སྲིད་སྐྱོང་མཆོག་གི་ཡོ་རོབ་དང་ཁེ་ན་ཌའི་ནང་གཟིགས་སྐོར།

• 
  2017-11-08

ཕྱི་ཟླ་༡༡ཚེས་༨ཉིན་བོད་མིའི་སྒྲིག་འཛུགས་ཀྱི་དྲ་རྒྱའི་སྟེང་གནས་ཚུལ་སྤེལ་བ་ལྟར་ན།ཟླ་བ་འདིའི་སྤྱི་ཚེས་༨ནས་ཚེས་༢༥བར་ཉིན་གྲངས་བཅུ་བདུན་རིང་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་གིས་ཡོ་རོབ་ཀྱི་ཌེན་མག་ནས་འགོ་བཙུགས་ཏེ་ནོར་ཝེ་དང་སུཝི་ཌེན།དབྱིན་ཇི་།དེ་བཞིན་ཁེ་ན་ཌ་བཅས་ཀྱི་ནང་གཞུང་འབྲེལ་ཕྱོགས་ཕེབས་འགོ་བཙུགས་ཡོད་པ་རེད།
དེ་བཞིན་ཁེ་ན་ཌའི་ནང་རྒྱལ་ས་ཨོ་ཊ་ཝ་དང་།ཊོ་རོན་ཊོ་།ཧེ་ལི་ཧྥ་ཁི་སི་གྲོང་ཁྱེར་བཅས་སུ་ཕེབས་རྒྱུ་དང་།དེ་མིན་ཧ་ལི་ཧྥ་ཁི་སི་རྒྱལ་སྤྱིའི་བདེ་འཇགས་གླེང་སྟེགས་ཚོགས་འདུར་མཉམ་ཞུགས་གནང་རྒྱུ་དང་།ཚོགས་འདུ་དེའི་ནང་གཙོ་བོ་བྱང་ཨ་མེ་རི་ཀའི་ཕྱི་སྲིད་དང་རྒྱལ་སྲུང་སྐོར་བགྲོ་གླེང་གནང་གི་ཡོད་པ་རེད།
གཞན་ཡང་། བོད་མི་མང་སྤྱི་འཐུས་སྐུ་ཚབ་ཚོགས་ཆུང་ཞིག་ཀྱང་ཡོ་རོབ་ཏུ་གཟིགས་སྐོར་གནང་རྒྱུ་དང་།སྐབས་བཅུ་དྲུག་པའི་བོད་མི་མང་སྤྱི་འཐུས་སྒྲོལ་མ་ཚེ་རིང་ལགས་ཀྱིས་སྣེ་ཁྲིད་འོག་སྤྱི་འཐུས་ཨ་ཀྲུག་ཚེ་བརྟན་ལགས་དང་།སྤྱི་འཐུས་ཟླ་བ་ཕུན་སྐྱིད་ལགས།སྤྱི་འཐུས་གེ་བ་ཚང་ངག་དབང་ཐར་པ་ལགས་བཅས་ཀྱིས་ཟླ་བ་འདིའི་སྤྱི་ཚེས་༡༡ནས་༣༠བར་ཡོ་རོབ་ཀྱི་རྦེལ་ཇམ་དང་ཕརཱནས།སུད་སི།ནེ་རྡིར་ལན་ཌི་བཅས་རྒྱལ་ཁབ་བཞིའི་ནང་གཟིགས་སྐོར་གནང་རྒྱུ་དང་།དེ་ནི་སྐབས་ ༡༦ པའི་བོད་མི་མང་སྤྱི་འཐུས་རྣམས་ཕྱི་ནང་ཡུལ་གྲུ་ཁག་ཏུ་ཕྱིན་ནས་།གྲོས་ཚོགས་འཐུས་མི་སོགས་གནད་ཡོད་མི་སྣ་དང་མཇལ་འཕྲད་ཀྱིས་བོད་དོན་རྒྱབ་སྐྱོར་སྔར་ལྷག་པ་ཐོབ་ཐབས་ཆེད་ཕྱོགས་ཕེབས་གནང་རྒྱུའི་ལས་རིམ་གཞིར་བཞག་ཐོག་ཡིན་པ་བོད་མིའི་སྒྲིག་འཛུགས་ཀྱི་དྲ་རྒྱའི་ཐོག་གནས་ཚུལ་སྤེལ་འདུག།   
གསར་འགོད་པ་ལྕགས་མོ་མཚོ།