བོད་མིའི་སྒྲིག་འཛུགས་ཀྱི་འགན་འཛིན་ཁག་ཅིག་གསར་བསྐོ།

• 
  2012-03-01

༄༅༎བཙན་བྱོལ་བོད་མིའི་སྒྲིག་འཛུགས་ཀྱི་ཆེས་མཐོའི་འགན་འཛིན་ཁག་ཅིག་གསར་བསྐོ་གནང་ཡོད་པའི་གནས་ཚུལ་འདུག
བཙན་བྱོལ་བོད་གཞུང་གི་དྲ་རྒྱའི་ནང་ད་རིང་གནས་ཚུལ་སྤེལ་བར་གཞིགས་ན། ད་རིང་ཕྱི་༣ཚེས་༡ཉིན་བཙན་བྱོལ་བོད་མིའི་སྒྲིག་འཛུགས་ཀྱི་ལས་ཁུངས་ཆེ་ཁག་ནང་སྲིད་དང་། ཕྱི་དྲིལ་གཉིས་ཀྱི་དྲུང་ཆེ་གཉིས་གསར་དུ་བསྐོ་བཞག་གིས་དམ་འབུལ་གནང་ཡོད་འདུག དེ་ཡང་ནང་སྲིད་དྲུང་ཆེ་དངོས་གྲུབ་རྡོ་རྗེ་ལགས་བྷ་ར་སིལ་གྱི་སྐུ་ཚབ་དོན་གཅོད་དུ་འཕོ་བསྒྱུར་ཕྱིན་པའི་ཚབ་ཏུ་བསོད་ནམས་སྟོབས་རྒྱལ་ལགས་ནང་སྲིད་དྲུང་ཆེར་བསྐོ་གཞག་གནང་ཡོད་ལྟར་ད་རིང་སྔ་ཐོག་ནང་སྲིད་བཀའ་བློན་རྒྱ་རི་སྒྲོལ་མ་ལགས་སྤྲོད་དཔང་དང་། ༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེར་མཇལ་དར་ཕུལ་ནས་དམ་འབུལ་གནང་ཡོད་འདུག དེ་དང་ཕྱོགས་མཚུངས་ཕྱི་དྲིལ་དྲུང་ཆེ་ཐུབ་བསྟན་བསམ་འཕེལ་ལགས་ཉེ་ཆར་ཆབ་སྲིད་ཉམས་ཞིབ་ཁང་གི་འགན་འཛིན་དུ་འཕོས་པའི་ཚབ་ཏུ་དྲུང་ཆེ་གསར་པ་བཀྲ་ཤིས་ལགས་རྟེན་འབྲེལ་མཛད་སྒོ་དང་སྦྲགས་དམ་བཅའ་འབུལ་བཞེས་གནང་ཡོད་འདུག ཡང་ཕྱི་ཟླ་༢་ཚེས་༢༨ཉིན་བཀྲ་ཤིས་རྒྱ་མཚོ་ལགས་ཆེས་མཐོའི་ཁྲིམས་ཞིབ་ཁང་གི་དྲུང་ཆེར་བཀོད་ཁྱབ་གནང་བ་ལྟར་ཁྲིམས་ཞིབ་ཆེ་བ་ངག་དབང་འཕེལ་རྒྱལ་ལགས་མདུན་དམ་བཅའ་འབུལ་བཞེས་གནང་ཡོད་པ་བཅས་སྲི་ཞུའི་ལས་བྱེད་ཁག་ཅིག་གསར་དུ་བསྐོ་གཞག་བྱུང་ཡོད་པའི་གནས་ཚུལ་ཐོན་འདུག།