ཐེ་ཝན་དུ་བོད་དོན་དྲིལ་བསྒྲགས་ཆེད་བོད་རང་དབང་གི་རྐང་འཁོར་སྐོར་སྐྱོད་ཀྱི་ལས་འགུལ་འགོ་འཛུགས།

• 2025-02-05

ཟླ་ ༢ ཚེས་ ༥ ལྷག་དཀར་ཉིན་མོ་དང་བསྟུན་ཐེ་ཝན་གྱི་རྒྱལ་ས་ཐའི་པེ་ (Taipei) ནང་། བོད་དང་ཐེ་ཝན་འགྲོ་བ་མིའི་ཐོབ་ཐང་འབྲེལ་མཐུད་ཁང་ (Human Rights Network for Tibet and Taiwan) གི་གོ་སྒྲིག་འོག  བོད་རང་དབང་ཆེད་རྐང་འཁོར་སྐོར་སྐྱོད་ལས་འགུལ་གྱི་ཉིན་དང་པོ་དེ་བཞིན་དངོས་སུ་དབུ་འཛུགས་གནང་ཡོད། དེ་ཡང་ཐོག་མར་ལས་འགུལ་བ་རྣམས་ཐེ་ཝན་དུ་རྟེན་གཞི་བྱས་པའི་ ༢།༢།༨ སྐྱེད་མོའི་ཚལ་དུ་འདུ་འཛོམས་ཀྱིས་ལག་ཏུ་བོད་ཀྱི་རྒྱལ་དར་འཕྱར་བཞིན་ལས་འགུལ་དབུ་འཛུགས་གནང་ཞིང་། ཐེ་ཝན་གྲོས་ཚོགས་ཀྱི་མདུན་ཐང་དུ་གསར་འགོད་ལྷན་ཚོགས་སྐོང་ཚོགས་གནང་རྗེས་དེ་སྔའི་འཛམ་གླིང་ནང་གི་ཐོག་རྩེགས་ཁང་པ་ཆེ་ཤོས་སུ་གྲགས་པ་ ༡།༠།༡ མདུན་དུ་ལས་འགུལ་མཇུག་སྒྲིལ་ཡོད།

ཐེངས་འདིའི་བོད་རང་དབང་ཀྱི་ཆེད་རྐང་འཁོར་སྐོར་སྐྱོད་ལས་འགུལ་གྱི་གསར་འགོད་ལྷན་ཚོགས་སྐབས། དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་གྲུབ་ལགས་དང་། ཐེ་ཝན་གྲོས་ཚོགས་འཐུས་མི་སྐུ་ཞབས་ (Puma SHEN ) དང་ལྕམ་ (Pei-yu CHEN) རྣམ་གཉིས། ཐེ་ཝན་གཞུང་འབྲེལ་མ་ཡིན་པའི་ཚོགས་པ་ཁག་ཅིག་གི་འགན་འཛིན་རྣམས་ནས་བོད་དོན་དང་འབྲེལ་བའི་གཏམ་བཤད་གནང་འདུག

གཞན་ཡང་ཐེངས་འདིའི་ལས་འགུལ་དབུ་འབྱེད་སྐབས་དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་གྲུབ་ལགས་ཀྱིས། བོད་རང་དབང་ཆེད་རྐང་འཁོར་སྐོར་སྐྱོད་ཀྱི་ལས་འགུལ་སྤེལ་མཁན་རྣམས་ལ་ཐུགས་རྗེ་ཆེ་ཞུས་པ་དང་སྦྲགས། འཛམ་གླིང་ས་ཕྱོགས་གང་སར་གནད་སྡོད་བོད་མི་རྣམས་ནས་བོད་ནང་དུ་ཡོད་པའི་བོད་མི་རྣམས་ཀྱི་མགྲིན་ཚབ་པ་གནང་སྟེ། རང་ཉིད་གནས་ཡུལ་ས་ཁུལ་ཁག་ཏུ་ལས་འགུལ་འདྲ་མིན་སྤེལ་ཏེ། བོད་ཀྱི་འཐབ་རྕོད་དེ་བཞིན་རྒྱུན་གནས་ཐུབ་པ་བྱ་རྒྱུ་དང་། ལྷག་པར་དུ་བོད་དོན་ལས་འགུལ་བ་རྣམས་ལ་རྒྱབ་སྐྱོར་གནང་རྒྱུ་ཤིན་ཏུ་གལ་འགངས་ཆེན་པོ་ཡིན་པ་གསུངས་འདུག

གཞི་རྩའི་ཐེངས་འདིའི་ཐེ་ཝན་རྒྱལ་ས་(Taipei)ནང་བོད་རང་དབང་རྐང་འཁོར་སྐོར་སྐྱོད་ཐེངས་ ༡༥ པའི་ཉིན་དང་པོའི་ཐོག བོད་དང་ཐེ་ཝན་འགྲོ་བ་མིའི་ཐོབ་ཐང་ལས་འགུལ་བ་དང་། ཐེ་ཝན་གྲོས་ཚོགས་འཐུས་མི་འཐུས་མི་ཁག དེ་བཞིན་ཐེ་ཝན་བོད་དོན་རྒྱབ་སྐྱོར་ཚོགས་པའི་ཚོགས་མི་ཁྱོན་མི་ ༣༠ ལྷག་ཙམ་ནས་མཉམ་ཞུགས་གནང་འདུག་ལ། ཉིན་རྒྱབ་ཏུ་ལས་འགུལ་བ་རྣམས་ནས་ཐེ་ཝན་ནང་གི་གཙུག་ལག་སློབ་གཉེར་ཁང་ཁག་ཅིག་ཏུ་ད་ལྟའི་བོད་ནང་གི་ཛ་དྲག་གནས་སྟངས་དང་། བོད་ཀྱི་གཞོན་ནུ་ལྷན་ཚོགས་ཀྱི་ཚོགས་པའི་ངོ་སྤྲོད་སོགས་བོད་དོན་དྲིལ་བསྒྲགས་དང་འབྲེལ་བའི་གཏམ་བཤད་ལས་རིམ་ཐོག་ལྷན་ཞུགས་གནང་འདུག །

གསར་འགོད་པ། བདེ་ཆེན་དབང་མོ།

རྩོམ་སྒྲིག་པ། བསྟན་འཛིན་བསྟན་སྐྱོང་།

དྲྭ་ཐོག་སྤེལ་མཁན། བདེ་སྐྱིད་ཀུན་སྒྲོལ།