပ် ဒေါက်တာဇော် မြင့်မောင်ကို ဆေးရုံမှာလာရောက်တွေ့ဆုံပြီး အားပေးစကားပြောကြားခဲ့ပါတယ်။

ဒေါက်တာဇော်မြင့်မောင်ကို အနီးကပ်ကုသပေးနေတဲ့ ဒေါက်တာအောင်ဆန်းဦးက ဒီကနေ့မှာ အဖျားလည်းကျပြီး သက်သာနေပြီဖြစ်ကြောင်း ကျန်းကျန်းမာမာရှိကြောင်း၊ အမြဲအနားယူဖို့မလိုသလို အလုပ်ရင်း ဆေးကုသလို့ ရကြောင်း၊ ဒေါက်တာဇော်မြင့်မောင်အနေနဲ့ အနားယူမယ့်သူလည်း မဟုတ်ဘဲ အခုလောလောဆယ်ကတော့ စိတ်ပူစရာမရှိပါဘူးလို့ ပြောပါတယ်။

နောက်ထပ်ဆေးကုသဖို့အတွက်တော့ လာမယ့်ဇန်နဝါရီလ ၅ ရက်နေ့မှာ ထိုင်းနိုင်ငံကို ထပ်မံသွားရမယ်လို့လည်း ဒေါက်တာအောင်ဆန်းဦးက ပြောပါတယ်။

ဝန်ကြီးချုပ်ဟာ သွေးကင်ဆာရောဂါကြောင့် ထိုင်းနိုင်ငံကို နှစ်လခန့်ကြာ  သွားရောက်ကုသမှု ခံယူခဲ့ရပြီး ၂၀၁၉ ခုနှစ် ဒီဇင်ဘာလ ၂၅ ရက်နေ့က မြန်မာနိုင်ငံကို ပြန်ရောက်ခဲ့တာဖြစ်ပါတယ်။

၂၀၁၉ နှစ်သစ်ကူးညမှာတော့  မန္တလေးမြို့တော်စည်ပင်သာယာရေးကော်မတီ ရုံးရှေ့မှာပြုလုပ်တဲ့ နှစ်သစ်ကူးပွဲမှာ ပြည်သူတွေကို နှုတ်ခွန်းဆက်စကားပြောကြားခဲ့ပါတယ်။

မန္တလေးတိုင်း ဝန်ကြီးချုပ် ဒေါက်တာဇော်မြင့်မောင်ဟာ ရွေးကောက်ပွဲ သုံးကြိမ်အနိုင်ရ လွတ်တော် ကိုယ်စားလှယ်တစ်ယောက်ဖြစ်ပြီး ၁၉ နှစ်ကြာ အကျဉ်းထောင်အတွင်းမှာ နေထိုင်ခဲ့ရသူတစ်ဦးလည်း ဖြစ်ပါတယ်။