རྒྱ་ནག་ཟི་ཁྲོན་དུ་ས་ཡོམ་གནོད་འཚེ་ཕོག་མིས་ངོ་རྒོལ་བྱས་པ།

• 
  2009-02-20

༄༅༎ན་ནིང་ཕྱི་ཟླ་ལྔ་པའི་ཚེས་བཅུ་གཉིས་ཉིན་རྒྱ་ནག་གི་ཟི་ཁྲོན་ཞིང་ཆེན་ཁུལ་དུ་ས་ཡོམ་གྱི་གནོད་འཚེ་ཚབས་ཆེའི་འོག་གོད་ཆགས་ཕོག་པའི་མི་དམངས་ཉིས་བརྒྱ་ལྷག་གིས་ཁོང་ཚོའི་ས་ཁུལ་ནང་འཛུགས་སྐྲུན་སླར་གསོའི་ཆེད་དུ་དམིགས་པའི་མ་དངུལ་རྣམས་ས་གནས་དཔོན་རིགས་ཀྱིས་བེད་སྤྱོད་ལོག་པ་གཏོང་གི་ཡོད་པའི་ངོ་རྒོལ་བྱས་པའི་རྗེས་ཉེན་རྟོག་པ་དང་དྲག་པོའི་འཐབ་འཁྲུག་བྱུང་སྟེ་ངོ་རྒོལ་བྱེད་མཁན་མི་ཞིག་དོ་དམ་བཀག་ཉར་འོག་འདས་གྲོངས་སུ་ཕྱིན་ཡོད་པ་རེད།

དེ་རིང་ཧོང་ཀོང་ནང་རྟེན་གཞི་བྱས་པའི་འགྲོ་བ་མིའི་ཐོབ་ཐང་དང་དམངས་གཙོ་ཚོགས་པས་གསལ་བསྒྲགས་ཤིག་སྤེལ་བའི་ནང་རྒྱ་ནག་གི་ཟི་ཁྲོན་ཞིང་ཆེན་ནང་ན་ནིང་ས་ཡོམ་གོད་ཆགས་ཚབས་ཆེ་ཤོས་བྱུང་ཡུལ་པའོ་ལིན་གྲོང་ཚོའི་ནང་རེས་གཟའ་ལྷག་པ་དང་ཕུར་བུ་ཉིན་གཉིས་རིང་ཉེན་རྟོག་པ་དང་ས་གནས་མི་དམངས་གོད་ཆགས་ཕོག་པའི་བར་འཐབ་འཁྲུག་བྱུང་བ་ཡིན་ཞིང་པའོ་ལིན་ས་གནས་གཞུང་གི་དཔོན་རིགས་ཤིག་གིས་ཀྱང་ཕེ་རན་སི་གསར་འགྱུར་ལས་ཁང་ལ་ཁ་པར་བརྒྱུད་དེ་མི་དམངས་དང་ཉེན་རྟོག་པའི་བར་དྲག་པོའི་འཐབ་འཁྲུག་ཀྱི་དོན་རྐྱེན་བྱུང་ཡོད་པ་དང་མི་གཅིག་རྐྱེན་ལམ་དུ་ཕྱིན་པའི་གནས་ཚུལ་བདེན་པ་ཡིན་པ་ངོས་ལེན་བྱས་ཡོད་ཀྱང་མི་རྐྱེན་ལམ་དུ་ཕྱིན་པ་དེ་ནི་འཐབ་འཁྲུག་ཀྱི་དོན་རྐྱེན་དེ་དག་དང་འབྲེལ་བ་མེད་པའི་ནན་བརྗོད་བྱས་ཡོད་པ་རེད། གོང་གསལ་འགྲོ་བ་མིའི་ཐོབ་ཐང་ཚོགས་པ་དེས་གསུང་ན་རྒྱ་ནག་གཞུང་གི་རོགས་རམ་མ་དངུལ་རྣམས་གོད་ཆགས་ཕོག་པའི་མི་དམངས་ཚོའི་སྡོད་ཁྱིམ་རྩ་གཏོར་ཕྱིན་པ་རྣམས་འཛུགས་སྐྲུན་བྱ་རྒྱུའི་ཆེད་དུ་ཁོང་ཚོར་ཐོབ་དགོས་པ་ཡིན་ཡང་འབྲེལ་ཡོད་དཔོན་རིགས་ནས་ཁོང་ཚོར་རོགས་རམ་མ་སྤྲད་པར་འགྲོ་ལམ་བསྐྱར་གསོའི་ཐོག་འགྲོ་གྲོན་གཏོང་གི་ཡོད་པའི་གནས་ཚུལ་ཤེས་རྟོགས་བྱུང་བའི་རྗེས་ས་གནས་གྲོང་གསེབ་མི་དམངས་རྣམས་རེས་གཟའ་ལྷག་པའི་ཉིན་པའོ་ལིང་ནང་འདུ་འཛོམས་ཀྱིས་ངོ་རྒོལ་ལས་འགུལ་སྤེལ་བའི་སྐབས་ཉེན་རྟོག་པས་ངོ་རྒོལ་བ་ཁ་ཐོར་བཏང་བ་མ་ཟད་མི་གསུམ་འཛིན་བཟུང་བྱས་པ་དང་མི་དེ་གསུམ་ཉེན་རྟོག་ལས་ཁང་དུ་དོ་དམ་བཀག་ཉར་བྱས་པའི་སྐབས་གློ་བུར་དུ་མི་གཅིག་འདས་གྲོངས་སུ་ཕྱིན་ཡོད་པ་རེད།