ཡུལ་གྲུ་སོ་ལོ་ལྦ་ཀི་ཡ་ནང་རྒྱ་ནག་སྲིད་འཛིན་ལ་ངོ་རྒོལ།

༄༅༎རྒྱ་ནག་གི་སྲིད་འཛིན་ཧུའུ་ཇིང་ཐའོ་དེ་སྔོན་ཨུ་རུ་སུའི་མངའ་ཁོངས་ཡིན་པའི་སོ་ལོ་ལྦ་ཀི་ཡ་ནང་རྒྱལ་དོན་འཚམས་གཟིགས་གནང་བའི་རིང་མི་ཁག་ཅིག་གིས་ངོ་རྒོལ་གྱི་ལས་འགུལ་སྤེལ་ནས་སོ་ལོ་ལྦ་ཀི་ཡ་ཉེན་རྟོག་པས་ངོ་རྒོལ་བ་མི་གྲངས་དགུ་འཛིན་བཟུང་དོ་དམ་བྱས་ཡོད་པའི་སྐོར་ས་གནས་གསར་འགྱུར་བརྒྱུད་ལམ་ཐོག་གནས་ཚུལ་སྤེལ་ཡོད་འདུག

འཛིན་བཟུང་བྱས་པའི་མི་གྲངས་དགུ་པོ་དེ་དག་ནང་ཡུལ་དེའི་མི་སེར་མི་གྲངས་དྲུག་དང་རྒྱ་མིའི་མི་སེར་མི་གྲངས་གསུམ་ཡོད་པ་ཉེན་རྟོག་པས་འགྲེལ་བརྗོད་བྱས་ཡོད་པ་རེད།

སོ་ལོ་ལྦ་ཀི་ཡ་ནང་ཡོད་པའི་བོད་དོན་རྒྱབ་སྐྱོར་ཚོགས་པ་དང་རྒྱལ་སྤྱིའི་ཉེས་ཡངས་ཚོགས་པ་ཕ་ལུན་ཀུང་ཆོས་འཁོར་སྒོམ་གྲུབ་ཚོགས་པ་སོགས་གཞུང་འབྲེལ་མིན་པའི་ཚོགས་པ་དྲུག་མཉམ་འབྲེལ་ཐོག་ནས་སོ་ལོ་ལྦ་ཀི་ཡ་གཞུང་གི་ཆེས་མཐོའི་དཔོན་རིགས་རྣམ་པ་ཚོས་རྒྱ་ནག་གི་སྲིད་འཛིན་དང་མཉམ་དུ་འགྲོ་བ་མིའི་ཐོབ་ཐང་གི་གདན་དོན་ཐོག་བཀའ་མོལ་གནང་རྒྱུའི་འབོད་སྐུལ་ཞུས་ཡོད་པ་དང་འབྲེལ་རྒྱ་ནག་གི་སྲིད་འཛིན་ཡུལ་དེའི་ནང་ཕེབས་པའི་སྐབས་ངོ་རྒོལ་རྔམ་སྟོན་བྱེད་རྒྱུའི་འཆར་གཞི་ཡོད་ཀྱང་གྲོང་ཁྱེར་སྲིད་གཞུང་གིས་ངོ་རྒལ་བྱེད་སའི་ས་ཁོངས་དེ་བཞིན་སྲིད་འཛིན་གཞུང་ལས་ཁང་གིས་བེད་སྤྱོད་བྱ་རྒྱུར་སྔོན་ཚུད་ནས་མངགས་ཟིན་པ་བརྗོད་ནས་ངོ་རྒོལ་རྔམ་སྟོན་ལས་འགུལ་སྤེལ་རྒྱུར་གཞུང་འབྲེལ་གྱི་ཁས་ལེན་བྱས་མེད་པ་རེད། རྒྱ་ནག་གི་སྲིད་འཛིན་ཧུའུ་ཇིང་ཐའོ་གཟའ་ཕུར་བུའི་ཉིན་ར་ཤི་ཡའི་རྒྱལ་ས་མོ་སི་ཀོའི་ནས་སོ་ལོ་ལྦ་ཀི་ཡ་ནང་དུས་ཡུན་ཉིན་གྲངས་གཉིས་རིང་རྒྱལ་དོན་འཚམས་གཟིགས་སུ་ཕེབས་ཡོད་པ་དང་དེ་ནི་སྲིད་འཛིན་ཧུའུ་ཇིང་ཐའོ་ཡུལ་དེའི་ནང་ཕེབས་པ་ཐོག་མ་དེ་ཡིན་ཞིང་ཁོང་ཡུལ་དེའི་ནང་ཕེབས་པའི་སྐབས་ཕ་ལུང་ཀུང་ཆོས་འཁོར་སྒོམ་གྲུབ་ཚོགས་མི་ཁག་ཅིག་གིས་ངོ་རྒོལ་གྱི་ཕྲེད་དར་སོགས་འཁྱེར་ནས་ངོ་རྒོལ་བྱས་ཡོད་པ་དང་དེའི་རིང་རྒྱ་ནག་གཞུང་ཕྱོགས་ཀྱི་དགའ་བསུ་ཞུ་མཁན་ཚོ་དང་གདོང་ཐུག་བྱུང་བའི་གནས་ཚུལ་ཐོན་ཡོད་འདུག