དབུས་བོད་ཀྱི་གཞོན་ནུ་ལྷན་ཚོགས་ཀྱི་ཐག་གཅོད་ལ་རྒྱབ་སྐྱོར།

• 
  2015-04-17

གསུམ་བཅུའི་དུས་དྲན་གྱི་རྙོག་གླེང་གི་རྐྱེན་པས་ས་གནས་ཚོགས་གཙོ་འཕྲལ་སེལ་གནས་དབྱུང་བཏང་བར་རྒྱབ་སྐྱོར་ཡོད་པ་འཁོད་འདུག
དེ་ཡང་ཚེས་༡༥ཉིན་ཨ་མི་རི་ཀའི་Minnesotaདང་། San Francisco,  རྒྱལ་ས་ཝ་ཤིན་ཀྲོན། Wisconsin Seattle དེ་བཞིན་Canadaའི་Vancouverདང་། Torontoགྲོང་ཁྱེར་བཅས་ས་གནས་ཁག་བདུན་གྱི་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོའི་མཚན་ཐོག་ནས། གྲོང་ཁྱེར་ནིའུ་ཡོག་དང་ནིའུ་ཇར་སི་ས་གནས་གཞོན་ནུ་ལྷན་ཚོགས་ཀྱི་ཚོགས་གཙོ་ངག་དབང་དཔལ་ལྡན་ལགས། དབུས་གཞོན་ནུ་ལྷན་ཚོགས་ནས་འཕྲལ་སེལ་གནས་དབྱུང་བཏང་བ་དེར་རྒྱབ་སྐྱོར་ཞུ་བཞིན་ཡོད་ལུགས་ དོན་ཚན་བཞི་ཅན་གྱི་གསར་འགོད་གསལ་བསྒྲགས་ཤིག་སྤེལ་ཡོད་པ་དང་། གཙོ་དོན་ངག་དབང་དཔལ་ལྡན་ལགས་ཀྱིས། གཞོན་ནུ་ལྷན་ཚོགས་ཀྱི་བོད་རང་བཙན་གྱི་གཞི་རྩའི་ལྟ་གྲུབ་ལ་རྒྱབ་འགལ་བྱས་ཐོག་ཚོགས་གཙོའི་ལས་དུས་རིང་གཅིག་སྒྲིལ་གྱི་ལས་དོན་ལ་གནོད་སྐྱོན་ཚབས་ཆེ་བཟོས་ཡོད་སྟབས་དབུས་བོད་ཀྱི་གཞོན་ནུ་ལྷན་ཚོགས་ཀྱི་ཐག་གཅོད་ལ་རྒྱབ་སྐྱོར་ཞུ་རྒྱུ་ཡིན་པ་སོགས་གསལ་འདུག
དེ་སྔོན་དབུས་བོད་ཀྱི་གཞོན་ནུ་ལྷན་ཚོགས་ཀྱིས་ངག་དབང་དཔལ་ལྡན་ལགས་ཚོགས་གཙོའི་ལས་ཁུར་ནས་འཕྲལ་སེལ་གནས་དབྱུང་བཏང་བའི་བཀོད་ཁྱབ་བཏང་པའི་རྗེས་ཕྱི་ཟླ་༣པའི་ཚེས་༣༡ཉིན་ནིའུ་ཡོག་དང་ནིའུ་ཇར་སི་ས་གནས་གཞོན་ནུའི་རྒྱུན་ལས་ཀྱིས་དབུས་ལ་ལན་འདེབས་ཕྱག་བྲིས་ཤིག་ཕུལ་ཡོད་པ་དང་། ཕྱག་བྲིས་དེའི་ནང་། འདི་ལོ་གསུམ་བཅུའི་དུས་དྲན་གྱི་རྙོག་གླེང་འདི་བཞིན་བོད་རྒྱལ་ཡོངས་རང་བཙན་ལྷན་ཚོགས་ཀྱི་ཚོགས་མི་ཡིན་ཟེར་མཁན་རེ་ཟུང་གིས་ཆེད་དུ་བཟོས་པ་ཞིག་ལས་ས་གནས་མང་ཚོགས་བརྒྱ་ཆ་༩༩རྡོག་རྩ་གཅིག་བསྒྲིལ་གྱིས་༧གོང་ས་མཆོག་དང་། བོད་མིའི་སྒྲིག་འཛུགས་ལ་དབུ་འོག་དཔུང་འདེགས་བྱེད་མཁན་ཡིན་པ་དང་། རྙོག་གླེང་འདིའི་ཐད་ཛ་དྲག་གི་ཚོགས་འདུ་ཞིག་སྐོང་ཚོགས་སྐབས་མང་མོས་ཐོག་ད་ལྟའི་ཚོགས་གཙོས་དགོངས་པ་ཞུ་མི་དགོས་པའི་ཐག་གཅོད་བྱུང་ཡོད་པ་དེ་བཞིན་རྒྱུ་མཚན་ཁ་གསལ་མེད་པར་ས་གནས་ཚོགས་གཙོས་ལས་མཚམས་འཇོག་དགོས་པའི་བཀའ་ཁྱབ་བཏང་བ་ནི་གཞོན་ནུའི་སྒྲིག་གཞི་དང་འགལ་ཡོད་པ་སོགས་གནས་ཚུལ་ལུང་འདྲེན་གནང་སྟེ་ངོས་ལེན་ཞུས་མེད་པ་རེད།
གནས་ཚུལ་ལྟར་ན། ཟླ་བ་འདིའི་སྤྱི་ཚེས་༡༩ཉིན་ཨ་རིའི་གྲོང་ཁྱེར་ནིའུ་ཡོག་དང་ནིའུ་ཇར་སི་ས་གནས་བོད་ཀྱི་གཞོན་ནུ་ལྷན་ཚོགས་ཀྱི་རྒྱུན་ལས་གསར་བ་མི་མང་གིས་འོས་འདེམས་བྱེད་ཀྱི་ཡོད་པ་རེད་འདུག

གསར་འགོད་པ་དོན་གྲུབ་རྣམ་རྒྱལ།