Gu ཡི་གནད་དོན་གླེང་སའི་དྲ་གནས་བཀག་འདུག

• 
  2012-07-27

༄༅།    །རྒྱ་ནག་གཞུང་འབྲེལ་ཤིང་ཧྰ་གསར་ཁང་གིས། རྒྱ་ནག་གི་གྲུང་ཅིང་གྲོང་ཁྱེར་སྤྱི་ཁྱབ་པ་Bo Xilai ཡི་བཟའ་ཟླ་Gu Kailai ལ་དབྱིན་ཇིའི་ཚོང་པ་ཞིག་ལ་དུག་བསྟེར་ཏེ་བསད་པའི་ནག་ཉེས་བཙུགས་པའི་སྐོར་བཀོད་སྤེལ་བྱས་པར་བརྟེན་ནས། འདི་རིང་རེས་གཟའ་པ་སངས་སྔ་དྲོ་རྒྱ་ནག་ནང་གི་ཆེས་དར་སོ་ཆེ་བའི་དྲ་གནས་Sina Weibo ཞེས་པའི་ཐོག་Gu ཡི་གནས་ཚུལ་དེ་རྒྱ་ནག་ནང་གི་གླེང་སློང་བྱ་ཡུལ་གྱི་གནད་དོན་གཙོ་བོ་ཨང་གསུམ་པར་གྱུར་ཡོད་ཅིང༌། འོན་ཀྱང་དོ་སྣང་ཅན་གྱི་མི་མང་གིས། Sinna Weibo དྲ་གནས་ཐོག་Gu ཡི་འགྱོད་དོན་དང་འབྲེལ་བའི་བསམ་ཚུལ་བཀོད་སྤེལ་བྱེད་ཐབས་བྱེད་པའི་སྐབས། དྲ་གནས་དེའི་ཐོག་ནས། སྐབས་དོན་ཁྲིམས་ལུགས་དང་སྲིད་ཇུས་ལ་བརྟེན་པའི་དྲ་གནས་སྒོ་ཕྱེ་མ་ཐུབ་པར་བཟོད་སྲན་གནང་རོགས་ཞེས་པའི་ཡི་གེ་ཐོན་ཡོང་བ་མ་ཟད། དྲ་གནས་དེའི་ཐོག་Gu Kailai ཡི་མིང་ཚིག་ཡིག་འབྲུ་གསུམ་པོ་དེ་ཡང་འཚོལ་མ་ཐུབ་པར་བཟོས་ཏེ། ཁོང་གི་མིང་ཙམ་ཡང་དྲ་གནས་དེའི་ཐོག་ནས་མཐོང་རྒྱུ་མེད་པ་བཀག་འགོག་བྱས་ཡོད་པ་རེད།