འཛམ་གླིང་ནང་མི་མང་ས་ཡ་༤༦ཙམ་དབུལ་ཕོངས་འགྱུར་སྲིད་པ།

• 
  2009-04-19

༄༅༎འཛམ་གླིང་གི་འབྱོར་ལྡན་རྒྱལ་ཁབ་བརྒྱད་ཀྱི་ངལ་རྩོལ་བློན་ཆེན་རྣམས་ཨི་ཊ་ལིའི་རྒྱལ་ས་རཱོམ་དུ་ཉིན་གསུམ་རིང་ལྷན་ཚོགས་གནང་སྟེ་དཔལ་འབྱོར་ཉམ་རྒུད་འགྲོ་བཞིན་པའི་གནས་སྟངས་འོག་འཛམ་གླིང་གི་ཡུལ་གྲུ་ཁག་གི་དབུ་ཁྲིད་ཚོས་མི་མང་གི་འཚོ་བའི་མདུན་ལམ་ཤོར་བཞིན་པའི་དཀའ་ངལ་སེལ་ཐབས་གནང་དགོས་པའི་སྐུལ་མ་ཞུས་འདུག

རྒྱལ་སྤྱིའི་ངལ་རྩོལ་སྒྲིག་འཛུགས་ཀྱིས་ཚོད་དཔག་གནང་བར་གཞིགས་ན་འཛམ་གླིང་གི་དཔལ་འབྱོར་ཉམ་རྒུད་འགྲོ་བཞིན་པ་འདིས་འདི་ལོའི་ནང་མི་མང་ས་ཡ་ལྔ་བཅུ་ཙམ་གྱི་འཚོ་བའི་མདུན་ལམ་ཤོར་ཉེན་ཡོད་པ་དང་ཡང་འཛམ་གླིང་དངུལ་ཁང་གིས་མངོན་དཔག་གནང་བར་གཞིགས་ན་འཛམ་གླིང་མི་མང་ས་ཡ་བཞི་ཅུ་ཞེ་དྲུག་ཙམ་དབུལ་ཕོངས་ཉམས་ཐག་ཆགས་ཉེན་ཡོད་པའི་མངོན་དཔག་གནང་གི་ཡོད་པ་རེད། ལྷག་པར་དུ་མཁེ་གཉེར་ལས་ཁང་དངུལ་ཁང་ཁག་ལ་མ་དངུལ་ཁྲག་ཁྲིག་ཆེ་མོ་མང་པོ་གཞུང་གྲོན་གཏོང་བཞིན་པ་དང་སྒེར་པ་ཉམ་ཐག་ཁག་ལ་རོགས་ཕན་འདི་ཡིན་མ་འཐོབ་པའི་གནས་སྟངས་ལ་མི་མང་ཡིད་མ་རངས་པ་ཡོང་བཞིན་པ་དང་གྲོང་ཁྱེར་ཆེ་ཁག་ལོན་ཌོན་དང་རཱོམ།སྦར་ལིན་བཅས་ཀྱི་ནང་མི་མང་ཁྲི་ཚོང་མང་པོས་ཁྲོམ་གཞུང་ནང་རྔམ་སྟོན་ཁྲོམ་སྐོར་གནང་སྟེ་འདོད་བློ་མ་ཚིམ་པའི་རྣམ་པ་མངོན་པར་གསལ་བར་བྱེད་ཀྱི་ཡོད་པ་རེད། ཕེ་རན་སིའི་རྒྱལ་ས་པེ་རི་སི་རུ་ཕྱི་ཟླ་གསུམ་པའི་ཚེས་བཅུ་དགུ་ཉིན་མི་མང་ས་ཡ་བརྒལ་བས་ཁྲོམ་གཞུང་ནང་ངོ་རྒོལ་བྱས་སྐབས་ཉེན་རྟོག་པས་ངོ་རྒོལ་བ་མི་གྲངས་སུམ་བརྒྱ་བརྒལ་བ་འཛིན་བཟུང་དོ་དམ་བྱས་པ་མ་ཟད་ཉེན་རྟོག་པ་མི་གྲངས་དགུ་ཙམ་ལ་རྨས་སྐྱོན་བྱུང་ཡོད་པ་རེད༎