པ་ཀི་སི་ཐན་དུ་འབར་རྫས་ཀྱི་གཏོར་རྒོལ།

• 
  2009-11-02

༄༅༎པ་ཀི་སི་ཐན་གྱི་གྲོང་ཁྱེར་རཱ་ལྦལ་པིན་ཌིའི་ནང་དྲག་སྤྱོད་པས་འབར་རྫས་ཀྱི་གཏོར་རྒོལ་བཏང་བའི་ནང་ད་བར་ཉུང་མཐར་མི་གྲངས་ཉི་ཤུ་རྩ་བཞི་ཙམ་གྱི་ཚེ་སྲོག་ཤོར་ཡོད་འདུག

དེ་ཡང་དེང་སྐབས་པ་ཀི་སི་ཐན་གཞུང་གིས་ཡུལ་དེའི་ནུབ་ཕྱོགས་ལྦ་ཛི་རི་སི་ཐན་ནང་དམག་དཔུང་མི་ཕོན་ཆེ་འགྲེམས་གཏོང་གིས་ས་ཁུལ་དེར་ཡོད་པའི་ཊ་ལི་སྦན་དྲག་སྤྱོད་པ་མེད་པ་བཟོ་ཐབས་ཀྱི་ལས་འགུལ་ཤུགས་ཆེ་ཞིག་སྤེལ་བཞིན་ཡོད་པ་མ་ཟད་དྲག་སྤྱོད་སྒྲིག་འཛུགས་དེའི་འགོ་འཁྲིད་ཧ་ཀི་མུ་ལ་མེ་སུརྡ་ཟེར་བའི་མི་དེ་བསད་པའམ་ཡང་ན་གསོན་པོར་འཛིན་བཟུང་ཐུབ་མཁན་སུ་འདྲ་ཞིག་བྱུང་རུང་དེ་ལ་གཞུང་ནས་ཨ་རིའི་ཌོ་ལར་ས་ཡ་ལྔ་གསོལ་རས་སྤྲོད་རྒྱུ་ཡིན་པའི་གསལ་བསྒྲགས་བྱས་པ་ནས་བཟུང་པ་ཀི་སི་ཐན་གྱི་ནང་འབར་རྫས་ཀྱི་གཏོར་རྒོལ་གྱི་གནས་ཚུལ་གཅིག་མཇུག་གཉིས་མཐུད་ཡོང་བཞིན་པ་ལྟར་འདི་ཚེས་གཉིས་ཉིན་གྲོང་ཁྱེར་ར་ལྦལ་པིན་ཌིའི་ནང་བྱུང་བའི་གཏོར་རྒོལ་དེའི་ནང་ད་བར་མི་གྲངས་ཉི་ཤུ་རྩ་བཞི་རྐྱེན་འདས་སུ་གྱུར་ཡོད་པ་མ་ཟད་མི་གྲངས་ཆེས་མང་པོར་རྨས་སྐྱོན་ཕོག་ཡོད་སྟབས་ཚེ་སྲོག་ཤོར་མཁན་གྱི་གྲངས་འབོར་དེ་རིམ་པས་མང་དུ་འགྲོ་རྒྱུ་ཡིན་སྐོར་གྲོང་ཁྱེར་སྤྱི་ཁྱབ་པ་ཨིམ་རྡ་རྡུ་ལ་སྦོ་སལ་གྱིས་གནས་ཚུལ་ཕྱི་བསྒྲགས་བྱས་པ་དང་སྦྲགས་ད་ལམ་གྱི་གཏོར་རྒོལ་དེ་དངུལ་ཁང་ཞིག་གི་མདུན་དུ་བྱུང་བའི་རྐྱེན་གྱིས་རྐྱེན་འདས་སུ་གྱུར་མཁན་རྣམས་ཞི་བའི་མི་སེར་ཤ་ཏག་ཡིན་པ་མ་ཟད་དེའི་ནང་དངུལ་ཁང་ནས་རྒས་ཕོགས་ཞུ་བར་ཡོང་མཁན་གྱི་ལོ་ན་མཐོ་པོར་སླེབས་པའི་མི་སྣའི་གྲས་ཀྱང་གང་ཙམ་ཡོད་པའི་འགྲེལ་བརྗོད་བྱས་འདུག