བོད་མི་དང་བོད་དོན་རྒྱབ་སྐྱོར་བ་ལྔ་བཙན་འཁྲིད་བྱས་འདུག

• 
  2008-08-10

༄༅༎ཁ་ས་གཟའ་ཉི་མའི་ཉིན་ ཇར་མ་ནིས་གནས་བཞིན་པའི་མཚན་ལ་པད་མ་སྒྲོལ་མ་ཕེ་ལིཛ་ཞུ་བའི་བོད་ཀྱི་བུད་མེད་དེ་ཡིས་གཙོས་པས་ ཨ་མི་རི་ཀ་བ་གཉིས་དང་ ཁེ་ན་ཌ་ནས་ཡིན་པའི་བོད་རང་བཙན་སློབ་ཕྲུག་ཚོགས་པའི་ཚོགས་མི་ལྔ་ཡིས་ གནམ་བདེ་སྒོ་མོ་ཆེའི་ཐང་ཆེན་སྟེང་རྒྱ་ནག་གིས་བོད་ཐོག་འཛིན་བཞིན་པའི་སྲིད་བྱུས་ཐད་ཞི་བའི་ལམ་ནས་ངོ་རྒོལ་གྱི་ལས་འགུལ་ཞིག་སྤེལ་སྐབས་ ཁོང་རྣམ་ཚོ་ རྒྱ་ནག་གི་པུ་ལི་སི་ཡིས་འཛིན་བཟུང་བྱས་ཏེ་བཙན་འཁྲིད་བྱས་ཡོད་པ་རེད་ ཇར་མ་ནིར་གནས་བཞིན་པའི་པད་མ་སྒྲོལ་མ་ལགས་ཀྱིས་གཙོས་པས་ བོད་རང་བཙན་སློབ་ཕྲུག་ཚོགས་པའི་ཚོགས་མི་ལྔ་ཡིས་ གནམ་བདེ་སྒོ་མོ་ཆེའི་ཐང་ཆེན་སྟེང་བོད་ཀྱི་རྒྱལ་དར་ནམ་མཁར་འཕྱར་ཐབས་བྱས་ཡོད་པ་རེད་ བོད་རང་བཙན་སློབ་ཕྲུག་ཚོགས་པའི་དྲ་རྒྱའི་ནང་ པད་མ་སྒྲོལ་མ་ལགས་ཡིན་པར་ངོ་ཐག་ཆོད་པའི་བོད་ཀྱི་བུད་མེད་དེ་བཞིན་ རྒྱ་ནག་གི་པུ་ལི་སིས་གནམ་བདེ་སྒོ་མོ་ཆེའི་ཐང་ལ་འདྲུད་བཞིན་པ་དང་ སྒྲིག་ཆས་མ་གྱོན་པའི་རྒྱ་ནག་གི་གསང་བའི་ལས་བྱེད་པ་ཚོས་ པད་མ་སྒྲོལ་མ་ལགས་ཀྱི་ལག་པ་ནས་ བོད་ཀྱི་རྒྱལ་དར་འཕྲོག་ཐབས་བྱེད་བཞིན་པ་གསལ་པོ་བཏོན་གྱི་ཡོད་པ་རེད་ བོད་རང་བཙན་སློབ་ཕྲུག་ཚོགས་པའི་ཞི་བའི་ངོ་རྒོལ་སྐོར་དངོས་སུ་དྲ་རྒྱའི་ནང་ དཔར་རྒྱབ་མཁན་ནི་ ཨ་མི་རི་ཀའི་གྲོང་ཁྱེར་ནིའུ་ཡོག་ནང་རྟེན་གཞི་བྱས་པའི་བོད་རང་བཙན་སློབ་ཕྲུག་ཚོགས་པའི་ཚོགས་མི་ ཇོན་ཧོ་ཁེ་ལྦར་ ཡིན་པ་དང་ ཁོང་གིས་ཨེ་པི་གསར་འགྱུར་ལས་ཁང་གི་བརྙན་འཕྲིན་སྡེ་ཚན་ལ་གསུངས་གསལ་ལྟར་ན་ པད་མ་སྒྲོལ་མ་ལགས་ཀྱིས་གཙོས་པས་ སློབ་ཕྲུག་ལྔ་པོ་དེ་དག་རྒྱ་ནག་གཞུང་གི་དཔོན་རིགས་ཚོས་ ཨ་མི་རི་ཀ་སོགས་སུ་བསྐྱོད་རྒྱུའི་གནམ་གྲུའི་ནང་བར་དུ་འཁྲིད་པ་མཐོང་ཡོད་པ་རེད༎