អ្នកនាំពាក្យសមាគមការពារសិទ្ធិមនុស្សអាដហុក លោក យិន ម៉េងលី ប្រាប់វិទ្យុអាស៊ីសេរីនៅថ្ងៃទី៩ឧសភាថា ការដែលតុលាការបន្តពន្យារពេលសវនាការនឹងធ្វើឱ្យខូចប្រយោជន៍ដល់លោក សុខ ស៊ុនណារ៉េត ដែលបន្តជាប់ឃុំដោយអយុត្តិធម៌យូរទៅមុខទៀត។ លោកនៅតែអះអាងថា លោក សុខ ស៊ុនណារ៉េត មិនបានប្រព្រឹត្តខុសច្បាប់ឡើយ ដូច្នេះតុលាការគួរតែដោះលែងគាត់ឱ្យមានសេរីភាពវិញដោយឥតលក្ខខណ្ឌ។
មិនមែនថា ពេលដែលផ្ដន្ទាទោសគិតពីថ្ងៃឃុំខ្លួន ចុះបើគោលការណ៍ច្បាប់សន្មតថាអត់ទោសអាហ្នឹងពាក់ព័ន្ធយ៉ាងម៉េច។ ហើយពាក់ព័ន្ធសាក្សី គប្បីតែធ្វើការកោះហៅឱ្យបានត្រឹមត្រូវតាមនីតិវិធីជូនដំណឹងដល់សាក្សី គិតថាសាក្សីសំខាន់ណាស់ក្នុងការសួរដេញដោលហ្នឹង ក៏មិនត្រូវធ្វេសប្រហែសខកខានអញ្ជើញសាក្សីហ្នឹងដែរ។
— លោក យិន ម៉េងលី
ការលើកឡើងរបស់មន្ត្រីឃ្លាំមើលសិទ្ធិមនុស្សនេះ ធ្វើឡើងក្រោយពីចៅក្រមជំនុំជម្រះសាលាដំបូងខេត្តកំពង់ស្ពឺលោក ខាន់ សុខា នៅថ្ងៃទី៩ឧសភាបានប្រកាសលើកពេលជំនុំជម្រះក្ដីសំណុំរឿង លោក សុខ ស៊ុនណារ៉េត ទៅពេលក្រោយ ដោយគ្មានថ្ងៃកំណត់ ដោយលើកហេតុផលថា ដោយសារអវត្តមានសាក្សី។
អង្គការការពារសិទ្ធិមនុស្សលីកាដូ(Licadho) សមាគមការពារសិទ្ធិអាដហុក(Adhoc) និងតំណាងការិយាល័យឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំនៅកម្ពុជាបានចុះឃ្លាំមើលសវនាការនេះ។
លោក សុខ ស៊ុនណារ៉េត អាយុ ៦៦ឆ្នាំ ជាអតីតនាយទាហានសឹករងខេត្តកំពង់ស្ពឺ ត្រូវបានមន្ត្រីកងរាជអាវុធហត្ថខេត្តនេះចាប់ខ្លួនក្នុងពេលលោកទៅជួបមេបញ្ជាការទាហានភូមិភាគ៣។ តុលាការខេត្តកំពង់ស្ពឺបានចោទប្រកាន់លោក ពីបទរក្សាទុកសារធាតុញៀនដោយខុសច្បាប់ និងបញ្ជូនទៅឃុំនៅពន្ធនាគារខេត្តនេះ កាលពីថ្ងៃទី១៣ ខែវិច្ឆិកា ឆ្នាំ២០២៤។ ប៉ុន្តែ កន្លងមកលោក សុខ ស៊ុនណារ៉េត បានបដិសេធលើការចោទប្រកាន់នេះថា ជាការមួលបង្កាច់ខុសការពិត។
កន្លងមកមេធាវីការពារក្ដីឱ្យជនជាប់ចោទ បានប្ដឹងសាទុក្ខទៅតុលាការកំពូល សាលាឧទ្ធរណ៍បដិសេធនឹងដីកាឃុំខ្លួនរបស់តុលាការថ្នាក់ក្រោមជាបន្តបន្ទាប់ ប៉ុន្តែមិនទទួលបានលទ្ធផល។
អង្គការជាតិ អន្តរជាតិនិងអ្នកឃ្លាំមើលចាត់ទុកសំណុំរឿងនេះថា ជាការធ្វើទុក្ខបុកម្នេញ គាបសង្កត់ឆ្លងដែន ដោយរដ្ឋាភិបាលត្រកូល ហ៊ុន ប្រើលេសចាប់លោក សុខ ស៊ុនណារ៉េត ធ្វើជាចំណាប់ខ្មាំង ដើម្បីដាក់សម្ពាធលើលោក ស៊ន តារា ឱ្យឈប់រិះគន់រដ្ឋាភិបាលលោក ហ៊ុន ម៉ាណែតបន្តទៀត ខណៈដែលលោក ហ៊ុន សែន បានបរាជ័យក្នុងការអូសទាញលោក ស៊ន តារា ឱ្យចុះជាមួយគណបក្សកាន់អំណាច៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។