རྡོ་བསྐོས་ནག་བསུབ་བཏང།

• 
  2013-03-19

༄༅།    །ད་ལོའི་གསུམ་བཅུའི་དུས་དྲན་ཐེངས་ ༥༤ དང་སྟབས་བསྟུན། མཚོ་སྔོན་ཞིང་ཆེན་ཁྲི་འདུ་རྫོང་རྫ་སྟོད་ཤང་ཉ་མཚོ་ཁང་དམར་སྡེ་པའི་བོད་རིགས་མང་ཚོགས་ཀྱིས། ས་གནས་དེའི་བྲག་ངོས་ཤིག་ཏུ་༸རྒྱལ་བའི་ཞབས་བརྟན་གསོལ་འདེབས་ཏེ། གངས་རི་རྭ་བས་བསྐོར་བའི་ཞིང་ཁམས་སུ།། ཕན་དང་བདེ་བ་མ་ལུས་འབྱུང་བའི་གནས།། སྤྱན་རས་གཟིགས་དབང་བསྟན་འཛིན་རྒྱ་མཚོ་ཡིས།། ཞབས་པད་སྲིད་མཐའི་བར་དུ་བརྟན་གྱུར་ཅིག་ཅེས་པའི་ཚིགས་བཅད་ཅིག་བརྐོས་ཡོད་པར། རྫོང་སྲིད་གཞུང་གིས་ཡི་གེ་དེ་ཆབ་སྲིད་ཚོར་བ་རྣོ་བའི་ཚིག་ཅིག་ཡིན་ཚུལ་བཤད་དེ། འཕྲལ་དུ་དམག་མི་ཆེད་གཏོང་གིས་ནག་བསུབ་བཏང་འདུག
གནས་ཚུལ་ཤེས་རྟོགས་བྱུང་བར་གཞིགས་ན། ད་ལོའི་གསུམ་བཅུའི་དུས་དྲན་མ་སླེབས་ཙམ་ལ། རྒྱ་གཞུང་གིས་ཁྲི་འདུ་རྫོང་ས་གནས་མང་ཚོགས་བསྡུ་བསྐོང་བྱས་ཏེ། དུས་དྲན་སྐབས་མི་སུ་ཡིན་རུང་བོད་ཀྱི་ཕྱི་ཕྱོགས་སུ་ཁ་པར་དང་བརྒྱུད་ལམ་གང་རུང་ཐོག་འབྲེལ་བ་བྱ་མི་ཆོག་པ་དང་། ཁ་པར་ཐོག་འབྲེལ་བ་བྱེད་མཁན་ཚོར་རྒྱ་གཞུང་འབྲེལ་ཡོད་ལས་བྱེད་ཚོས་ལྐོག་ཉན་བྱེད་ཀྱི་ཡོད་པས་མ་ཟད། ལྐོག་ནས་ཕྱི་ལ་གནས་ཚུལ་སྐྱེལ་མཁན་ཚོར་སྲིད་གཞུང་གིས་ཁྲིམས་ཐག་ནན་པོ་་གཅོད་རྒྱུ་ཡིན་པའི་འཇིགས་སྐུལ་ཡང་བྱས་འདུག།