རང་བཙན་ཞེས་པ་བསམ་བློ་ཡག་པོ་གཏོང་དགོས་པ་ཞིག་ཡིན།

• 
  2014-09-23

༧གོང་ས་མཆོག་གིས་བོད་ཀྱིས་རང་སྐྱོང་གི་ཐོབ་ཐང་རྩོད་ལེན་བྱས་ཏེ་དཔལ་འབྱོར་གྱི་ཁེ་ཕན་ཆེ་བ་ཡོད་པ་ངོས་འཛིན་བྱེད་ཀྱི་ཡོད་གསུངས་འདུག
དེ་ཡང་ཕྱི་ཟླ་དགུ་པའི་ཚེས་༢༢ ཉིན་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་རྒྱ་གར་གྱི་རྒྱལ་ས་ལྡི་ལིར་རྒྱ་གར་གྲོས་ཚོགས་ཀྱི་འཐུས་མི་དང་ཕྱི་རྒྱལ་གཞུང་ཚབ་ཁག་གཅིག་ལ་འཛམ་གླིང་གཅིག་དང་། འཆར་སྣང་གཅིག མ་འོངས་གཅིག་ཅེས་པའི་བརྗོད་གཞིའི་ཐོག་བཀའ་སློབ་སྩལ་གནང་ཡོད་པ་དང་། དེའི་རྗེས་རྒྱ་གར་གྱི་སྲིད་བློན་ཟུར་པ་སྐུ་ཞབས་Manmohan Singhདང་མཇལ་འཕྲད་ཀྱང་གནང་ཡོད་པ་རེད། སྐབས་དེར་༧གོང་ས་མཆོག་གི་བཀའ་སློབ་ཞུ་བར་བཅར་བའི་མི་སྣ་ཞིག་གིས་ཁོང་སྒེར་ངོས་ནས་བོད་ལ་རང་དབང་འཐོབ་རྒྱུའི་རེ་བ་ཡོད་པའི་སྐོར་གྱི་གནས་ཚུལ་ཞུས་ཏེ་དེའི་ཐོག་༸གོང་ས་༸སྐྱབས་མགོན་ཆེན་པོ་མཆོག་ལ་དགོངས་ཚུལ་ཇི་ཡོད་ཀྱི་བཀའ་འདྲི་ཞུས་པའི་སྐབས། ༧གོང་ས་མཆོག་གིས། སྤྱིར་བཏང་ཆབ་སྲིད་ཐོག་ནས་རང་བཙན་ཞེས་པ་འདི་ནི་བསམ་བློ་ཡག་པོ་གཏོང་དགོས་པ་ཞིག་ཡིན་ཞིང་། ངོས་ལ་ཆ་མཚོན་ན། Scotland མི་དམངས་ཀྱིས་མང་མོས་འོས་བསྡུའི་ཐོག་ནས་Scotland དབྱིན་ཇིའི་མངའ་འོག་ནས་རང་བཙན་བྱ་རྒྱུ་མིན་པའི་ཐག་གཅོད་བྱུང་བའི་གནས་ཚུལ་ཐོས་སྐབས་ཧ་ཅང་དགའ་པོ་བྱུང་། ང་ཚོ་བོད་མིའི་ནང་དུ་ཡང་ཁག་ཅིག་གིས་དངོས་ཡོད་གནས་སྟངས་ལ་བསམ་བློ་མ་བཏང་བར་རང་བཙན་དགོས་ཞེས་སེམས་ཚོར་ཐོག་ནས་གླེང་སློང་བྱེད་མཁན་ཡོང་གི་འདུག དེ་བཞིན་རྒྱ་གར་ནང་ལའང་སྐད་ཡིག་དང་རིག་གཞུང་འདྲ་མིན་གྱི་མི་རིགས་མཉམ་གནས་བྱེད་བཞིན་ཡོད་དང་། དེར་བརྟེན་ཁོང་ཚོར་ཐོབ་ཐང་འདྲ་མཉམ་དང་ཁྲིམས་ལུགས་དབང་བསྒྱུར་གྱི་ལམ་ལུགས་དགོས་རྒྱུ་ཧ་ཅང་གལ་ཆེན་པོ་རེད། བོད་ལ་མཚོན་ན། ཆོས་ཕྱོགས་ཀྱི་ཆ་ནས་རིག་གཞུང་ཧ་ཅང་ཕྱུག་པོ་ཡོད་ཀྱང་ཕྱིའི་དངོས་པའི་ཡར་རྒྱས་རྗེས་ལུས་ཡིན་ཞིང་། དེ་ཡང་དངོས་ཡོད་གནས་ཚུལ་ནི། བོད་མི་མང་པོ་ཞིག་ཁྲིམས་འགལ་ཐོག་ནས་ཕྱི་རྒྱལ་གྱི་རྒྱལ་ཁབ་ཁག་ནང་འགྲོ་དང་འགྲོ་བཞིན་ཡོད་པ་དེ་དག་མང་ཆེ་བ་ནི་ནང་ཆོས་དོན་དུ་གཉེར་ནས་འགྲོ་བ་ཞིག་མིན་པར་དཔལ་འབྱོར་ཁོ་ནའི་ཆེད་དུ་འགྲོ་གི་ཡོད་པ་རེད། དེར་བརྟེན་བོད་དེ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞིའི་འོག་མིང་དོན་མཚུངས་པའི་རང་སྐྱོང་གི་ཐོབ་ཐང་རྩོད་ལེན་བྱས་ཏེ་བོད་ལ་དཔལ་འབྱོར་གྱི་རོགས་རམ་ཁེ་ཕན་ཆེ་བ་ཡོད་པ་ངོས་འཛིན་བྱེད་ཀྱི་ཡོད་ལ་དེ་ཡང་བོད་ཀྱི་ཆོས་དང་རིག་གཞུང་སྲུང་སྐྱོབ་ཡོང་ཆེད་དོན་དམ་གྱི་བོད་མི་ཚོར་རང་དབང་དགོས་པ་ངོས་འཛིན་གནང་གི་ཡོད་ཅེས་བཀའ་བསྩལ་འདུག
གསར་འགོད་པ་ཉི་མ་གཡུ་སྒྲོན།