བོད་མིའི་ངོས་ནས་བོད་རྒྱ་འབྲེལ་ལམ་བསྐྱར་གསོའི་གྲ་སྒྲིག་ཡོད།

• 
  2015-04-10

༧གོང་ས་མཆོག་གིས་རྒྱ་ནག་གཞུང་གིས་བརྡ་ལན་སྤྲད་ཚེ་བོད་མིའི་ངོས་ནས་འབྲེལ་ལམ་གྱི་སྒོ་མོ་བསྐྱར་གསོ་བྱེད་རྒྱུར་གྲ་སྒྲིག་ཆ་ཚང་ཡོད་པ་གསུངས།
དེ་ཡང་བོད་ཀྱི་བླ་ན་མེད་པའི་དབུ་ཁྲིད་༧གོང་ས་༧སྐྱབས་མགོན་ཆེན་པོ་མཆོག་གིས་དེང་སྐབས་ཉི་ཧོང་གི་ས་གནས་ཁག་ཅིག་ནང་ཆོས་འབྲེལ་དང་མང་ཚོགས་ལ་གསུང་བཤད་གནང་ནས་མཛད་འཕྲིན་འདྲ་མིན་བསྐྱངས་གནང་བཞིན་པ་དང་། འདི་ཚེས་བརྒྱད་ཉིན་The Asahi Shimbunཞེས་པའི་གསར་ལས་ཁང་ནས་བོད་རྒྱ་འབྲེལ་ལམ་སོགས་ཀྱི་སྐོར་བཅར་འདྲིའི་སྐབས། ༧གོང་ས་མཆོག་གིས། ང་ཚོའི་ངོས་ནས་དབུ་མའི་ལམ་གྱི་ཐོག་ནས་དཀའ་ངལ་སེལ་ཐབས་བྱེད་རྒྱུར་འགྱུར་བ་གང་ཡང་མེད་། གལ་སྲིད་རྒྱ་ནག་གཞུང་གིས་བརྡ་ལན་སྤྲད་པ་ཡིན་ན་འབྲེལ་ལམ་གྱི་སྒོ་མོ་བསྐྱར་གསོ་བྱེད་རྒྱུར་ང་ཚོའི་ངོས་ནས་གྲ་སྒྲིག་ཆ་ཚང་ཡོད་ཅེས་བཀའ་ལན་གནང་འདུག སྤྱིར་བཏང་ང་ཚོས་རང་བཙན་རྩོད་ཀྱི་མེད་པ་འཛམ་གླིང་ཡོངས་ནས་ཤེས་གསལ་རེད། འོན་ཀྱང་ད་ལྟའང་རྒྱ་ནག་གི་བལྟ་བ་མཁྲེགས་འཛིན་ཅན་གྱི་དཔོན་རིགས་འགའ་ཤས་ཀྱིས་ང་ཚོ་ཁ་བྲལ་བ་རེད་ཅེས་སྐྱོན་འཛུགས་བྱེད་ཀྱི་ཡོད་བ་རེད། ཕྱོགས་གཞན་ཞིག་ནས་བློ་གཟུར་བོར་གནས་ནས་བསམ་བློ་གུ་ཡངས་ཅན་གྱི་དཔོན་རིགས་ཁག་ཅིག་གིས་གཉིས་མོས་ཀྱི་ཐོག་ནས་དཀའ་རྙོག་སེལ་ཐབས་བྱེད་རྒྱུར་འདོད་པ་ཡོད་རེད་ཅེས་གསུངས་འདུག དམིགས་བསལ་སྐུའི་ཡང་སྲིད་སྐོར་བཀའ་འདྲི་ཞུས་པའི་བཀའ་ལན་དུ་། ད་ལྟའི་ཆར་དགུང་གྲངས་བརྒྱད་ཅུ་ཐམ་པར་ཕེབས་ཀྱི་ཡོད་ཀྱང་། སྐུ་ཁམས་ཧ་ཅང་ཡག་པོ་ཡོད་། ད་དུང་ལོ་ངོ་ཉི་ཤུ་ཙམ་འཚོ་གནས་ཐུབ་པའི་རེ་བ་ཡོད་། གང་ལྟར་ཡང་སྲིད་སྐོར་གཙོ་བོ་བོད་མི་མང་གི་འདོད་པ་གཞིར་བཟུང་འགྲོ་རྒྱུ་རེད་ལ་མ་འོངས་པའི་ཡང་སྲིད་སྐོར་༧གོང་ས་མཆོག་དགུང་གྲངས་དགུ་བཅུ་ཐམ་པར་ཕེབས་པའི་སྐབས་བཀའ་བསྡུར་ལྷུག་པོ་ཡོང་རྒྱུ་ཡིན་ལུགས་བཀའ་གནང་ཡོད་པ་རེད།
དེ་སྔ་ལོ་ངོ་འགའ་ཤས་གོང་གི་རྒྱ་ནག་གི་འགོ་ཁྲིད་ཚོའི་ལས་དོན་སྤེལ་ཕྱོགས་དང་བསྡུར་ན། ད་ལྟའི་སྲིད་འཛིན་ཞེ་ཅིན་ཕེན་གྱིས་འགོ་ཁྲིད་པའི་སྲིད་གཞུང་འོག་འགྱུར་བ་གང་འཚམས་ཕྱིན་ཡོད་པ་ནི་ད་ལྟའི་འགོ་ཁྲིད་ཀྱི་ངོས་ནས་དངོས་ཡོད་གནས་སྟངས་ཀྱི་ཐོག་ནས་ལྐོག་ཟ་རུལ་སུངས་མེད་པ་བཟོ་ཐབས་སུ་གདོང་ལེན་ཤུགས་ཆེན་པོ་བྱེད་ཀྱི་འདུག་ཅེས་བཀའ་གནང་འདུག

གསར་འགོད་པ་རིག་འཛིན་ཆོས་སྒྲོན།